ტუბერკულოზის წამლისადმი რეზისტენტული ფორმის სამკურნალო ახალი მედიკამენტი ბედაქილინი, საქართველოში უკვე ხელმისაწვდომია. შრომის, ჯანმრთელობის და სოციალური დაცვის მინისტრის მოადგილე ვალერი კვარაცხელია, აშშ -ს ელჩი საქართველოში იან კელი, დაავადებათა კონტროლის ეროვნული ცენტრის დირექტორი ამირან გამყრელიძე და USAID-ის წარმომადგენლები ტუბერკულოზის და ფილტვის დაავადებათა ეროვნულ ცენტრში აშშ-ს მთავრობის ახალი პროგრამის, ბედაქილინის - ტუბერკულოზის სამკურნალო ახალი პრეპარატის საქართველოში დანერგვისადმი მიძღვნილ პრეზენტაციას დაესწრნენ. "დაახლოებით 40 წელია ტუბერკულოზის მკურნალობაში ახალი პრეპარატი არ გამოჩენილა. ეს არის ინოვაციური პრეპარატი, რომელსაც უშვებს კომპანია "იანსენი". ამჟამად ჩვენ 200 პაციენტისთვის მივიღებთ ამ პრეპარატს." -აღნიშნა შრომის, ჯანმრთელობის და სოციალური დაცვის მინისტრის მოადგილე ვალერი კვარაცხელიამ. პროგრამა სიცოცხლის გადასარჩენად აუცილებელი მედიკამენტს პაციენტებს უფასოდ გადასცემს. საქართველო, რომელიც პროგრამის პირველი ბენეფიციარი ქვეყანაა, დაახლოებით 31 000 ბედაქილინის აბით მომარაგდება, რაც საკმარისია 24 თვის განმავლობაში 200 პაციენტის მკურნალობის სრული კურსის ჩასატარებლად. 2009 წლიდან ტუბერკულოზის გავრცელება თანდათან მცირდება და წარმატებული მკურნალობის მაჩვენებელი იზრდება. თუმცა, ტუბერკულოზის მულტირეზისტენტული (წამლისადმი მდგრადი) ფორმების გავრცელების და მკურნალობის სირთულის გამო, საქართველო რჩება მსოფლიოს 27 ქვეყანას შორის, სადაც ტუბერკულოზის ტვირთი ყველაზე მაღალია. ამდენად, მულტირეზისტენტული ტუბერკულოზის სამკურნალოდ ახალი ეფექტური მედიკამენტების გამოყენებას განსაკუთრებული მნიშვნელობა აქვს.