სკოლამდელ სააღმზრდელო დაწესებულებებში სასწავლო პროცესი ათ საათზე იწყება და 16 საათამდე გრძელდება. გახანგრძლივებულ ჯგუფში კი მხოლოდ მოსამსახურეების შვილები ირიცხებიან. აღნიშნულ ფაქტს უარყოფითად აფასებენ დიასახლისები და ითხოვენ, რომ ამ ჯგუფში მათი შვილებიც მიიღონ. გახანგრძლივებულში აღსაზრდელის ჩასარიცხად საჭიროა, დედამ სამსახურიდან მუშაობის დამადასტურებელი ცნობა წარადგინოს. 31 წლის ანას ორი მცირეწლოვანი ბავშვი ქალაქ გურჯაანის ერთ-ერთ ბაღში დაჰყავს. ის არმუშაობს და შესაბამისად, ვერც ცნობას მიიტანს, ამიტომ გახანგრძლივებულით მისი შვილები ვერ სარგებლობენ. როგორც მან ჩვენთან საუბარში აღნიშნა, საოჯახო საქმეების მოგვარებას 4 საათამდე ვერ ასწრებს და სურვილი აქვს გახანგრძლივებულ ჯგუფშიც დატოვოს. "სახლში ყოველდღე ძალიან ბევრი საქმე მაქვს. მშველელიც არავინ მყავს, მე და ჩემი მეუღლე ცალკე ვცხოვრობთ. ბაღში სწავლა ოთხ საათზე მთავრდება და ბავშვები შინ მომყავს.ამ რამდენიმე საათის განმავლობაში ვერაფერს ვასწრებ და ბევრი რამ გასაკეთებელი მრჩება. რატომ არ შეიძლება რომ გახანგრძლივებულ ჯგუფში დიასახლისების შვილებიც მიიღონ?" -კითხულობს ის. გურჯაანის მუნიციპალიტეტის სკოლამდელი სააღმზრდელო დაწესებულებების უფროსი ლელა თევდორაშვილის განმარტებით, ამ ეტაპზე ბაღებში ბავშვთა რაოდენობის განსაზღვრა მიმდინარეობს, რის შემდეგაც საკითხი გადაიჭრება. -"ჯერჯერობით გახანგრძლივებულ ჯგუფში ის ბავშვები ირიცხებიან, რომელთა მშობლებიც მუშაობენ. თუმცა ამ ყველაფერს დავაკვირდებით და გადაწყვეტილებას კონტიგენტის გაზრდასთან დაკავშირებით ოქტომბრის შუა რიცხვებიდან მივიღებთ. რა დააშავეს იმ მშობლებმა, რომლებიც სახელმწიფო სამსახურებში არ მუშაობენ, მაგრამ სასოფლო-სამეურნეო საქმიანობით არიან დაკავებულები ან ოჯახში აქვთ საქმე?! მე და ჩემი თანამშრომლები 16 სექტემბრიდან პირველ ოქტომბრამდე ყოველდღიურ მონაცემებს ვიღებთ, რომელ ბაღში რამდენი ბავშვი გამოცხადდა. მთავრობის განკარგულებით 68 000 ლარი დაგვემატა კვებაზე, რაც 1400 ბავშვზეა გათვლილი. მინდა გითხრათ, რომ ბოლო მაჩვენებლით 1750 ბავშვია ბაღში. ანუ ყველა შემთხვევაში ბიუჯეტში ცვლილებები უნდა შევიდეს, რადგან კვების თანხის გაზრდა მოგვიწევს და გახანგრძლივებულთან დაკავშირებითაც მივიღებთ გადაწყვეტილებას,"-გვითხრა მან. გასულ კვირას, საკრებულოს სესიაზე თავმჯდომარის მოადგილე ალექსანდრე სირბილაშვილმა, სკოლამდელი სააღმზრდელო დაწესებულებების სტრატეგიული განვითარების პროექტი წარადგინა. აღნიშნული გეგმა 2013-2017 სასწავლო წლებზეა გაწერილი და ეტაპობრივ განვითარებას გულისხმობს. "სტრატეგიული გეგმის თანახმად, თითქმის ყველა ბაღს საფუძვლიანი სარემონტო სამუშაოები ჩაუტარდება.Gგარდა იმ ბაღებისა, რომლებიც "სოფლის მხარდაჭერის პროგრამის" ფარგლებში შეკეთდა. პირველი ნაბიჯები უკვე იდგმება. გარკვეულ მიმართულებაზე შევჯერდით. ამ პროცესში განათლების სამინისტროც არის ჩართული. გადაიჭრება კვებისა და უსაფრთხოების საკითხი,"-აღნიშნა საკრებულოს სოციალურ საკითხთა კომისიის თავმჯდომარე გია ენუქიძემ. შეგახსენებთ, რომ 25 აგვისტოს თვითმმართველობის კანონში შესული ცვლილებების შედეგად მშობლები ყოველთვიური გადასახადისგან გათავისუფლდნენ.