უკვე რამდენიმე წელია კახეთის რეგიონში წარმატებული მოსწავლეების დაჯილდოება ტრადიციად იქცა. წელს 15 ივნისს ყვარელში გამართულ ღონისძიებაზე გურჯაანის რაიონიდან სულ 30 მედალოსანი იყო წარდგენილი. -"კახეთის რეგიონის ბავშვებთან ერთად ჩვენი რაიონიდან 30 მედალოსანი (13 ოქრო, 17 ვერცხლი) იყო წარდგენილი. დაჯილდოვდნენ: ქალაქ გურჯაანის, ვაჩნაძიანის, ვაზისუბნის, ველისციხის, ახაშნის, სოფელ გურჯაანის, ჭანდრის, ბაკურციხის, კარდენახის, მელაანის, კაჭრეთის, ჯიმითის და ზემო კაჭრეთის სკოლის წარმატებული მოსწავლეები. გურჯაანის მუნიციპალიტეტის გამგებლის და რესურსცენტრის უფროსის მიერ ხელმოწერილი სიგელები ბავშვებს გურჯაანის გამგებლის მოადგილე ზურა დანელიშვილმა გადასცა," _ გვითხრა რესურსცენტრის ფინანსისტმა მერი მირველაშვილმა. როგორც ზურა დანელიშვილმა აღნიშნა, წარმატებული მოსწავლეების დაჯილდოების ტრადიცია უკვე წლებია არსებობს და სავარაუდოდ, მომავალშიც გაგრძელდება. -"ასეთი ღონისძიებები წინა წლებშიც ტარდებოდა. ახალგაზრდები სკოლას წარჩინებით ამთავრებენ, უხარიათ და უნდათ თავიანთი სიხარული სხვებსაც გაუზიარონ. მათ ჩვენ საზეიმო ვითარებაში გადავეცით სიგელები, ხოლო ერთ-ერთი მათგანი წარმატებული სწავლისთვის, ციფრული ფოტოაპარატითაც დავასაჩუქრეთ. ღონისძიებას ასევე ესწრებოდნენ საინიციატივო ჯგუფის ბავშვებიც, რომელთა ტრანსპორტირებაც წახალისების მიზნით ჩვენ უზრუნველყავით. გამგეობიდან კულტურის განყოფილების წარმომადგენლებიც იყვნენ. ნამდვილად კარგი ღონისძიება იყო. საღამო კონცერტით დამთავრდა. ეს ტრადიცია ალბათ მომავალშიც გაგრძელდება," _ გვითხრა მან. როგორც ჩვენთან საუბარში გურჯაანის #4 საჯარო სკოლის მოსწავლემ, ვერცხლის მედალოსანმა რუსუდან ჯოხაძემ აღნიშნა, ეს დღე ძალიან კარგად დაამახსოვრდება. -"ყვარელში, გალავანში დაჯილდოებაზე სხვადასხვა რაიონის ბავშვებთან ერთად გიმნაზიის მოსწავლეებიც ვიყავით. ჩვენ სკოლაში სულ 7 მედალოსანია. მივიღეთ სამახსოვრო სიგელები, სექტემბერში კი მედლებს გადმოგვცემენ. დაჯილდოების ცერემონია გრანდიოზული კონცერტით დასრულდა, რომელშიც ქართული ესტრადის ვარსკვლევები მონაწილეობდნენ. იყო ბევრი ემოცია და ძალიან კმაყოფილი ვარ," _ გვითხრა მან. იმ ფაქტმა, რომ გურჯაანის მუნიციპალიტეტის 13 ოქროს მედალოსნიდან, განსკუთრებული საჩუქრით (ციფრული ფოტოაპარატით) მხოლოდ ერთი, ბაკურციხის საჯარო სკოლის მოსწავლე ცისია ბაწაშვილი დაჯილდოვდა, სხვა ბავშვებში გარკვეულწილად უკმაყოფილება გამოიწვია. მისი გამორჩეულად დასაჩუქრების მიზეზებზე, გურჯაანის მუნიციპალიტეტის საკრებულოს თავმჯდომარე ავთანდილ ზარდიაშვილმა ისაუბრა და განმარტა, რომ ცისია ბაწაშვილი, რესპუბლიკური ტურების გამარჯვებულია. საქართველოში ასეთი სულ სამი მოსწავლეა. მისივე თქმით, გურჯაანის მუნიციპალიტეტის გამგეობამ ამ ბავშვის გამორჩეულად დაჯილდოების გადაწყვეტილება სწორედ აღნიშნული გარემოების გათვალისწინებით მიიღო. მარინა პეტრიაშვილი [caption id="attachment_6088" align="aligncenter" width="610"] გურჯაანის მუნიციპალიტეტის სკოლებიდან 13 ოქროს და 17 ვერცხლის მედალოსანი მოსწავლე იყო წარდგენილი[/caption] [caption id="attachment_6090" align="aligncenter" width="610"] დაჯილდოების შემდეგ ქართული ესტრადის ვარსკვლავების მონაწილეობით კონცერტი გაიმართა[/caption] მსგავსი თემები: წარმატებული მოსწავლეების დაჯილდოება წარმატებული პედაგოგების და მოსწავლეების დაჯილდოება