[caption id="attachment_990" align="alignleft" width="300" caption="მშობლები გადასახადის გაზრდის შემთხვევაში, ბავშვების კვების კაუმჯობესებასაც ითხოვენ"][/caption] ინგა ბიტარაშვილი უკვე ცნობილია, რომ 2011 წლიდან სკოლამდელ სააღმზრდელო დაწესებულებებში კვების საფასური გაიზრდება. თუ აქამდე მშობელს თვეში 4-5 ლარის გადახდა უწევდა, იანვრიდან ეს თანხა გაორმაგდება. ბაღების გაერთიანების დირექტორის ლელა თევდორაშვილის თქმით, კვების გადასახადის გაზრდა დაფინანსების შემცირებამ გამოიწვია, რასაც გურჯაანის მუნიციპალიტეტის საკრებულოს სოციალურ საკითხთა კომისიის თავმჯდომარე გიორგი ენუქიძე არ ადასტურებს.  როგორც გურჯაანის მუნიციპალიტეტის ბაღების გაერთიანების დირექტორი ლელა თევდორაშვილი ამბობს, მიმდინარე წელს, საბავშვო ბაღებში კვების გადასახადი დღეში ოც თეთრს შეადგენდა. თვის ბოლოს ბავშვის დასწრების დღეები ჯამდებოდა და 4-5 ლარი გამოდიოდა. "2011 წლის ბიუჯეტზე მუშაობა ამჟამად მიმდინარეობს და როგორც ჩემთვის ცნობილია კვების გადასახადის გაზრდა იგეგმება. თანხა გაორმაგდება და მშობლებს თვეში დაახლოებით 9-10 ლარის გადახდა მოუწევთ. გადასახადის გაორმაგება, დაფინანსების შემცირებამ გამოიწვია, ანუ ლაპარაკია, რომ შარშანდელთან შედარებით ბაღებს ნაკლები თანხა გადაერიცხება~ _ განმარტა `სპექტრთან~ საუბარში ლელა თევდორაშვილმა.მომავალი წლიდან, საბავშვო ბაღებში კვების გადასახადის გაზრდის გამო, მშობელთა უმრავლესობა უკმაყოფილებას გამოთქვამს. გურჯაანის მუნიციპალიტეტის #4 საბავშვო ბაგა-ბაღის ერთ-ერთი აღსაზრდელის მშობელი, რომელიც `სპექტრთან~ საუბარში ვინაობის დასახელებისგან თავს იკავებს, აცხადებს, რომ მისთვის ყოველთვიურად ათი ლარის გადახდა პრობლემას წარმოადგენს. `ზოგი მეუბნება თვეში ათი ლარის გადახდაც არ გინდაო?! ნეტავ მქონდეს და არავის თქმა არ მჭირდება. 5 ლარს ვერ ვიხდი, ხან ნათესავი მაძლევს და ხანაც მეზობლები მიხდიან კვების ფულს. შეიძლება სხვისთვის ამ თანხის გაღება იოლია, მაგრამ ჩემთვის ძალიან ბევრია, ამიტომაც განვიცდი ამ ამბავს," _ გვითხრა მან.უკმაყოფილოა ერთ-ერთი მშობელი ქალბატონი თამუნა, რომელიც გვარს ასევე არ ასახელებს. მისი თქმით, გადასახადის გაზრდის შემთხვევაში კვებაც უნდა გაუმჯობესდეს: `თუ გადასახადს გაზრდიან, მაშინ ბავშვებს იმასთან შედარებით კარგი კვება უნდა ჰქონდეთ, ვიდრე ახლა აქვთ. "როგორც გურჯაანის მუნიციპალიტეტის საკრებულოს სოციალურ საკითხთა კომისიის თავმჯდომარე გიორგი ენუქიძე განმარტავს, საბავშვო ბაღებში კვების გადასახადი გაიზრდება, თუმცა არა იმდენად, რომ მშობელმა მისი გადახდა ვერ შეძლოს. `მთელი საქართველოს მასშტაბით, ბაღებში ყველაზე დაბალი გადასახადი გურჯაანის მუნიციპალიტეტში იყო. მომავალი წლიდან კი დაახლოებით ათი ლარი გახდება. სხვაგან 20-30 ლარია, მაგრამ ჩვენ სხვებს არ ვუყურებთ. საფასურის გაორმაგება დაფინანსების შემცირებამ კი არა,  პროდუქტებზე ფასების ზრდამ გამოიწვია,"_ გვითხრა გიორგი ენუქიძემ. აღსანიშნავია, რომ 2010 წელს სკოლამდელი სააღმზრდელო დაწესებულებების დაფინანსება 700 ათასამდე ლარს შეადგენდა, რომლიდანაც დაახლოებით 85 ათასი სარემონტო სამუშაოებისთვის იყო განსაზღვრული. შეგახსენებთ იმასაც, რომ 2011 წლის ბიუჯეტი ჯერეჯერობით შემუშავების პროცესშია, ამიტომაც უცნობია, თუ რა თანხით დააფინანსებს საბავშვო ბაღებს გურჯაანის მუნიციპალიტეტის საკრებულო.