მიმდინარე წლის 10 ოქტომბრიდან 23 ოქტომბრამდე, ქ. გორის მუნიციპალიტეტის მერიის მოსწავლე-ახალგაზრდობის კულტურულ-საგანმანათლებლო ცენტრი, აწყობს „საქართველოს სახალხო თეატრების ფესტივალს" - გორი 2015. აღნიშნულ ფესტივალში მონაწილეობას იღებს საქართველოს ცხრა რეგიონი: ბორჯომის, სამტრედიის, საჩხერის, საგარეჯოს, ხარაგაულის, წყალტუბოს, ბაღდათის, ჩოხატაურის და ხელვაჩაურის სახალხო თეატრები. საგარეჯოს კულტურის ობიექტების გაერთიანების ინფორმაციით, 23 ოქტომბერს დაჯილდოვდებიან სხვადასხვა ნომინაციებში (საუკეთესო სპექტაკლი, მამაკაცის საუკეთესო როლი, მამაკაცის მეორეხარისხოვანი როლი, ქალის საუკეთესო როლი, ქალის მეორეხარისხოვანი როლი, საუკეთესო რეჟისორი, საუკეთესო მხატვარი, საუკეთეს მუსიკალური გამფორმებელი) გამარჯვებულები, რომელსაც გამოავლენს ჟიური (ლაშა ჩხარტიშვილი - თეატრმცოდნე, ლელა ოჩიაური - თეატრმცოდნე და ნიკა წულუკიძე - თეატრმცოდნე). მათივე ცნობით, აღნიშნული ფესტივალი ემსახურება საქართველოს სხვადასხვა რეგიონებში არსებული სახალხო თეატრების შემოქმედების ფართო აუდიტორიამდე მიტანას, პოპულარიზაციას და სამომავლო ურთიერთთანამშრომლობას. „საქართველოს სახალხო თეატრების ფესტივალს" - გორი 2015 უმასპინძლებს ქ. გორის მუნიციპალიტეტის მერიის მოსწავლე-ახალგაზრდობის კულტურულ-საგანმანათლებლო ცენტრი.