10 ივნისს საინიციატივო ჯგუფ "სიკეთე ჩვენი ვალიას"პროექტის ფარგლებში ლეგენდარული ქართველი მსახიობის, ნატო ვაჩნაძის ხსოვნისადმი მიძღვნილი კვირეული გაიხსნა. ღონისძიების პირველი დღე საინიციატივო ჯგუფის ახალგაზრდებმა ვაჩნაძის სახლ-მუზეუმში ცნობილი ქალბატონის ბიოგრაფიის მიმოხილვით, მისდამი მიძღვნილი ლექსებითა და პირველი არხის დოკუმენტური ფილმით გახსნეს, რომელიც ნატოს ცხოვრებას ასახავს. საინიციატივო ჯგუფს პროექტის განხორციელებაში მხარს უჭერს გურჯაანის მუნიციპალიტეტის გამგეობის კულტურის, განათლების და სოციალური განვითარების სამსახური. -"ნატო ვაჩნაძის სახლ-მუზეუმში მოხდა მისი ხსოვნისადმი მიძღვნილი კვირეულის საზეიმო გახსნა. პროექტს საინიციატივო ჯგუფი "სიკეთე ჩვენი ვალია" და მუნიციპალიტეტის გამგეობის კულტურის სამსახური ახორციელებს. წარმოდგენილი იყო ნატო ვაჩნაძის ცხოვრება, ასევე ნაჩვენები იქნა პირველი არხის დოკუმენტური ფილმი "ნატო ვაჩნაძე" და მოეწყო ფოტოგამოფენა."_გვითხრა პროექტის ავტორმა, ველისციხის საჯარო სკოლის მოსწავლე ზაურ მირიანაშვილმა. საინიციატივო ჯგუფის წევრები აცხადებენ, რომ მათი აქტივობები ხელს შეუწყობს ლეგენდარული ქალბატონის პოპულარიზაციის გაზრდას. -"გურჯაანში მაცხოვრებელ ახალგაზრდებს საერთოდ არ აქვთ გააზრებული, ვინ იყო და რას წარმოადგენდა ნატო ვაჩნაძე, კვირეული სწორედ მათ ინფორმირებას ემსახურება. შევეცდებით, ფართო მასებში გავშალოთ მისი ცხოვრება და შემოქმედება," _ ამბობს საინიციატივო ჯგუფის წევრი გიორგი მამულაშვილი. "სიკეთე ჩვენი ვალიას" ხელმძღვანელ ანი სპარსიაშვილს იმედი აქვს, რომ ამ პროცესში მუნიციპალიტეტის ახალგაზრდები აუცილებლად ჩაერთვებიან. ნატოს კვირეულის გახსნას მუნიციპალიტეტის გამგეობის თანამშრომლები და გამგებელი ჯონი ოსიაშვილი დაესწრნენ. მათ საინიციატივო ჯგუფს წამოწყებული საქმე მოუწონეს. "რამდენადაც სრულყოფილების საზომი ჩვენი წარსულია და ის ადამიანები, რომლებმაც ეპოქა შექმნეს სულიერების, კულტურის, ზნეობის ასამაღლებლად, ვთვლი, რომ მნიშვნელოვანია, ასეთი ღონისძიებები," _ გვითხრა გურჯაანის მუნიციპალიტეტის კულტურის, განათლებისა და სოციალური განვითარების სამსახურის, კულტურის განყოფილების ხელმძღვანელმა ნინო იაშვილმა. მუნიციპალიტეტის გამგებელი ჯონი ოსიაშვილი მიიჩნევს, რომ `ნატოობის~ აღნიშვნის ტრადიცია უნდა აღდგეს და ყოველწლიურად, 14 ივნისს აღინიშნოს. -"ეს არის ტრადიცია, რომლის აღდგენაც აუცილებელია. არ გვყავს ჩვენ ბევრი ისეთი მამულიშვილი გურჯაანში, როგორიც ნატო ვაჩნაძეა." ნატო ვაჩნაძის ხსოვნისადმი მიძღვნილი კულტურული ღონისძიებები კვირის განმავლობაში მიმდინარეობს, რომელიც 14 ივნისს, "ნატოობას" გრანდიოზული ღონისძიებით დასრულდება. მუნიციპალიტეტის გამგეობის წარმომადგენელთა განცხადებით, ამ თარიღის განახლებას წელს, თოთხმეტ ივნისს მაინც აპირებდნენ, თუმცა კარგია, რომ მას წინ ახალგაზრდების მიერ განხორციელებული პროექტი უძღვის. ლანა გულოშვილი