ნატალია ბარბაქაძე

 2007 წელს გურჯაანის კინოთეატრის გასხვისებამ საზოგადოების უკმაყოფილება გამოიწვია. პროტესტს იწვევდა ის განცდა, რომ ულამაზესი ქართველი მსახიობისა და გურჯაანელების სიამაყის, ,,ნატო ვაჩნაძის‘‘ სახელობის ნახევარსაუკუნოვანი შენობის ადგილას, შესაძლოა, სავაჭრო იბიექტი გახსნილიყო და ქალაქი კინოს გარეშე დარჩენილიყო. `სპექტრთან~ ინტერვიუში ადგილობრივი თვითმმართველობის წარმომადგენლები კინოთეატრისთვის 5 წლის განმავლობაში პროფილის შენარჩუნების პირობას დებდნენ. შენობის ნაწილში 2010 წელს ,,ლიბერთი ბანკი‘‘ განთავსდა, კინოთეატრი კი კვლავ დაპირების დონეზე რჩება.

ნატო ვაჩნაძის სახელობის კინოთეატრი გურჯაანში ნონეშვილის გამზირზე 1962 წელს აშენდა. თავის დროზე ის საზოგადოებაში დიდი პოპულარობით სარგებლობდა და მრავალი მაყურებელიც ჰყავდა. უძრაობის პერიოდში შენობა უფუნქციოდ დარჩა. უპატრონობის გამო დაზიანდა ჭერი, შეილახა ინვენტარი და დაინესტა იატაკი. მაშინდელმა მფლობელმა სააქციო საზოგადოება `ქართულმა ფილმმა~ მისი გაყიდვა გადაწყვიტა. გარკვეული ნაწილი 2007 წელს `ლიბერთი ბანკმა~ შეისყიდა, ხოლო მეორე ნაწილის მფლობელი 2009 წელს კერძო მესაკუთრე ზურაბ ხუროშვილი გახდა (ამის შესახებ გაზეთი `სპექტრი~ #30 (296) 2010 და #13 (312) 2011წწ წერდა). როგორც მაშინ ზურაბ ხუაროშვილმა `სპექტრთან~ კომენტარში განაცხადა კინოთეატრის შენობა პირობითი აუქციონის წესით შეისყიდა, რაც გულისხმობდა, რომ 5 წლის განმავლობაში მას პროფილი უნდა შენარჩუნებოდა. მაშინდელი მეპატრონე გურჯაანელებს იმასაც დაჰპირდა, რომ 2011 წლის გაზაფხულზე მოსახლეობას ახალი, თანამედროვე სტანდარტების შესაბამისი კინოთეატრი ექნებოდა. თუმცა, დაპირება ისევ დაპირებად დარჩა. ამის შემდეგ `სპექტრი~ ზურაბ ხუროშვილს კიდევ დაუკავშირდა. მან იმ ხელის შემშლელ ფაქტორებზე ისაუბრა, რის გამოც ობიექტის გახსნა შეფერხდა.

"ვფიქრობდი, რომ ივნისისთვის მომესწრო, მაგრამ პირველი რამაც ხელი შემიშალა, ეს არის სტერეოაპარატურა, რომელიც ამერიკიდან გამოვიწერე და ჯერჯერობით აქამდე არ ჩამოსულა. მის ჩამოტანას დაახლოებით ერთი თვე სჭირდება. გარდა ამისა, 3D ფორმატის ფილმების საყურებლად შესაძენია სათვალეები, რომელიც საკმაოდ გაძვირებული აღმოჩნდა, აქ უკვე დამატებითი ფინანსების მოძიება გახდა საჭირო. თარიღმა კიდევ იმის გამო გადაიწია, რომ მთლიანად გამოსაცვლელია საკანალიზაციო სისტემა. უკვე დაგეგმილია სად რა განთავსდება: შემოსასვლელი იქნება გამგეობის მხრიდან, მოეწყობა 60-70 კაციანი მინიდარბაზი და პარალელურ რეჟიმში _ ინტერნეტ-კაფე. სავარაუდოდ, გაყიდვაში იქნება ცივი სასმელები, `პოპკორნი~, `ჩიპსები~ და სხვა." _ აღნიშნა მაშინ `სპექტრთან~ საუბარში ზურაბ ხუროშვილმა.

გურჯაანის მოსახლეობის მოთხოვნით ამ საკითხს გაზეთი `სპექტრი~ კიდევ ერთხელ მიუბრუნდა. იმის გასარკვევად, თუ რატომ არ გაგრძელდა აღდგენითი სამუშაოები კინოთეატრში, ზურაბ ხუროშვილს კიდევ ერთხელ დავუკავშირდით. მან ჩვენთან სატელეფონო საუბარში განმარტა, რომ კინოთეატრის შენობა მისი საკუთრება აღარ არის. როგორც ჩვენთვის ცნობილი გახდა, შენობის ამჟამინდელი მეპატრონე დავით ცისკარაშვილია. "2011 წლის ბოლოს ზურაბ ხუროშვილისგან კინოთეატრის შენობის ნაწილი იმავე ფასად შევისყიდე, რაც მას ჰქონდა გადახდილი. ზუსტი თანხა აღარ მახსოვს, მგონი ასი ათასზე მეტი იყო. რემონტები დავიწყეთ, მაგრამ ზამთარში შევაჩერეთ, რადგან ჭერიდან წყალმა ისევ გაჟონა. როგორც გამოთბება, სამუშაოები მაშინვე განახლდება. შენობაში დიდი და მცირე დარბაზი მოეწყობა. ვფიქრობთ, შესაძლებელი იქნება ფილმების ჩვენება 3D ფორმატში, ასევე მოეწყობა გასართობი ცენტრი, მომავალში საქმე გვიჩვენებს თუ კიდევ რისი გაკეთება შეიძლება. ყველა საჭირო ტექნიკური აღჭურვილობა შეძენილი გვაქვს, მხოლოდ რემონტია ჩასატარებელი და ინვენტარი _ შესაცვლელი. პირველი სექტემბრისთვის ყველაფერი მზად იქნება და საზოგადოება შეძლებს ფილმები შეღავათიან ფასად ნახოს," _ გვითხრა დავით ცისკარაშვილმა.

მოსახლეობა კი იმედოვნებს, რომ რამდენიმეწლიანი დაპირება ამჟამად მაინც შესრულდება, გურჯაანელებს კეთილმოწყობილი კინოთეატრი ექნებათ და ფილმების სანახავად დედაქალაქში აღარ მოუწევთ სიარული. მათი თქმით, ეს ახალგაზრდების კულტურული განვითარებისთვისაც მეტად მნიშვნელოვანი და საჭიროა.