2025 წლის ერთიანი ეროვნული გამოცდების პროგრამაში ცვლილებებია. კერძოდ, ქართული ენისა და ლიტერატურის, ასევე ისტორიის საგამოცდო პროგრამებიდან ამოიღეს რამდენიმე საკითხი, ავტორი და ნაწარმოები.

24-მდეა შემცირებული ქართული ენისა და ლიტერატურის საგამოცდო პროგრამაში შესული საკითხების რაოდენობა.

მთლიანად ამოღებულია შემდეგი ავტორების შემოქმედება:

ალექსანდრე ჭავჭავაძე;
ალექსანდრე ყაზბეგი;
პოლიკარპე კაკაბაძე;
პაოლო იაშვილი.
კერძოდ, ამოღებულია ალექსანდრე ჭავჭავაძის ლექსი „გოგჩა“; ალექსანდრე ყაზბეგის მოთხრობა „ხევისბერი გოჩა“, პოლიკარპე კაკაბაძის პიესა „ყვარყვარე თუთაბერი“; პაოლო იაშვილის ლექსი „პოეზია“.
საგამოცდო პროგრამაში შემცირდა სხვა ავტორების ნაწარმოებების - ან ნაწარმოებების კონკრეტული თავების - რაოდენობაც.

ასევე ამოღებულია სულხან-საბა ორბელიანის ნაწარმოებიდან „სიბრძნე-სიცრუისა“: მემკვიდრის აღზრდის ამბავი; იგავ-არაკები: „მეფე ხორასნისა“, „ძუნწი და ვაჭარი“; „უგუნური მცურავი“, „სამნი ბრმანი“, „მეფუნდუკე და დიდვაჭარი“;

საგამოცდო პროგრამების ნუსხაში დავით გურამიშვილის შემოქმედების გასულ წელს არსებული ვრცელი სიიდან მხოლოდ ორი ნაწარმოებია დარჩენილი.

გრიგოლ ორბელიანის შემოქმედებიდან ამოღებულია „საღამო გამოსალმებისა“ და „პასუხი შვილთა“.

ნიკოლოზ ბარათაშვილის ლექსებიდან ამოღებულია: „არ უკიჟინო, სატრფოო“, „ცისა ფერს“, „ხმა იდუმალი“, „სულო ბოროტო“, „ვპოვე ტაძარი“.

ილია ჭავჭავაძის შემოქმედებიდან ამოღებულია: „ბედნიერი ერი“, „პასუხის პასუხი“, „ჩემო კალამო“, „განდეგილი“ და „აჩრდილი“.

აკაკი წერეთლის ლექსებიდან ამოღებულია „აღმართ-აღმართ“, „სულიკო“, „ქებათა ქება“.

ვაჟა-ფშაველას ნაწარმოებებიდან ამოღებულია „რამ შემქმნა ადამიანად“, „იას უთხარით ტურფასა“; „ბახტრიონი“; „ამოდის, ნათდება“ და პუბლიცისტური წერილი „კოსმოპოლიტიზმი და პატრიოტიზმი“.

ამოღებულია გალაკტიონ ტაბიძის „მშობლიური ეფემერა“, ასევე გიორგი ლეონიძის „ნინოწმინდის ღამე“.

პროგრამაში ანა კალანდაძის ლექსი „მკვდართა მზე ვარ“ ჩანაცვლებულია ლექსით - ახლა იქნება „ვაჟაო, დილის მზის სხივო“.

რაც შეეხება ისტორიის გამოცდას, ამოღებულია 1802, 1804, 1812, 1819-20 წლის აჯანყებები რუსეთის წინააღდეგ.

2024 წლის გამოცდებისათვის ცალკე საკითხად იყო გამოყოფილი „საქართველო რუსეთის იმპერიის შემადგენლობაში“.

• რუსეთის მიერ ქართული სამეფო-სამთავროების დაპყრობა;
• აჯანყებები საქართველოში ცარიზმის წინააღმდეგ XIX საუკუნის პირველ ნახევარში;
• საქართველო მეფისნაცვლობის პერიოდში;
• ალექსანდრე II-ის რეფორმები;
• რუსეთ-ოსმალეთის ომები და საქართველო.

2025 წლის პროგრამაში ერთ-ერთი თავის სათაურია „მსოფლიო და საქართველო XIX საუკუნეში“, რომელიც მოიცავს საკითხებს: „ნაპოლეონის ეპოქა“, „დიდი ბრიტანეთი“, „რუსეთი“,  „საქართველო XIX საუკუნეში“ („საქართველოს დაპყრობა რუსეთის მიერ“, „1832 წლის შეთქმულება“ და „თერგდალეულები“).