შსს-ს საგანგებო სიტუაციების მართვის სააგენტომ, საერთაშორისო ასოციაცია „კივიტას გეორგიკას“ თანაორგანიზებით, წყალდიდობისას საგანგებო სიტუაციებზე რეაგირების სისტემის სიმულაციური ჩვენება განახორციელა. უწყების ინფორმაციით, სწავლება პროექტის „წყალდიდობის საწინააღმდეგო ადრეული გაფრთხილება და პრევენცია საქართველოში, მდინარეების კაბალისა და დურუჯის განსაკუთრებული გათვალისწინებით“ ფარგლებში, წინასწარ შემუშავებული სცენარის მიხედვით ჩატარდა. ტრენინგი თეორიული, პრაქტიკული და შემაჯამებელი ნაწილებისგან შედგებოდა. სემინარზე მონაწილეებს ყვარლის მუნიციპალიტეტისთვის შემუშავებული წყალდიდობის საწინააღმდეგო გეგმა და მდინარე კაბალზე დატბორვის შესაძლო ზონები გაეცნოთ. სააგენტოს ცნობით, მდინარე დურუჯის ხეობის ჰიდრომეტეოროლოგიური, მორფოლოგიური და გეოლოგიური მახასიათებლები ღვარცოფული პროცესების პერიოდულად გააქტიურებას განაპირობებს. შესაბამისად, სწავლება მოსალოდნელ საფრთხეზე კოორდინირებული რეაგირების დახვეწის მიზნით ჩატარდა. ტრენინგს შსს-ს საგანგებო სიტუაციების მართვის სააგენტოს, საერთაშორისო ასოციაცია „კივიტას გეორგიკას“, საქართველოს გარემოს დაცვის ეროვნული სააგენტოს, საერთაშორისო დახმარების პოლონეთის ცენტრის, საქართველოს წითელი ჯვრის საზოგადოებისა და ყვარლის ადგილობრივი ხელისუფლების წარმომადგენლები დაესწრნენ. საერთაშორისო ასოციაცია „კივიტას გეორგიკა“ პროექტს პოლონეთის საერთაშორისო დახმარების ცენტრთან თანამშრომლობით და პოლონეთის საგარეო საქმეთა სამინისტროს ფინანსური მხარდაჭერით ახორციელებს. როგორც ცნობილია, აღნიშნული პროექტის ფარგლებში მიმდინარე წლის აგვისტოში, მდინარე „დურუჯის“ სათავეში კოსმოსური ნავიგაციით აღჭურვილი წინასწარი გაბრთხილების სისტემის სადგური დამონტაჟდა.