ჩვენი თავის ტვინი ათასობით მილიონი ნერვული უჯრედისგან შედგება. ნეირონების სიკვდილი იდეალური ცხოვრების წესის შემთხვევაშიც კი გარდაუვალია, რადგან დაბერების პროცესს ვერსად გავექცევით. ტვინის კვებას დიდი ყურადღებით უნდა მოვეკიდოთ. F ვიტამინის უკმარისობა იწვევს დეპრესიასა და გონებაგაფანტულობას. მისი მარაგის შევსება შესაძლებელია ისპანახით, მწვანილებით და კომბოსტოთი. E ვიტამინი საგრძნობლად აქვეითებს ალცჰაიმერის დაავადების (მოხუცებულთა ჭკუასუსტობის) განვითარების რისკს. ამ ვიტამინს შეიცავს კაკალი, ხილი, მწვანეფოთლოვანი ბოსტნეული, კვერცხის გული. E ვიტამინის დღიური ნორმის მისაღებად საკმარისია 2,5 სუფრის კოვზი მზესუმზირას ან სხვა მცენარეული ზეთის მღება. B6 ვიტამინი დადებითად მოქმედებს ინტელექტუალურ პროცესებზე. მას შეიცავს ბანანი, კარტოფილი, შვრია, თინუსი, ქათმის ხორცი. დღიური ნორმა შეიძლება მიიღოთ 200 გ საქონლის ხორცისგან ან 50 გ შვრიის ფანტელისგან. ყველამ იცის, რომ რკინის უკმარისობა იწვევს ანემიას, რომლის დროსაც თავის ტვინის სისხლით მომარაგება საგრძნობლად უარესდება, ეს კი ყურადღების კონცენტრაციის უნარს აქვეითებს. რკინის დღიური ნორმაა 2 მგ. რკინას შეიცავს ხორცი, პარკოსნები, წიწიბურა, ღვიძლი, პური, ვაშლი, ბროწეული. კალციუმი რომ ორგანიზმისთვის აუცილებელია, ეჭვს არ იწვევს, მაგრამ მეცნიერებმა ახლახან დაადგინეს, რომ ეს ელემენტი, სხვა ყველაფერთან ერთად, დეპრესიის დამარცხებასაც უწყობს ხელს. კალციუმის დღიური ნორმაა 1,0-1,5გ. მას შეიცავს რძის ნაწარმი, ჩირი, ბროკოლი, ნუში, ქაშაყი. მაგნიუმს ზოგჯერ ანტისტრესულ ლითონსაც უწოდებენ. ორგანიზმში მისი დეფიციტი პროვოცირებას უწევს უძილობასა და თავის ტკივილს, რაც ფიტავს თავის ტვინის ქერქს. მაგნიუმის დღიური ნორმაა 300-400 მგ. მას შეიცავს კარტოფილი, ბროკოლი, მდნარი ყველი, კაკაოს მარცვლები, ბანანი, თაფლი, ნუში, თევზი, ლობიო, მუხუდო, კაკალი, მდოგვის ზეთი, ხორბლის მარცვალი. პოლიუჯერი ცხიმები და ომეგა-3 არეგულირებს სისხლში ქოლსტერინის დონეს და ამ გზით აქვეითებს ათეროსკლეროზის რისკს. ამ მნიშვნელოვანი ნაერთების დღიურ ულუფას შეიცავს 30 გ სკუმბრია, 30 გ ქაშაყი თავისივე წვენში, 70 გ ორაგული, 1 სუფრის კოვზი მცენარეული ზეთი. სხვათა შორის, სიმინდის ზეთი მით უფრო სასარგებლოა, რაც უფრო ჩრდილოეთით მოყვანილი სიმინდისგანაა მიღებული. ქრომის უკმარისობა შფოთვას და მოუსვენრობას იწვევს. მისი დღიური ნორმაა 50-200 მგ. ქრომით მდიდარია სიმინდი, შავი პური, შავი ჩაი, ხორციანი კერძები და ქერქიანად მოხარშული კარტოფილი. წყარო: მკურნალი.გე