არასწორად გადანაწილებული დახმარება და სახელმძღვანელოების გარეშე დარჩენილი მოსწავლეები

16:42 / 30.09.2010

[caption id="attachment_630" align="alignleft" width="300" caption="სახელმძღვანელოების სიძვირის გამო, მშობლებს მათი შეძენა უჭირთ"][/caption] ლალი მეხრიშვილი

წელს სახელმძღვანელოები განსაკუთრებით გაძვირებულია, რაც კიდევ უფრო მძიმედ აისახება მოსწავლეთა ოჯახების ეკონომიკურ მდგომარეობაზე. პრობლემას წარმოადგენს ისიც, რომ სხვა წლებთან შედარებით წელს თითქმის ყველა საგანი შეცვლილი პროგრამითაა წარმოდგენილი. ამიტომ, თუ ადრე მოსწავლე ზოგიერთ საგანში წინა წლის სახელმძღვანელოს თხოულობდა ან შეღავათიან ფასში ყიდულობდა, ახლა ესეც ნაკლებ ხელმისაწვდომია.

უკვე ორი კვირაა საქართველოს საჯარო სკოლებში ახალი სასწავლო წელი დაიწყო. `სპექტრი~ დაინტერესდა, ფასების მომატების ფონზე, როგორია სწავლების რეალური შესაძლებლობა, უზრუნველყოფილი არიან თუ არა მოსწავლეები სახელმძღვანელოებით?

ოცი გამოკითხული მოსწავლიდან თხუთმეტმა გვიპასუხა, რომ 2 ან 3 წიგნი აკლია, სამმა გვიპასუხა, რომ არც ერთი წიგნი არ აქვს და დახმარებას ელოდება, მხოლოდ ორს აღმოაჩნდა სახელმძღვანელოების სრული კომპლექტი. ოცივე გამოკითხული ამტკიცებს, რომ არც ერთი წიგნის კრიზისი არ არის და ყველა მათგანი იშოვება, თუმცა საკმაოდ ძვირია. მშობლების თქმით, იმის გამო, რომ კლასში უმრავლესობას წიგნები სრულად არ აქვს, სწავლების პროცესი ვერ დაწყებულა.

ერთ-ერთი უფროსკლასელი, რომელიც ვინაობას არ ასახელებს, "სპექტრთან" საუბარში ამბობს, რომ მიმდინარე ორი კვირა იმდენად ქაოსური იყო, რომ სწავლების პროცესი, ფაქტობრივად ჩავარდა.

დედოფლისწყაროში ჯიხურებსა და საკანცელარიო მაღაზიებში მშობელთა რიგები ორი კვირის განმავლობაში არ წყდებოდა.

"ჩემი გოგონა მერვე კლასის მოსწავლეა, ამჯერად ოთხი წიგნის შეძენა შევძელი და 42 ლარი გადავიხადე. სამი კიდევ სჭირდება, თუმცა ჯერ ამის საშუალება არ მაქვს. ყველაფერს ვიღონებ, რომ შვილს სწავლაში ხელი არ შევუშალო და ყველა სახელმძღვანელო ვუყიდო," _ ამბობს ოთარ ხუცელიძე.

სახელმძღვანელოების სიძვირესთან ერთად მშობლებს ისიც ადარდებთ, რომ სასწავლო პროცესი შეფერხებით მიმდინარეობს და ეს პრობლემა ჯერ კიდევ დიდ ხანს ვერ მოგვარდება.

"ორი შვილი მყავს და სახელმძღვანელოებში უკვე 150 ლარი დავხარჯე, თუმცა ჯერ სრულად არ შეგვიძენია. წიგნში ფული არასოდეს მენანება, მაგრამ საშუალო შეძლების ოჯახისთვის ამდენი თანხის გაღება მაინც ძნელია, ცეცხლის ფასები აქვს. პირადად მე იმაზე უფრო ვდარდობ, რომ ორი კვირაა სასწავლო წელი დაიწყო და ბავშვები ტყუილად დადიან. კლასში ზოგიერთს ერთი წიგნიც არ აქვს და აქედან გამომდინარე, მასწავლებელიც დავალებას ვერ აძლევთ," _ ამბობს მაია ლეკაშვილი.

