„სამართლიანი არჩევნების“ დირექტორმა ნინო დოლიძემ ბრიფინგზე განაცხადა, რომ „სამართლიანმა არჩევნებმა“ ჯამში 490 ინციდენტი და დარღვევა დააფიქსირა.
მისივე თქმით, დაფიქსირებული ინციდენტებიდან 297 იყო საქართველოში გახსნილი საარჩევნო უბნების შიგნით გამოვლენილი დარღვევები, 167 - საარჩევნო უბნების გარეთ, ხოლო 26 - საზღვარგარეთ გახსნილ საარჩევნო უბნებზე.

„სხვადასხვა დონის საარჩევნო ადმინისტრაციაში ორგანიზაციამ ჯამში წარადგინა 294 საჩივარი და 64 შენიშვნა. კერძოდ, საუბნო საარჩევნო კომისიებში - 104 საჩივარი (ასევე, დააფიქსირა 64 შენიშვნა ჩანაწერთა წიგნში). საოლქო საარჩევნო კომისიებში - 189 საჩივარი (214 ფაქტთან დაკავშირებით). ცესკოში - 1 საჩივარი.

ორგანიზაციის მიერ წარდგენილი საჩივრები ძირითადი კატეგორიების მიხედვით: საუბნო საარჩევნო კომისიის შემაჯამებელი ოქმის ბათილად ცნობა და კენჭისყრის შედეგების ხელახალი დათვლა, დამკვირვებლის უფლებების შეზღუდვა, ხმის ფარულობის დარღვევა, ბიულეტენების გაცემის საკითხი, კენჭისყრის შედეგების ბათილად ცნობა, გადასატანი ყუთის შედეგების ბათილად ცნობა, მარკირების პროცედურის დარღვევა.

კენჭისყრის შენობაში გამოვლენილი ინციდენტი/დარღვევა (323). კერძოდ, ბიულეტენების ჩაყრა (2); მრავალჯერადი ხმის მიცემა/ხმის მიცემის მცდელობა (12); დამკვირვებლის უფლებების უკანონო შეზღუდვა/გაძევება(30); მარკირების პროცედურის წესის დარღვევა (76); ხმის ფარულობის დარღვევა (76); გადასატან საარჩევნო ყუთთან დაკავშირებული დარღვევები (22); ელექტრონულ ტექნოლოგიებთან დაკავშირებული ხარვეზები (17); სხვა დარღვევები (62); საზღვარგარეთ შექმნილ უბნებში გამოვლენილი პრობლემები (26).

საარჩევნო უბნის გარე პერიმეტრზე გამოვლენილი ინციდენტი/დარღვევა (167). კერძოდ, კოორდინატორთა მიერ ამომრჩეველთა აღრიცხვა (71- საარჩევნო უბნების 31%); სიტყვიერი და ფიზიკური დაპირისპირების, ასევე, მუქარის ფაქტები საარჩევნო უბნების (25 - საარჩევნო უბნების 11%); ამომრჩეველთა ორგანიზებული ტრანსპორტირება (42 - საარჩევნო უბნების 19%); ამომრჩეველთა სავარაუდო მოსყიდვა (29 - საარჩევნო უბნების 13%).

„სამართლიანი არჩევნების“ შეფასებით, 2024 წლის საპარლამენტო არჩევნების წინასაარჩევნო პერიოდში და არჩევნების დღეს გამოვლენილი ფუნდამენტური ხასიათის დარღვევების ერთობლიობამ გავლენა მოახდინა ამომრჩევლის თავისუფალი ნების გამოვლენაზე და, შესაბამისად, არჩევნების შედეგები ვერ განიხილება, როგორც საქართველოს ამომრჩევლის ნების გამოხატულება.

2024 წლის 26 ოქტომბრის საპარლამენტო არჩევნებზე „სამართლიანი არჩევნების“ სადამკვირვებლო მისია წარმოადგენდა 1,000-მდე მოკლევადიან დამკვირვებელს უბნის შიგნით, 231 დამკვირვებელს უბნის გარე პერიმეტრზე, 73 საოლქო საარჩევნო კომისიის დამკვირვებელს, 85 მობილურ ჯგუფს, 23 იურისტს და 32 ოპერატორს, რომლებიც ფარავდნენ 73 საარჩევნო ოლქს. დაკვირვებისას გამოყენებული იყო რაოდენობრივი და თვისებრივი ინფორმაციის შეგროვება შემთხვევითი შერჩევის პრინციპით გამოვლენილი საარჩევნო უბნებიდან, რომელიც მთელი ქვეყნის მასშტაბით წარმომადგენლობითია”, - აღნიშნა დოლიძემ.

მისივე განმარტებით, ამ არჩევნების მთავარი ცენტრალური პრობლემა ხმის მიცემის ფარულობა, ზეწოლა, ნების კონტროლი იყო.

„ჩვენც გვაქვს შეკითხვები ვერიფიკაციის აპარატებთან დაკავშირებით. რაც შეეხება სკანერის აპარატს, იქ ხელით გადათვლა იყო და მეტ-ნაკლებად არის დაკვირვების შესაძლებლობა. ვერიფიკაციის აპარატებში სიების ჩატვირთვის პროცესს და ასევე, აუდიტის პროცესს ჩვენ არ დავსწრებივართ. შესაბამისად, ძალიან ბევრი შეკითხვა ამასთან დაკავშირებით გვაქვს. ჩვენ ცესკოსთან გვქონდა არჩევნებამდე მოთხოვნა, თუ როგორ უნდა ჩატარებულიყო აუდიტი, ისე რომ, ის გამჭვირვალე, სანდო ყოფილიყო. ამ ეტაპზე ჩვენ არ ვიცით, როგორ ჩატარდა აუდიტი. მხოლოდ ის ინფორმაცია გვაქვს, რასაც ცესკო გასცემს. შესაბამისად, ძალიან ბევრი შეკითხვა ამასთან დაკავშირებით გვაქვს“, - განაცხადა დოლიძემ.

როგორც ის ამბობს, იზიარებენ „საქართველოს ახალგაზრდა იურისტთა ასოციაციის“ პოზიციას, რომ მასშტაბურად მოხდა ხმის მიცემის ფარულობის დარღვევა, რომელიც არის ფუნდამენტური უფლება.

„ამ არჩევნებზე ერთ-ერთი გამოწვევა იყო ხმის მიცემის ფარულობა.
როცა ცესკოს მიერ ორგანიზებული სასწავლო-სატრენინგო შეხვედრა იყო, რომელსაც ჩემი თანამშრომლები ესწრებოდნენ, ჩვენ ეს საკითხი მაშინვე დავაყენეთ, რომ მარკერი უკან გადადიოდა და გვითხრეს, რომ არჩევნების დღეს სხვა ქაღალდი იქნებოდა გამოყენებული. ამ არჩევნების მთავარი ცენტრალური პრობლემა ხმის მიცემის ფარულობა, ზეწოლა, ნების კონტროლი იყო“, - განაცხადა ნინო დოლიძემ.