მეღვინეობის ქალაქ გურჯაანში, ღვინის ფესტივალი წელს 12 ოქტომბერს უკვე მეექვსედ გაიმართება.

მზარდი ინტერესი, გურჯაანის ღვინის ფესტივალს ყოველწლიურად კიდევ უფრო მასშტაბურს ხდის. შედეგად, გურჯაანის ღვინის ფესტივალს წელს 424 მონაწილე ჰყავს.

ორგანიზატორების ინფორმაციით, საფესტივალო ღონისძიებები მოწვეული სტუმრებისთვის ახტალის პარკში 14:00 საათზე დაიწყება და 22:00 საათზე დამთავრდება. სადაც წარმოდგენილი იქნება ბავშვთა გასართობი პროგრამა, კახური მასტერკლასები, მეღვინეობა-მევენახეობასთან დაკავშირებული საინფორმაციო სივრცეები და ა.შ.

ცნობილია, რომ გურჯაანის ღვინის ფესტივალზე დამსწრეთა მსურველთათვის თბილისი-გურჯაანი-თბილისი მიმართულებით უფასო ავტობუსები ივლიან.

თბილისში შეკრების ადგილი - პირველი რესპუბლიკის მოედანი
თბილისიდან ავტობუსები გავლენ 13:00 და 14:00 საათზე
გურჯაანიდან ავტობუსები თბილისის მიმართულებით დაბრუნდებიან 22:00 და 23:00 საათზე.

12 ოქტომბრის დღის წესრიგი შემდეგია:

14:00-20:00 ღვინო - ჩვენი საუნჯე

• სომელიეების შოუ / ღვინის სახალისო კონკურსი
• IWSC ოქროს მედალოსანი ღვინოების პრეზენტაცია
• ევროპული ღვინოების პრეზენტაცია
• ქართული ბაზარი
• კახური მასტერკლასები

14:00-22:00 მარკეტი

• მეღვინეთა სივრცე
• მეწარმეთა სივრცე
• ქართული ეთნო ნაწარმი
• მეღვინეობა-მევენახეობასთან დაკავშირებული საინფორმაციო სივრცეები

14:00-22:00 ფუდქორთი

• კახური ეზო
• ქართული სთრით ფუდი
• მწვადის სივრცე
• თათარობა და თონეში პურის ჩაკვრა
• საწნახელში ყურძნის დაწურვა

14:00-18:00

• მუსიკალური პროგრამა ბავშვთა სივრცეში

14:00-22:00

• ფესტივალის მთავარი საკონცერტო სცენის მუსიკალური პროგრამა

აღსანიშნავია, რომ გურჯაანის ღვინის ფესტივალის ამბასადორი წელს სომელიე ჯაბა ძიმისთარიშვილი იქნება.

"მაქსიმალურად ვეცდები წარმოდგენილ მარნებთან ყველასთან მივიდე, ახალი ღვინის პორტფოლიო შევადგინო, როგორც იმპორტისთვის, ასევე ადგილობრივი ბაზრისთვის. დიდი იმედი მაქვს, რომ ხარისხი უფრო და უფრო გაუმჯობესებული დამხვდება თითოეული მარნიდან. ველოდები დიდ აქტივობასა და ხალხმრავლობას ფესტივალის ფარგლებში."-აღნიშნავს ჯაბა ძიმისთარიშვილი.

ორგანიზატორების თქმით, გურჯაანის ღვინის ფესტივალის მიზანია, უნიკალური და ნატურალური პროდუქტის - ქვევრის ღვინის, როგორც იუნესკოს არამატერიალური კულტურული მემკვიდრეობის ძეგლისა და ბოთლის ღვინის, როგორც მაღალხარისხიანი საბაზრო პროდუქტის განვითარების ხელშეწყობა, ადგილწარმოშობის დასახელების ღვინოების პოპულარიზაცია, ღვინის ტურიზმის ხელშეწყობა და ქართული კულტურისა და ტრადიციების გაცნობა, როგორც ადგილობრივი, ისე უცხოელი საზოგადოებისთვის.

სიახლეა ის, რომ წელს პირველად IWSC-ის საერთაშორისო კონკურსს საქართველოში სპირტიანი სასმელების კატეგორია დაემატება.