[caption id="attachment_790" align="alignleft" width="300" caption="ნათელა მოსემღვდლიშვილი თავისი უფლებების დაცვას ნებისმიერი გზით აპირებს"][/caption]   ინგა ბიტარშვილი გურჯაანის მუნიციპალიტეტის საკრებულოს გადაწყვეტილებით სკოლამდელ სააღმზრდელო დაწესებულებებში 2011 წლის პირველი იანვრიდან არც ერთი პენსიონერი აღარ იმუშავებს. ეს ეხება როგორც პედაგოგებს, ისე მზარეულებსა და ძიძებს. აღნიშნულთან დაკავშირებით გაფრთხილება ბაღში მომუშავე პენსიონერებმა უკვე მიიღეს, თუმცა სკოლამდელი სააღმზრდელო დაწესებულების გაერთიანების დირექტორი ლელა თევდორაშვილი ამ ფაქტს უარყოფს. გურჯაანის მუნიციპალიტეტის სკოლამდელ დაწესებულებებში დასაქმებულმა პენსიონერებმა უკვე იციან, რომ 2011 წლიდან ასაკის გამო სამსახურიდან გაათავისუფლებენ. თუმცა სკოლამდელი სააღმზრდელო დაწესებულების გაერთიანების დირექტორი ლელა თევდორაშვილი ამ ინფორმაციას არ ადასტურებს. მისი თქმით, ეს ორგანიზაცია არასაწარმოო, არაკომერციული იურიდიული პირია (აიპი), რომელიც 2007 წელს გურჯაანის მუნიციპალიტეტის საკრებულოს მიერ დაფუძნდა. შესაბამისად, საბავშვო ბაღები არანაირად არ ემორჩილება ცენტრალურ ხელისუფლებას და აბსოლუტურად მუნიციპალიტეტის საკრებულოს დაქვემდებარებაშია. "ვიღაცამ რაღაც კარგად ვერ გაიგო. უბრალოდ, სააღმზრდელო დაწესებულებაში ყველა მომუშავე პერსონალს 2010 წლის 31 დეკემბრამდე აქვთ ხელშეკრულება დადებული და იანვრიდან ეს უნდა გაგრძელდეს. ამ ვადის გასვლის შემდეგ ვინ წავა და ვინ არა, ეს ჯერჯერობით არ ვიცით. შეიძლება ახალგაზრდაც გავუშვა, რადგან დაკისრებულ მოვალეობებს ვერ ასრულებდეს. თუმცა მინდა გითხრათ, რომ არავის გათავისუფლებას არ ვაპირებ და არც რაიმე გადაწყვეტილება გვაქვს მიღებული. არ მესმის რატომ ატყდა ასეთი აჟიოტაჟი," _ ამბობს ლელა თევდორაშვილი. იმუშავებს თუ არა მომავალი წლიდან სააღმზრდელო დაწესებულებებში პენსიონერი, ამის თაობაზე `სპექტრი~ გურჯაანის მუნიციპალიტეტის საკრებულოს სოციალურ საკითხთა კომისიის თავმჯდომარეს გიორგი ენუქიძეს ესაუბრა. "მნიშვნელობა არ აქვს ეს როდის მოხდება. ბაღის თანამშრომელი, როგორც კი გახდება საპენსიო ასაკის, მაშინვე განთავისუფლდება. ეს განაპირობა იმან, რომ ყოფილა შემთხვევები აღმზრდელს ჩასძინებია ან სხვა. მე, როგორც ამ სფეროს კურატორი, ჩემს პოზიციას ბოლომდე დავიცავ. როდესაც კოლეგებთან ეს აზრი გამოვთქვი არც ხელმძღვანელობა და არც გაერთიანების დირექტორი ლელა თევდორაშვილი არ შემწინააღმდეგებიან, პირიქით, დამეთანხმნენ, რომ სააღმზრდელო დაწესებულებაში პენსიონერი ნამდვილად არ უნდა მუშაობდეს. სკოლაში კიდევ დასაშვებია, მაგრამ ბაღი სულ სხვაა, აქ არის ორმაგი დატვირთვა. ბავშვებს ძალიან დიდი ყურადღება სჭირდებათ. ამისთვის კი ახალგაზრდა, ენერგიით სავსე კადრია საჭირო. სწორედ ასეთები ჩაენაცვლებიან პენსიონერებს. ამ შემთხვევაში მშობელი უფრო მშვიდად იგრძნობს თავს," _ გვითხრა გიორგი ენუქიძემ. სკოლამდელ სააღმზრდელო დაწესებულებაში საპენსიო ასაკის პერსონალმა შესაბამისი გაფრთხილება უკვე მიიღო. ისინი ამ გადაწყვეტილებით უკმაყოფილოები არიან. ამბობენ, რომ მუშაობა ჯერ კიდევ შეუძლიათ და დაკისრებულ მოვალეობებს პირნათლად ასრულებენ. "ჩვენი გაერთიანების ხელმძღვანელობის დავალებით ბაღის მენეჯერმა გაგვაფრთხილა, რომ პირველი იანვრიდან საპენსიო ასაკის თანამშრომლებმა სამსახური უნდა დავტოვოთ. მთელ მუნიციპალიტეტში ეს გადაწყვეტილება სულ ოც თანამშრომელს ეხება და ყველა შეშფოთებულია. ჩვენს ადგილას ვინც უნდა დანიშნონ, იმ ადამიანებზე უფრო მეტი გამოცდილებაც გვაქვს, უფრო შრომისუნარიანები და განათლებულებიც ვართ. გარდა ამისა, ეკონომიურად ძალიან გვიჭირს. არც დაზღვევა გვაქვს, არც სოციალური დახმარება და არც პოლისი, რითი უნდა ვიცხოვროთ, არ ვიცი. ადრე გამგეობას ჩვენთვის ხელფასები რომ უნდა გაეზარდა, როგორც გავიგეთ, გუბერნიიდან სთხოვეს გურჯაანის გამგებელს, რომ ასე არ მოქცეულიყო, რადგან სხვა მუნიციპალიტეტის საბავშვო ბაღების თანამშრომლებზე მეტი ხელფასი გვექნებოდა. როგორც ჩანს, ეს გარკვეულ უხერხულობას შეუქმნიდათ. ამაზე რომ ფიქრობენ, იმას რატომ აღარ ითვალისიწნებენ, რომ მაგალითად, თელავში სააღმზრდელო დაწესებულებებში 70-75 წლის თანამშრომლები ჰყავთ," _ ამბობს `სპექტრთან~ საუბარში გურჯაანის მუნიციპალიტეტის სკოლამდელი სააღმზრდელო დაწესებულების უფროსი აღმზრდელი ნათელა მოსემღვდლიშვილი და აქვე დასძენს, რომ უფლებების დასაცავად ბოლომდე იბრძოლებს. "უკან არაფერზე დავიხევ და ბრძოლას გავაგრძელებ. რას მიზამენ, გურჯაანიდან ხომ არ გამაგდებენ? პროფკავშირების თავმჯდომარე და ყრილობის დელეგატი ვარ, ამიტომ ამ ორგანიზაციის დახმარების იმედიც მაქვს." სკოლამდელ სააღმზდელო დაწესებულებებში პენსიონერების ახალგაზრდებით ჩანაცვლებამ, მშობელთა შორის აზრთა სხვადასხვაობა გამოიწვია. ზოგს ეს რეფორმა არ მოსწონს, რადგან თვლის, რომ ამ საქმეში პენსიონერები უფრო გამოცდილები არიან. ზოგს კი მიაჩნია, რომ საპენსიო ასაკის პერსონალი ბაღიდან უნდა წავიდეს. "თუკი პენსიონერებს ახალგაზრდა კადრი ჩაანაცვლებს, მოხარული ვიქნები, რადგან ისინი უფრო ენერგიულები არიან და ბავშვებს უკეთესად მიხედავენ. თუმცა, ვწუხვარ, რომ ამ ხალხს უმუშევრად ყოფნა მოუწევს," _ გვითხრა მშობელმა ქალბატონმა მადონამ, რომელმაც გვარი არ გაგვიმხილა. საბოლოოდ რა გადაწყვეტილებას მიიღებს სკოლამდელი სააღმზრდელო დაწესებულების გაერთიანების დირექტორი ლელა თევდორაშვილი ჯერ კიდევ უცნობია, თუმცა, სკოლამდელი დაწესებულების საპენსიო ასაკის თანამშრომლები უკან დახევას არ აპირებენ და ამბობენ, რომ თავიანთ უფლებებს ნებისმიერი გზით დაიცავენ.