საქართველოს საკონსტიტუციო სასამართლომ, მიიღო გადაწყვეტილება საქმეზე "ბექა წიქარიშვილი საქართველოს პარლამენტის წინააღმდეგ." დავის საგანს წარმოადგენდა დიდი ოდენობით მარიხუანას შეძენა-შენახვისთვის საქართველოს სისხლის სამართლის კოდექსით გათვალისწინებული სასჯელი, კერძოდ კოდექსის 260-ე მუხლის მე-2 ნაწილის სიტყვების "ისჯება თავისუფლების აღკვეთით ვადით შვიდიდან თოთხმეტ წლამდე" კონსტიტუციურობა, საქართველოს კონსტიტუციის მე-14 და მე-16 მუხლებთან, ასევე მე-17 მუხლის მე-2 პუნქტთან მიმართებით. მოსარჩელეს ბრალი 69 გრ მარიხუანას, პირადი მოხმარების მიზნით, შეძენა-შენახვისათვის ედებოდა. სასამართლოს განცხადებით, გადაწყვეტილება არ უკავშირდება ისეთ შემთხვევებს, როდესაც საქმე ეხება ნარკოტიკული საშუალების გასაღებას, ან გასაღების მიზანს, ან ისეთ ვითარებას, როდესაც შეძენილი/შენახული მარიხუანას რაოდენობა იმდენად დიდია, რომ იგი მაღალი ალბათობით მიუთითებს გასაღების მიზანზე. შესაბამისად, სასამართლომ მიიჩნია, რომ პირადი მოხმარების მიზნით მარიხუანას შეძენა-შენახვისათვის დაუშვებელია სასჯელის სახით, ნებისმიერი ვადით, თავისუფლების აღკვეთის გამოყენება. აღნიშნული ქმედებისთვის, პირისთვის თავისუფლების აღკვეთის შეფარდება წარმოადგენს არაჰუმანურ, ღირსების შემლახველ მოპყრობას და წინააღმდეგობაში მოდის საქართველოს კონსტიტუციის მე-17 მუხლის მე-2 პუნქტთან. საკონსტიტუციო სასამართლოს ეს გადაწყვეტილება წარმოადგენს სამართლებრივ საფუძველს, იმ პირებისთვის, ვის მიმართაც აღნიშნული ქმედებისათვის უკვე გამოტანილია სასამართლოს გამამტყუნებელი განაჩენი და სასჯელის სახით შეფარდებული აქვთ თავისუფლების აღკვეთა. ამიერიდან ეძლევათ საშუალება, მიმართონ საერთო სასამართლოებს მათ მიმართ გამოტანილი განაჩენის გადასინჯვის მოთხოვნით.