შეფასებისა და გამოცდების ეროვნული ცენტრი აბიტურიენტებს 2014 წლის ერთიან ეროვნულ გამოცდაზე სიახლეს სთავაზობს. კერძოდ, უცხო ენის გამოცდას მოსმენის ნაწილი დაემატება. ცვლილებას აბიტურიენტთა და მასწავლებელთა ერთი ნაწილი სირთულედ აღიქვამს და აღნიშნავს, რომ მიმდინარე წელს ჩაჭრილ აბიტურიენტთა რიცხვი გაიზრდება. მარიამ ჯანაშვილი სოფელ ახაშნის საჯარო სკოლის მოსწავლეა. როგორც ის ამბობს, სკოლაში უცხო ენის მოსმენას დრო არ ეთმობა და შესაბამისად, ახალი კომპონენტი სირთულეს წარმოადგენს. -"სკოლაში ნაკლებად გვაქვს მოსმენის საშუალება, ინგლისურს ვაბარებ და მოსმენაზე არასოდეს გაგვიმახვილებია ყურადღება. არ მომწონს ეს სიახლე და ვფიქრობ, რომ წელს ბევრი აბიტურიენტი ჩაიჭრება,"-გვითხრა მან. იგივე მოსაზრება აქვს სოფელ ჯიმითის საჯარო სკოლის მოსწავლეს, აბიტურიენტ ანა ჩიფაშვილს. "დიდი ხანია ინგლისურს ვსწავლობ, მაგრამ მოსმენის გაკვეთილი არასოდეს გვქონია. თბილისის, ასევე სხვა ქალაქის სკოლებს აქვთ ამის საშუალება, რაც სოფლებში იშვიათობაა. ამ გამოცდას ძალიან რთული კომპონენტი დაემატა და ამიტომ ვფიქრობ, ჩაჭრილთა რიცხვიც მოიმატებს." როგორც თელავის #9 საჯარო, გერმანული სკოლის, პედაგოგი სვეტა ციგროშვილი აღნიშნავს, მათ სკოლაში აბიტურიენტები მოსმენას მიჩვეულები არიან, მაგრამ მაინც უჭირთ. -"ჩვენს სკოლაში გერმანული გაძლიერებულად ისწავლება, ჩვენი აბიტურიენტებისთვის ეს სიახლე არ არის. სხვა სკოლებში კი ნაკლებად აქვთ მოსმენის საშუალება და ამისთვის მზად არ არიან. ჩვენ ბავშვებსაც კი უჭირთ მოსმენილი გაკვეთილების გაგება. პედაგოგის ნალაპარაკებს უფრო იგებენ, როგორც დისკს ჩაურთავ, ისინიც იბნევიან,"-გვითხრა მან. საკითხის გარკვევას შეფასებისა და გამოცდების ეროვნულ ცენტრში შევეცადეთ. "გადაწყვეტილება მიღებულ იქნა იმიტომ, რომ კომპლექსურად და შესაბამისად, სრულფასოვნად მოხდეს ენის ცოდნის შეფასება. ზოგადად, უცხოური ენების შეფასება ხდება ოთხი კომპონენტის მიხედვით: წერა, კითხვა, მოსმენა და ლაპარაკი. გასაგები მიზეზების გამო, სწორედ იმიტომ, რომ განსაკუთრებით რაიონის სკოლებში არასათანადოდ ისწავლება უცხოური ენა, ლაპარაკის კომპონენტი წელს ვერ დაემატებოდა. რაც შეეხება მოსმენის კომპონენტს, იგი მინიმალურად იმოქმედებს საერთო ქულაზე.Mმისი ყველა ნაწილი შეფასდება ერთი ქულით. საერთო მაქსიმალური ქულა არის რვა, რაც მთლიანი ტესტის 8%-ს შეადგენს. ეს დაგვეხმარება აბიტურიენტის ცოდნის ობიექტურად შეფასებაში. ყველა აბიტურიენტი ტექსტს ისმენს ორჯერ, მოსმენის დავალება შედგება ოთხი მცირე ზომის დიალოგისა და ოთხი ტექსტისგან. თითოეულ საკითხს მხოლოდ ერთი შეკითხვა ახლავს. ამ დავალების მთლიანი ხანრძლივობა 8-10 წუთია. ამ გამოცდისთვის არ დასჭირდებათ ყურსასმენები. სექტორში თხუთმეტივე აბიტურიენტი ერთნაირ დავალებას შეასრულებს, რომელსაც ხმის გამაძლიერებელის საშუალებით მოისმენს. ამ გამოცდაში ზღვარი ყველაზე დაბალია, აბიტურიენტმა 100-კითხვიანი ტესტის მხოლოდ 20%-ს უნდა გასცეს პასუხი,"-განგვიმარტეს აღნიშნულ სამსახურში. მათივე თქმით, ყველა სკოლას გაეგზავნა დისკები, რომელზეც ჩაწერილია ტესტის მოსმენის ნაწილის რამდენიმე სამუშაო ვარიანტი. პედაგოგებისა და აბიტურიენტებისგან განსხვავებით, აღნიშნულ სამსახურში ამ სიახლის გამო ჩაჭრილი აბიტურიენტების ზრდას გამორიცხავენ. თამარ კაპანაძე