ლაგოდეხის მუნიციპალიტეტის გამგებელმა კახა ჯამბურიამ საზოგადოებას ის პროექტები გააცნო რომელიც 2015 წელს განხორციელდა და სამომავლო გეგმებზეც ისაუბრა. "ასეთი დიდი პრეზენტაცია იმიტომ მოვაწყვეთ, რომ მინდა ყველა მოქალაქემ იცოდეს რა კეთდება ლაგოდეხში. ანგარიშში ძირითადი აქცენტები ინფრასტრუქტურულ პროექტებზე გაკეთდა. მოსახლეობას საშუალება ჰქონდა დაესვა შეკითხვები მათთვის საინტერესო თემებზე. მათ მომავალი წლის გეგმაც გავაცანი. წინა წლებთან შედარებით ლაგოდეხის მუნიციპალიტეტში მნიშვნელოვანი წინსვლა გვაქვს. ვთვლი, რომ დღევანდელი შეხვედრა ყველასთვის ძალიან მნიშვნელოვანი იყო."-აღნიშნა კახა ჯამბურიამ. შეხვედრის შესახებ თავისი აზრი, სოფელ კართუბნის ბაგა-ბაღის გამგე ვენერა ქერელაშვილმაც გამოთქვა. "დღევანდელი შეხვედრა ჩვენთვის ძალიან მნიშვნელოვანი იყო. ბატონმა კახამ თავის მოსვლის შემდეგ რაიონისთვის ბევრი რამ გააკეთა. მანამდე, წლების განმავლობაში ხელმძღვანელობა ჩვენით არ ინტერესდებოდა. სოფელში გაყინული იყო მდგომარეობა და არ კეთდებოდა არაფერი. ეხლა ყველაფერი მკვეთრად შეიცვალა. გაკეთდა პოლიკლინიკა, გარემონტდა სკოლა და სხვა. "-აღნიშნა მან. შეხვედრას მოსახლეობასთან, ჟურნალისტებთან და არასამთავრობო ორგანიზაციებთან ერთად სასულიერო პირები, პოლიტიკური პარტიების წარმომადგენლები, ბიზნესმენები და საკრებულოს წევრები ესწრებოდნენ. დასასრულს გამგებელმა დამსწრე საზოგადოების მიერ დასმულ კითხვებს უპასუხა.