მმართველი პარტია „ქართული ოცნების“ საპატიო თავმჯდომარემ, ოლიგარქმა ბიძინა ივანიშვილმა უარი განაცხადა ევროპისა და ევრაზიის საკითხებში ამერიკის შეერთებული შტატების სახელმწიფო მდივნის თანაშემწე ჯიმ ო’ბრაიენთან შეხვედრაზე. ო’ბრაიენის ვიზიტი თბილისში ხვალ, 14 მაისსაა დაგეგმილი.

ოლიგარქის გადაწყვეტილების შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ პრესკონფერენციაზე ისაუბრა. ირაკლი კობახიძის განცხადებით, ბიძინა ივანიშვილს „არ აინტერესებს“ და „არასერიოზულად უყურებს“ სანქციების საკითხს.

მისივე თქმით, ბიძინა ივანიშვილს სასწორზე კუთვნილი 2 მილიარდი დოლარი უდევს, რომელიც მან დასავლეთს მიანდო, მაგრამ „გლობალური ომის პარტიამ“ გამოიყენა. შესაბამისად, დასძინა კობახიძემ, მას და ქართული ოცნების სხვა წარმომადგენლებს არაფერი აქვთ დასაკარგი და მათ სანქციებით ვერ შეაშინებენ.

"შემიძლია დაგიდასტუროთ, რომ იყო [ჯიმ ო'ბრაიენის მხრიდან] თხოვნა ბიძინა ივანიშვილთან შეხვედრაზე, რასაც ბიძინა ივანიშვილმა უარით უპასუხა. ამას ჰქონდა თავისი ახსნა-განმარტება.

გარდა ამისა, იყო შემთხვევები გასული თვეების განმავლობაში, როცა უცხოელ დიპლომატებსა და პოლიტიკოსებსაც უთხრა უარი ბიძინა ივანიშვილმა შეხვედრაზე. ამაზე მე მაქვს ინფორმაცია, რადგან მე მიწევდა შეთანხმება გარკვეულ საკითხებზე.

ყველა შემთხვევაში უარი მიზეზი ერთი და იგივეა: ბიძინა ივანიშვილი აცხადებდა, რომ ის ისედაც არის დე-ფაქტო სანქციების ქვეშ. მას აქვს გაყინული ორი მილიარდი დოლარი, რომელიც დასავლეთს მიანდო, მაგრამ აღმოჩნდა გლობალური ომის პარტიის ხელში. აქედან გამომდინარე, ბიძინა ივანიშვილის პოზიციაა, რომ შანტაჟის ქვეშ ის ვერავითარ შეხვედრას ვერ გამართავს. როგორც კი დასრულდება შანტაჟი და დე ფაქტო სანქციები, რა თქმა უნდა, ნებისმიერ შეხვედრა შეიძლება, შედგეს", - განაცხადა ირაკლი კობახიძემ.

ცნობილია, რომ ჯიმ ო’ობრაიენს ხვალ მხოლოდ პრემიერ-მინისტრი ირაკლი კობახიძე და პარლამენტის თავმჯდომარე, შალვა პაპუაშვილი შეხვდებიან.

იმის მიუხედავად, რომ ვრცელდება ინფორმაცია ო’ბრაიენის მიერ ბიძინა ივანიშვილისთვის წარსადგენი სანქციების პაკეტის შესაძლო გადაცემის შესახებ, ირაკლი კობახიძე იმედოვნებს, რომ ხვალინდელ შეხვედრაზე ო’ბრაიენი ძირითადად სამი ძირითადი საკითხით ჩამოვა - ვიზალიბერალიზაცია საქართველოს მოქალაქეებისთვის, თავისუფალი ვაჭრობის შეთანხმება და პირდაპირი ფრენები.

„მე მაქვს მოლოდინი, რომ ბატონი ო ბრაიანი ჩამოვა ძირითადად სამი თემით - ეს არის ვიზალიბერალიზაცია საქართველოს მოქალაქეებისთვის, თავისუფალი ვაჭრობის შეთანხმება და პირდაპირი ფრენები. ამის ძალიან დიდი იმედი მაქვს“, - განაცხადა პრემიერ-მინისტრმა.



შეგახსენებთ, რომ ფართომასშტაბიანი საპროტესტო აქციებისა და სტუდენტთა მასობრივი გაფიცვის მიუხედავად, იურიდიულ საკითხთა კომიტეტმა რუსულ კანონს დღეს, 13 მაისს, მესამე მოსმენით მხარი რეკორდულად მოკლე დროში, 1 წუთსა და 7 წამში დაუჭირა.

პროტესტის ფონზე ჩაივლის რუსული კანონის განხილვა პლენარულ სხდომაზე ხვალაც, 14 მაისს.

საპროტესტო აქციები პარლამენტის მიმდებარე ტერიტორიაზე ამ წუთებშიც გრძელდება.