კიდევ უფრო რთულ მდგომარეობაში არიან სამშვილიანი ოჯახები, რომლებიც სოციალურად დაუცველთა რიგებში არ არიან (იმ ბავშვებს, რომელთა ოჯახებიც სახელმწიფო პროგრამაში არიან ჩართულები და 57 ათასი და უფრო ნაკლები ქულა აქვთ მინიჭებული, სახელმწიფო უფასოდ აძლევთ სახელმძღვანელოებს) და არც იმდენი შემოსავალი გააჩნიათ, რომ ბავშვებს ყველა წიგნი უყიდონ. "სამი შვილის დედა ვარ, ყველაზე პატარა მეორე კლასშია და მხოლოდ ამ კლასის მათემატიკის სახელმძღვანელოსა და დედაენაში 38 ლარი გადავიხადე. ამის გარდა, მათემატიკაში 4 სავარჯიშო რვეული სჭირდება, რომლებიც არც თუ ისე იაფი ღირს. ძალიან მიჭირს, მაგრამ რა ვქნა, ბავშვს უწიგნოდ ხომ ვერ დავტოვებ? ვფიქრობ, დახმარება არასწორადაა გათვლილი, მთავრობას სამ და მეტ შვილიან ოჯახებზეც უნდა გაეკეთებინა შეღავათი. შესაძლოა, სამშვილიან ოჯახებს, რომლებსაც სოციალურმა სააგენტომ მაღალი ქულები მოგვანიჭა, იმათზე მეტად გვიჭირდეს, ვინც ამ პროგრამაშია ჩართული და ერთი შვილი ჰყავს. ასეთი უსამართლო გადაწყვეტილებით და უყურადღებობით დედას შვილის გაჩენის სურვილს უკარგავენ. თანაც ყველამ ვიცით, რომ ხშირად სოციალური სააგენტოს შეფასებები რეალობას სცდება. ისეთები იღებენ დაბალ ქულებს, ვისაც არ ეკუთვნის, გაჭირვებულები კი დახმარების გარეშე რჩებიან," _ ამბობს ციალა იაკობიშვილი.

საქართველოს განათლებისა და მეცნიერების სამინისტროს დედოფლისწყაროს საგანმანათლებლო რესურსცენტრის ინფორმაციით წელს დედოფლისწყაროში წიგნების სრული კომპლექტი 647-მა ბავშვმა მიიღო. იმ მოსწავლეებს კი, რომელთა ოჯახებსაც 70 ათასზე ნაკლები ქულა აქვს, ზოგიერთი სკოლა თავისი სურვილისა და შესაძლებლობის მიხედვით ეხმარება.

დედოფლისწყაროს პირველი საჯარო სკოლის დირექტორის მაია ლაპიაშვილის თქმით, მათთან 625 ბავშვი ირიცხება, აქედან 135-მა სასწავლო წიგნები სახელმწიფო დახმარებით მიიღო. თუმცა სკოლამ შეიმუშავა გეგმა სხვა გაჭირვებული ბავშვებისთვისაც. "ჩვენ გასულ წელსაც განვახორციელეთ ასეთი სახის აქცია, თითოეულ კლასში სამ ისეთ მოსწავლეს დავეხმარეთ, რომელიც მრავალშვილიანი ან ეკონომიურად გაჭირვებული ოჯახიდანაა და სოციალური სააგენტოსგან 57 ათასზე მეტი და 70 ათასზე ნაკლები ქულა აქვს მინიჭებული. ამ სასწავლო წელსაც ასე იქნება," _ აღნიშნა `სპექტრთან~ საუბარში პირველი მაია ლაპიაშვილმა.

ახალი სასწავლო წელი ზოგისთვის თუ პრობლემებთან ასოცირდება, ზოგისთვის ფულის შოვნისთვის აქტიური პერიოდია. საქართველოს განათლებისა და მეცნიერების მინისტრმა დიმიტრი შაშკინმა საჯაროდ გამოაცხადა, რომ მშობელმა წიგნში მხოლოდ ის თანხა უნდა გადაიხადოს, რაც მასზეა მითითებული. მკარცი გაფრთხილების მიუხედავად, ზოგიერთი სავაჭრო პუნქტი ამ ბრძანებას არ ასრულებს. მშობელი, რომელმაც წიგნები ბოდბისხევში შეიძინა ამბობს: "ჩემს ორ შვილს ამ ეტაპისთვის 5 წიგნი შევუძინე და 64 ლარი გადავიხადე. მართალია, წიგნებს 7 და 8 ლარი ეწერა, მაგრამ თითოეული 14-15 ლარი გამომივიდა. თუმცა, ამას აღარ დაგიდევდით, რადგან რიგში ისედაც დიდი ხანი ვიდექი. იმასაც კი შევესწარი, ერთ-ერთ მშობელს მომსახურებისათვის 2 ლარი რომ მოსთხოვეს," _ ამბობს ნინო პაპუაშვილი.

საზოგადოების აზრით, სწავლაში გადახდილი ფული მართლაც რომ გონივრული ინვესტიციაა, მაგრამ ეს თანდათან უკვე `ძვირი სიამოვნება გახდა~. ისინი შიშობენ, რომ შესაძლოა, მალე საშუალო განათლებაც მხოლოდ შეძლებული ოჯახებისთვის იყოს ხელმისაწვდომი.

| Print | E-mail