გაუქმებული და ხელახლა აღდგენილი სოფლის ბიბლიოთეკები

16:13 / 19.11.2010

ინგა ბიტარაშვილი

2007 წელს გურჯაანის მუნიციპალიტეტის საკრებულომ, ბიუჯეტში თანხის არარსებობის მიზეზით, მიიღო გადაწყვეტილება სოფლის ბიბლიოთეკების ლიკვიდაციის შესახებ. ამის გამო მუნიციპალიტეტში მხოლოდ ცენტრალური ბიბლიოთეკა ფუნქციონირებდა. თუმცა, მიმდინარე წელს, მოსახლეობის მოთხოვნის საფუძველზე, იმავე საკრებულომ მათი აღდგენა გადაწყვეტა.

როგორც საბიბლიოთეკო გაერთიანების დირექტორი მზია გლურჯიძე `სპექტრთან~ საუბარში ამბობს, 2007 წელს კულტურის სამინისტრომ ბიბლიოთეკები მუნიციპალიტეტის საკრებულოებს გადასცა. გურჯაანის მუნიციპალიტეტის საკრებულომ კი ამ ორგანიზაციების ლიკვიდაციის გადაწყვეტილება მიიღო. მათივე ინიციატივით, ახლა რეაბილიტაციის პროცესი დაიწყო.

გურჯაანის მუნიციპალიტეტის საკრებულოს თავმჯდომარის მოადგილე ალექსანდრე სირბილაშვილი ამ ქმედებას ახსნას უძებნის და განმარტავს. "მაშინ ბიბლიოთეკების არსებობისთვის საკმარისი ფინანსები და მატერიალურ-ტექნიკური ბაზა არ იყო. რაც ყველაზე მთავარია, შემცირდა წიგნის მკითხველთა რაოდენობაც. ეს კი თანამედროვე ტექნოლოგიების, ინტერნეტის, განვითარებამ გამოიწვია, საკრებულომაც შესაბამისი გადაწყვეტილება მიიღო. ახლა კი ბიუჯეტში არის იმის საშუალება, რომ სოფლის ბიბლიოთეკები აღვადგინოთ," _ ამბობს ალექსანდრე სირბილაშვილი.

როგორც საბიბლიოთეკო გაერთიანების დირექტორი მზია გლურჯიძე განმარტავს, ამჟამად ბიბლიოთეკა აღდგენილია ველისციხეში, ვეჯინში, ბაკურციხეში, ჯიმითში, არაშენდასა და კაჭრეთში. "ვაჩნაძეანში შენობის რეაბილიტაცია ბიზნესმენ ლადო გურგენიძის სპონსორობით განხორციელდა. როდესაც საკრებულომ, ფულის დაზოგვის მიზნით, ბიბლიოთეკების გაუქმების გადაწყვეტილება მიიღო, ეს არასწორი იყო, ამას ახლა მიხვდნენ და აღდგენაც დაიწყეს. მნიშვნელოვანია, რომ დროებითი სარგებლობის უფლებით, წიგნები საჯარო სკოლებს გადაეცა და რა თქმა უნდა, ახლა ისევ ბიბლიოთეკას დაუბრუნდება. ვიმედოვნებ, მათი აღდგენა ეტაპობრივად ყელა სოფელში მოხდება," _ ამბობს `სპექტრთან~ საუბარში მზია გლურჯიძე.

მიუხედავად იმისა, რომ გურჯაანის მუნიციპალიტეტში უკვე 7 ბიბლიოთეკა ფუნქციონირებს და როგორც მზია გლურჯიძე ამბობს, 2011 წლიდან ვაჩნაძეანშიც ამოქმედდება, მოსახლეობის გარკვეული ნაწილი უკმაყოფილოა, რადგან მათ სოფლებში ეს საკითხი ჯერ კიდევ არ გადაწყვეტილა. "ვერ გამიგია რა პრინციპით მოხდა არჩევა, რატომ არის ბიბლიოთეკა, დავუშვათ, ვეჯინში და არა კარდენახში. ჩვენი სოფელი გურჯაანიდან უფრო მოშორებითაა და თან გაცილებით მეტი მოსახლეა. კარგი იქნება თუ ამ საკითხს ჩვენთანაც დადებითად გადაჭრიან, რადგანაც ყოველთვის არც დრო და არც შესაძლებლობა გვაქვს, რომ წიგნისთვის გურჯაანში ვიაროთ. შეიძლება საკმარისი მკითხველი არ ჰყავდეს, მაგრამ ასეთ შემთხვევაში ჩვენ, უმცირესობა ვზარალდებით," _ ამბობს სოფელ კარდენახის მკვიდრი თამილა გულიაშვილი.

რა პრინციპით მოხდა სოფლების შერჩევა ამაზე საბიბლიოთეკო გაერთიანების დირექტორი მზია გლურჯიძე საუბრობს: "ბიბლიოთეკების აღდგენა ძირითადად დიდ სოფლებში მოხდა, ანუ ზონალურად გადანაწილდა. მინდა აღვნიშნო, რომ კარდენახში ბიბლიოთეკის ამოქმედებასთან დაკავშირებით, საკრებულოში განაცხადი უკვე შევიტანე და პასუხს უახლოეს მომავალში გავიგებთ."

აღნიშნულთან დაკავშირებით გურჯაანის მუნიციპალიტეტის საკრებულოში განმარტავენ, რომ კარდენახის ბიბლიოთეკის საკითხი განხილვას ექვემდებარება. ალექსანდრე სირბილაშვილის თქმით, ნებისმიერ სოფელში, სადაც იქნება საზოგადოების მოთხოვნა და შესაბამისი შენობა, ბიბლიოთეკის რეაბილიტაციისთვის საჭირო თანხა ბიუჯეტში იქნება გათვალისწინებული და ეს საკითხი, სავარაუდოდ, დადებითად გადაწყდება.

მოსახლეობა კი მაინც მიიჩნევს, რომ ცენტრლური თუ ადგილობრივი ხელისუფლება, შედეგზე არაორიენტირებულ გადაწყვეტილებას იღებს, ამიტომაა, რომ არის შემთხვევები როცა აწყობილ სტრუქტურას ჯერ აუქმებს, შემდეგ კი აღმოჩნდება, რომ შეცდომა დაუშვა და მის რეაბილიტაციას ახდენს."საკითხისადმი ასეთი მიდგომა არასწორია. არ შეიძლება დაუფიქრებლად, ყველაფერი ერთი ხელისმოსმით გაანადგურო. თუ დღეს ახალგაზრდებს წიგნი არ უნდათ, ამას ხელისუფლებაც უწყობს ხელს, იმიტომ, რომ არაერთი ბიბლიოთეკა გააუქმა, იმის ნაცვლად, რომ უფრო მეტი გაეხსნა. კარგია, ახლა მაინც თუ იწყებენ აღდგენას. ამასაც ხომ სჭირდება ხარჯი. მაინც გაუგებარია მათი ქმედებები," _ ამბობს თამარ ბერიძიშვილი.

საზოგადოება ბიბლიოთეკების რეაბილიტაციის საკითხს დადებითად ხვდება და მიიჩნევს, რომ ის რაც ასე ღირებულია, დაუფიქრებლად არ უნდა ნადგურდებოდეს.

| Print | E-mail