არასრულწლოვნების ქალაქგარეთ გაყვანისათვის უსაფრთხოების რეგულაციები შემუშავდა. აღნიშნული რეკომენდაციები უწყებათაშორისმა კომისიამ შეიმუშავა და განსახილველად საკითხთან დაკავშირებულ ყველა დაწესებულებას გადაუგზავნა. დოკუმენტი საქართველოს კულტურისა და ძეგლთა დაცვის; შრომის, ჯანმრთელობისა და სოციალური დაცვის; განათლებისა და მეცნიერების, სპორტისა და ახალგაზრდობის საქმეთა და შინაგან საქმეთა სამინისტროს მიერ ერთობლივად მომზადდა, თუმცა ის ნორმატიულ ხასიათს არ ატარებს. როგორც დოკუმენტშია აღნიშნული, რეკომენდაცია მათ ოფიციალურ ვებ-გვერდზე განთავსდება და სისტემაში შემავალ საჯარო სამართლის იურიდიულ პირებში, საქვეუწყებო დაწესებულებებსა და არასრულწლოვანთა მონაწილეობით ღონისძიებების განმახორციელებელ შესაბამის კერძო სამართლის იურიდიულ პირებში ცირკულარის სახით დაიგზავნება. იმ შემთხვევაში, თუ არასრულწლოვნებს 24 საათზე მეტი ხნით მესამე პირი გაიყვანს, დოკუმენტის მიხედვით მას რამდენიმე გარემოების გათვალისწინება მოუწევს: 1. ტრანსპორტირება იმ ოფიციალური გადამზიდავების მიერ უნდა განხორციელდეს, რომლებსაც გავლილი აქვთ ტექდათვალიერება, არის დაზღვეული და აქვს მგზავრების დაზღვევაც, ყავს კვალიფიციური მძღოლი და გადამზიდავი კომპანია იღებს პასუხისმგებლობას მგზავრობის უსაფრხოებასა და ტრანსპორტის გამართულობაზე. 2. ტრანსპორტირების დროს, დროებითი განთავსების ადგილებსა და ორგანიზებულ ჯგუფებში არასრულწლოვანზე მეთვალყურეობისათვის მინიმუმ ერთი ადამიანი უნდა იყოს გამოყოფილი, რომელიც სრულწლოვანი და ქმედუნარიანი პირი იქნება და რომელსაც "პირველადი სამედიცინო სახმარების კურსი" ექნება გავლილი. ასევე, მეთვალყურეობის განმახორციელებელ პირს არ უნდა აღენიშნებოდეს ისეთი დაავადებები და ფიზიკური ანომალიები, რომლის ხასიათმა, სიმძიმემ და ხანგრძლივობამ არასრულწლოვნებს შეიძლება საფრთხე შეუქმნას. 3. არასრულწლოვანთა განთავსების ადგილი - უნდა აკმაყოფილებს სახანძრო უსაფრთხოების სფეროს მარეგულირებელ ნორმებს, ნაგებობა აშენებული უნდა იყოს სამშენებლო სტანდარტებისა და შესაბამისი ნებართვების საფუძველზე და უნდა ჰქონდეს გამართული ინფრასტრუქტურა; არასრულწლოვანთა განთავსების ადგილას დაცული უნდა იყოს სანიტარულ-ჰიგიენური ნორმები და ტემპერატურული რეჟიმი. ასევე, არასრულწლოვანთა განთავსების ადგილას დაცული უნდა იყოს ტოქსიკური და ფეთქებადი ნივთიერებების მოხმარებისა და განთავსების წესები და გამიჯნული უნდა იყოს ინდივიდუალური და საზოგადო თავშეყრის ადგილები; 4. არასრულწლოვანთა კვება - მალფუჭებადი პროდუქტების ტრანსპორტირება უნდა ხორციელდებოდეს სანიტარული პირობების დაცვით, კვების ობიექტზე დაცული იყოს სანიტარულ-ჰიგიენური ნორმები, ხოლო საკვები პროდუქტები უნდა იყოს უსაფრთხო და აკმაყოფილებდეს საკვები პროდუქტების ხარისხისა და უსაფრთხოების ჰიგიენურ ნორმატივებს მოქმედი კანონმდებლობის შესაბამისად. 5. სამოგზაურო დაზღვევა - მიზანშეწონილია არსებობდეს სამოგზაურო დაზღვევა ქვეყნის შიგნით გადაადგილებისას, ხოლო ქვეყნის ფარგლებს გარეთ სამოგზაურო დაზღვევა უნდა ატარებდეს სავალდებულო ხასიათს. 6. არასრულწლოვანის კანონიერი წარმომადგენლების თანხმობა - ღონისძიების ორგანიზატორს უნდა ჰქონდეს მშობლის/მშობლების (მეურვეების, არასრულწლოვანის კანონიერი წარმომადგენლების) ნოტარიულად დამოწმებული თანხმობა ან/და ხელშეკრულება, სადაც განისაზღვრება მხარეთა უფლებამოსილება. 7. ღონისძიების ხელმძღვანელი/ორგანიზატორი ვალდებულია: ა) არასრულწლოვანს და მის კანონიერ წარმომადგენელს მიაწოდოს ამომწურავი/სრულყოფილი ინფორმაცია ღონისძიების მიზნების, დაგეგმილი აქტივობების და მხარეთა უფლება-მოვალეობების შესახებ; ბ) სრულყოფილად ჰქონდეს არასრულწლოვანთა ანკეტური მონაცემები; 8. ღონისძიების ხელმძღვანელის/ორგანიზატორის მიერ დაქირავებულ პერსონალთან (ლიდერ/ინსტრუქტორებთან), გადამზიდავთან, არასრულწოლვანთა განთავსებისა და კვების ობიექტთან ურთიერთობები და მხარეთა პასუხისმგებლობა დარეგულირებული უნდა იყოს ხელშეკრულებით. 9. მიზანშეწონილია ღონისძიების პერიოდის და ადგილმდებარეობის შეტყობინება მუნიციპალიტეტისათვის, პოლიციისათვის, სახანძრო-სამაშველო დანაყოფისა და სასწრაფო დახმარების სამსახურისათვის. არასრულწლოვნების ქალაქგარეთ გაყვანისათვის სპეციალური რეგულაციები შემუშავების ინიციატივით კულტურისა და ძეგლთა დაცვის მინისტრი, მიხეილ გიორგაძე მას შემდეგ გამოვიდა, რაც მაისში ქობულეთის სასტუმრო "არმაზში" გაჩენილმა ხანძარმა სამი არასრულწლოვნის სიცოცხლე იმსხვერპლა.