ინგა ბიტარაშვილი გურჯაანის ნატო ვაჩნაძის სახელობის კინოთეატრი, როგორც უკვე ცნობილია, გაყიდულია. 2007 წელს `ლიბერთი ბანკმა~ (მაშინდელმა `სახალხო ბანკმა~) შენობის გარკვეული ფართი სს `ქართული ფილმისგან~ შეისყიდა, მეორე ნაწილის მფლობელი კი 2009 წლიდან ზურაბ ხუროშვილია. კერძო მესაკუთრე გურჯაანის მოსახლეობას 2011 წლის გაზაფხულისთვის თანამედროვე სტანდარტების კინოთეატრს დაპირდა (ამის შესახებ `სპექტრი~ 2010 წლის 30 ნოემბერი-8 დეკემბრის #30(296)-ში წერდა), თუმცა პირობა დღემდე ვერ შესრულდა. ნატო ვაჩნაძის სახელობის კინოთეატრი გურჯაანში, ნონეშვილის გამზირზე, 1962 წელს აშენდა და საზოგადოებაში დიდი პოპულარობით სარგებლობდა. დროთა განმავლობაში იგი ფაქტობრივად უფუნქციოდ დარჩა. როგორც ხდება ხოლმე, მიტოვებული შენობა უყურადღებობის გამო საკმაოდ დაზიანდა. მაშინდელმა მფლობელმა სააქციო საზოგადოება `ქართულმა ფილმმა~ მისი გაყიდვა გადაწყვიტა (ამის შესახებ `სპექტრი~ 2009 წლის 1522 აპრილის #8(247)_ში წერდა). კინოთეატრის შენობის ნაწილი ახლა უკვე ზურაბ ხუროშვილის საკუთრებაშია, რომელიც 2009 წელს სააქციო საზოგადოება `ქართული ფილმისგან~ შეიძინა. "კინოთეატრის შენობა პირობიანი აუქციონის წესით ვიყიდე, რაც გულისხმობს, რომ 5 წლის მანძილზე პროფილი უნდა შეუნარჩუნდეს. ვიდრე ჩემი საკუთრება გახდებოდა, აღნიშნული შენობა ათი წლის ვადით იჯარით მქონდა აღებული. ფუნქციონირებდა კინოდარბაზი და კაფებარიც. თუმცა ამან არ გაამართლა, მოგებაზე რომ აღარაფერი ვთქვათ, გადასახადებსაც ვერ ავუდიოდი და ამიტომაც დავხურე. რაც შეეხება უახლოეს გეგმებს, ხაზგასმით ვამბობ: მე ვპირდები გურჯაანის მოსახლეობას, რომ 2011 წლის გაზაფხულზე ახალი თანამედროვე კინოთეატრი ექნებათ," _ ასეთი სახის კომენტარი გააკეთა ზურაბ ხუროშვილმა `სპექტრთან~ რამდენიმე თვის წინ. ამ დაპირების გამო გურჯაანელები გაზაფხულს მოუთმენლად ელოდნენ, თუმცა მათი მოლოდინი არ გამართლდა. მოსახლეობა იმედგაცრუებულია და საკითხის გასარკვევად გაზეთ `სპექტრის~ რედაქციას აკითხავს. "როდესაც წავიკითხეთ, რომ გაზაფხულზე კინო გაიხსნებოდა, ძალიან გაგვიხარდა. თითქმის ყოველგვარ კულტურულ ღონისძიებას მოკლებულები ვართ და ეს ინფორმაცია ჩვენთვის, შეიძლება ითქვას, იმედის ნაპერწკალი იყო. საინტერესოა, რა მოხდა? არადა, ისეთი დამაჯერებელი გვეჩვენა მფლობელის კომენტარები, დარწმუნებულები ვიყავით გაზაფხულზე გურჯაანს კინო მართლაც ექნებოდა," _ ამბობს 18 წლის მარი, რომელსაც მეგობრებიც ეთანხმებიან. ამის გამო უკმაყოფილებას გამოთქვამს მარიკა ზირაქაშვილიც და ამბობს, რომ იმედი მასაც გაუცრუვდა. `ძალიან ცუდია ასე რომ მოხდა, არადა იმედიანად ვიყავი. მეგონა 3D ფილმებს აქ მაინც ვუყურებდი, რადგანაც ამჟამად იმის ფუფუნება თითქმის არავის აქვს, რომ ფილმის საყურებლად თბილისში წავიდეს. მოსახლეობას სხვა ათასი პრობლემა აწუხებს," _ ამბობს `სპექტრთან~ საუბარში მარიკა ზირაქაშვილი. აღნიშნული საკითხის გასარკვევად გაზეთი `სპექტრი~ ზურაბ ხუროშვილს დაუკავშირდა, რომელმაც იმ ხელშემშლელ ფაქტორებზე ისაუბრა, რის გამოც კინოთეატრის გახსნა შეფერხდა. "ვფიქრობდი, რომ ივნისისთვის უნდა მომესწრო, მაგრამ პირველი, რამაც ხელი შემიშალა, ეს არის სტერეოაპარატურა, რომელიც ამერიკიდან გამოვიწერე და ჯერჯერობით აქამდე არ ჩამოსულა. მის ჩამოტანას დაახლოებით ერთი თვე სჭირდება. გარდა მაგისა, 3D ფორმატის ფილმების საყურებლად შესაძენია სათვალეები, რომელიც საკმაოდ გაძვირებული აღმოჩნდა. აქ უკვე დამატებითი ფინანსების მოძიება გახდა საჭირო. თარიღმა კიდევ იმის გამო გადაიწია, რომ მთლიანად გამოსაცვლელია საკანალიზაციო სისტემა. უკვე დაგეგმილია სად რა განთავსდება: შემოსასვლელი იქნება გამგეობის მხრიდან, მოეწყობა 6070 კაციან მინიდარბაზი და პარალელურ რეჟიმში _ ინტერნეტკაფე. სავარაუდოდ, გაყიდვაში იქნება ცივი სასმელები, `პოპკორნი~, `ჩიპსები~ და სხვ.," _ აღნიშნა ზურაბ ხუროშვილმა და აქვე დასძინა, რომ კინოთეატრის სეზონზე გახსნით თავადვეა დაინტერესებული. "ვვარაუდობ, რომ ინტერნეტით გამოწერილი ყველა საჭირო ტექნიკა ერთ თვეში უკვე უნდა ჩამოვიდეს. მანამდე აქ ადგილზე ჩატარდება სარემონტო სამუშაოები და თუ სხვა პრობლემები არ გამოჩნდება, კინოსაც გავხსნით. მინდა, რომ ზაფხულისთვის მოვასწრო," _ გვითხრა ზურაბ ხუროშვილმა. მისივე თქმით, ამ ეტაპზე მოლაპარაკებას აწარმოებს რუსთაველის კინოთეატრთან. "ვიცი, რომ რამდენიმე კინოთეატრი არის მათ დაქვემდებარებაში და მინდა, ჩვენს შემთხვევაშიც ასე იყოს. რა ფილმიც თბილისში იქნება ნაჩვენები, ჩათვალეთ, რომ მეც მექნება და გურჯაანშიც გავა," _ აღნიშნავს იგი. ნატო ვაჩნაძის სახელობის კინოთეატრის მფლობელი ზურაბ ხუროშვილი განმარტავს, რომ ბილეთის ღირებულება ყველასთვის ხელმისაწვდომი იქნება, ფასში განსხვავება კი ადგილის, რიგისა და ფილმის ჟანრის მიხედვით განისაზღვრება.