ინგა ბიტარაშვილი

უკვე წლებია, რაც გურჯაანში არსებული ახალგაზრდების თავშეყრის ერთ-ერთი მნიშვნელოვანი ადგილო და `გურჯაანის სავიზიტო ბარათი~ _ დიდების მემორიალი რეაბილიტაციას საჭიროებს. დაზიანებული ქონგურების (ნავები) ჩანგრევის რეალური საშიშროება არსებობს. თუმცა, ადგილობრივი ხელისუფლება რეაბილიტაციისთვის ტენდერის გამოცხადებას რამდენიმე ეტაპად გეგმავს, რის გამოც, სავარაუდოდ, ობელისკების აღდგენა ამ ზაფხულისთვის ვერ მოხერხდება.

დიდების მემორიალი, გასულ წლებში გურჯაანელებისთვის საზაფხულო თავშეყრის ერთადერთ ადგილად ითვლებოდა. ღია ცის ქვეშ მოწყობილ სცენაზე დროდადრო კულტურული ღონისძიებებიც ტარდებოდა. ზაფხულის საღამოს, ასაკის განურჩევლად, უამრავი ადამიანი იყრიდა თავს და გართობასთან ერთად სუფთა ჰაერზეც ისვენებდა. თუმცა, რიგითი მოქალაქეებისა თუ ადგილობრივი ხელისუფლების უყურადღებობის გამო დროთა განმავლობაში ყველაფერი პირუკუ დატრიალდა: დაზიანდა ე.წ. `ნავები,~ გაიძარცვა სკამები, უფუნქციოდ დარჩა სცენა და არცთუ ისე კარგ მდგომარეობაშია მუზეუმიც. აღნიშნულიდან გამომდინარე, გურჯაანელ ახალგაზრდებს შეკრების ადგილად ახლა მხოლოდ `პაპას ბაღი~ შემორჩათ, რომელიც მათი აზრით, ბაზარს უფრო ჰგავს ვიდრე ბაღს. "ჩვენი რაიონის მაცხოვრებლები, დედაქალაქში წასული სტუდენტები, ზაფხულობით გურჯაანში ჩამოდიან. ერთადერთი ადგილი `პაპას ბაღია~, სადაც შეიძლება დაჯდე და აქაც იმდენი ხალხი იყრის თავს, ბაზარი გეგონება. ზოგჯერ გავლაც კი შეუძლებელია. ადრე ობელისკებზე კარგად ვერთობოდით, თანაც იქ სუფთა ჰაერია, გრილა და გაცილებით დიდი ტერიტორიაა. ვფიქრობ, საჭიროა მისი რეაბილიტაცია, რადგან ნავები ისეა დაზიანებული, რომ შეიძლება ვინმე დაშავდეს კიდეც," _ გვითხრა ნინი ჩეკურიშვილმა.

გურჯაანელი 26 წლის გიორგის აზრით, დიდების მემორიალის რეაბილიტაცია ახალგაზრდებისთვის აუცილებლობას წარმოადგენს. "რვა-ათი წლის წინ ჯერ კიდევ შეიძლებოდა აქ ამოსვლა, გართობა და დასვენება. ახლა ეს ადგილი იმდენადაა დაზიანებული, რომ ყველა ერიდება. არ ვიცი რატომ, მაგრამ ძალიან მიყვარს აქ ჯდომა და ფიქრი. ვერ წარმომიდგენია, დაუჯერებლადაც კი მეჩვენება უკვე, ნუთუ ამ ადგილის რეაბილიტაცია ოდესმე მოხდება?! ეს საკითხი აქამდე არ უნდა მოეგვარებინათ? ვფიქრობ, შადრევანზე მნიშვნელოვანი ობელისკების აღდგენაა. სტუდენტობის მეგობარი ჩამოვიყვანე დასავლეთ საქართველოდან და ეს ადგილი ძალიან მოეწონა, თუმცა გაუკვირდა, ასეთი მოუვლელი რომ არის. მითხრა: მე რომ გურჯაანელი ვიყო, ახალგაზრდების სახელით ხელმოწერებს შევაგროვებდი, განცხადებას შევიტანდი და ამ საკითხს ნებით თუ არა, ძალით გავაკეთებინებდი ადგილობრივ ხელმძღვანელობასო," _ გვითხრა გიორგიმ, რომელმაც გვარის დასახელებისგან თავი შეიკავა.

ახალგაზრდების მსგავსად დიდების მემორიალის აღდგენას აუცილებელად და მნიშვნელოვნად მიიჩნევენ ასაკიანი ადამიანებიც. 67 წლის ნიკოლოზ მამისაშვილი `სპექტრთან~ საუბარში ამბობს, რომ ეს არის `გურჯაანის სავიზიტო ბარათი~ და ამიტომ პირველ რიგში მისი რეაბილიტაციაა საჭირო. "ობელისკები ყველამ იცის. ძალიან ბევრ ქალაქში ვარ ნამყოფი. როცა მეკითხებოდნენ საიდან ვიყავი, ამ ადგილს მივანიშნებდი და იქ დამთავრებული იყო ლაპარაკი _ ამის შესახებ საქართველოს ყველა კუთხეში არიან ინფორმირებულები. ეგეც რომ არ იყოს, სად უნდა წავიდნენ ახალგაზრდები?! გურჯაანში არანაირი გასართობი არ არის, ერთადერთი სასეირნოდ თუ გამოვლენ და საამისო ადგილიც არ აქვთ. დადიან ნონეშვილზე წინ და უკან," _ ამბობს ნიკოლოზ მამისაშვილი.

გურჯაანის მუნიციპალიტეტის საკრებულოს თავმჯდომარე, ზაქარია იაგანაშვილი განმარტავს, რომ დიდების მემორიალი ერთ-ერთი მნიშვნელოვანი ადგილია და მისი რეაბილიტაცია უახლოეს მომავალში დაიწყება. "დიდების მემორიალის რეაბილიტაციისთვის, ტენდერი ხარჯთაღრიცხვის გაკეთებაზე ამ დღეებში გამოცხადდება, შემდეგ კი უკვე იმ ხარჯთაღრიცხვაზე გამოცხადდება ტენდერი ობელისკების რეაბილიტაციისთვის. პირველ რიგში მნიშვნელოვანია, რომ მოხდეს ქონგურების (ნავების) აღდგენა, რადგანაც არსებობს ჩანგრევის საშიშროება. ასევე უნდა მოხდეს სცენის, სკამებისა და მუზეუმის ჭერის რეაბილიტაციაც. ალბათ კიდევ რაღაც კოსმეტიკური სამუშაოები იქნება შესასრულებელი, მაგრამ იქ არ დაიდგმება ატრაქციონები. ასე, რომ ჩვენი სურვილია, დიდების მემორიალი კვლავ იყოს ახალგაზრდებისთვის თავშეყრის ერთ-ერთი ადგილი," _ აღნიშნა `სპექტრთან~ საუბარში ზაქარია იაგანაშვილმა.

მისივე თქმით, დიდების მემორიალზე წვიმების შედეგად გაზრდილი ბალახი უახლოეს დღეებში მოითიბება. გურჯაანელი ახალგაზრდები რეაბილიტაციის გეგმას დადებითად აფასებენ და `გურჯაანის სავიზიტო ბარათი~ რეაბილიტაციის მოლოდინშისამუშაოების დაწყება-დამთავრებას მოუთმენლად ელიან.