საქართველოს განათლებისა და მეცნიერების სამინიტროს გადაწყვეტილებით, 2013-2014 სასწავლო წლისთვის საჯარო სკოლების მოსწავლეები სასკოლო სახელმძღვანელოებს უფასოდ მიიღებენ. ის გამომცემლობები კი, რომლებიც აღნიშნულ პროცესში არ მონაწილეობენ სამინისტროს საავტორო უფლებების მითვისებასი ადანაშაულებენ. სასკოლო წიგნების ბეჭდვას „გაერთიანებული ქართული სტამბა ფავორიტი პრინტი და მვპ“ უზრუნველყოფს. აღნიშნული გამომცემლობა ოთხი ქართული პოლიგრაფიული საწარმოს: შპს "ფავორიტი პრინტი", შპს "ფორმა", შპს "სეზანი", შპს "მვპ" (24 საათის სტამბა) და მასთან არსებული მცირე პოლიგრაფიული წარმოებების გაერთიანებით შეიქმნა. განათლების სამინისტროს ინფორმაციით, პროექტის ფარგლებში საქართველოს 1600 მოქალაქეა დასაქმებული. მათივე ცნობით, ამ დროისთვის მილიონნახევარი სასკოლო სახელმძღვანელო უკვე დაბეჭდილია. სკოლებისთვის წიგნების გადაცემა 15 ივნისიდან ეტაპობრივად განხორციელდება. რამდენიმე დღის წინ კი ცნობილი გახდა, რომ გამომცემლობები, რომლებიც წელს სასწავლო სახელმძღვანელოების ბეჭდვაში ჩართული არ არიან, საქართველოს განათლებისა და მეცნიერების მინისტრის წინააღმდეგ საკონსტიტუცო სასამართლოს საჩივრით მიმართავენ. -"2013 წლის 8 აპრილს საქართველოს განათლებისა და მეცნიერების მინისტრმა გააჟღერა ინიციატივა სკოლის მოსწავლეთათვის სახელმძღვანელოების უფასოდ გადაცემის შესახებ. სარჩელზე ხელმომწერი გამომცემლები აღნიშნული ინიციატივის მიმართ კიდევ ერთხელ გამოვხატავთ დადებით დამოკიდებულებას, თუმცა ამავდროულად მივიჩნევთ, რომ ის არ უნდა განხორციელდეს ჩვენი უფლებების დარღვევის ხარჯზე. საქართველოს განათლებისა და მეცნიერების მინისტრის მიერ 2010 წლის 25 თებერვალს გამოცემული ბრძანებით დამტკიცდა ზოგადსაგანმანათლებლო დაწესებულების სახელმძღვანელოს გრიფის მინიჭების წესი. აღნიშნული წესის თანახმად, გამომცემლებს დაეკისრათ ვალდებულება წინასწარ განეცხადებინათ თანხმობა მათ მიერ შექმნილი სახელმძღვანელოს საავტორო უფლებების სამინისტროსთვის გადაცემის შესახებ, ხოლო სახელმძღვანელოსთვის გრიფის მინიჭების შემდეგ საავტორო უფლება ხელშეკრულებით გადაეცათ სამინისტროსთვის. ამავე ბრძანებით, სამინისტროს მინიჭებული აქვს შესაძლებლობა აუცილებელი საზოგადოებრივი საჭიროებიდან გამომდინარე, საავტორო უფლების გამოყენების უფლება გადასცეს ნებისმიერ დაინტერესებულ პირს. აღნიშნული ბრძანებით სამინისტრომ გამომცემლებს შეუზღუდა საკუთრების უფლება (თავისუფლად განკარგონ საკუთრება) და ფაქტობრივად უსასყიდლოდ მიითვისა მათი საავტორო უფლებები," (სტილი დაცულია) _ ნათქვამია გამომცემლობების მიერ გავრცელებულ მიმართვაში. ხელმომწერი გამომცემლები საქართველოს საკონსტიტუციო სასამართლოს მიმართავენ მოთხოვნით, არაკონსტიტუციურად ცნონ ხსენებული ბრძანების მე-6 მუხლის პირველი პუნქტის თ.ა) და თ.ბ) ქვეპუნქტები, მე-10 მუხლის ბ) ქვეპუნქტი და მე-11 მუხლის მე-2 პუნქტის ბ) და გ) ქვეპუნქტები. მათ ინტერესებს საკონსტიტუციო სასამართლოში საქმის არსებითი განხილვისას საქართველოს დემოკრატიული ინიციატივა დაიცავს. მოთხოვნას ხელს აწერენ: შპს "გამომცემლობა ინტელექტი," შპს "გამომცემლობა არტანუჯი,"შპს გამომცემლობა "დიოგენე," შპს "ლოგოს პრესი," შპს „ბაკურ სულაკაურის გამომცემლობა,“ შპს „ტრიასი,“ ფიზიკური პირი - ირინა რუხაძე. გამომცემლობების წარმომადგენლები აღნიშნავენ, რომ არაქართულენოვანი სკოლების სახელმძღვანელოებთან დაკავშირებით ხელშეკრულებაში წერია, რომ გამომცემლობებს შეუძლიათ თარგმნა. მათივე თქმით, სამინისტროს იმ სასწავლო მასალებს არ მისცემენ, რომლითაც ეთნიკური უმცირესობების სახელმძღვანელოები უნდა შედგეს ამიტომ შესაძლოა ეთნიკური უმცირესობების სკოლის მოსწავლეებმა სასწავლო წიგნები უფასოდ ვერ მიიღონ. საგარეჯოს მუნიციპალიტეტის ეთნიკური აზერბაიჯანელებით დასახლებულ სოფელ დუზაგრამის საჯარო სკოლის პედაგოგი მუსლიმ აბუზაროვი ამბობს, რომ მშობლებს სახელმძღვანელოების შეძენა გაუჭირდებათ. -"ალიან რთული სოციალური მდგომარეობაა. თითო ოჯახიდან ოთხი_ხუთი ბავშვი დადის სკოლაში, ამიტომ მშობლებს წიგნების ყიდვა არ შეუძლიათ. გასულ წლებში მოსწავლეების ნაწილს სახელმძღვანელოები არ ჰქონდა. ჯერ კიდევ იმედი გვაქვს, რომ წელს ასე არ იქნება და ქართველი მოსწავლეების მსგავსად ჩვენი ბავშვებიც უფასოდ მიიღებენ წიგნებს. აღსანიშნავია, ისიც, რომ შარშან არც ბიოლოგიის, ფიზიკის და ქიიმის წიგნები გვქონდა, მზად არ იყო. თუ  წელსაც არ დაიბეჭდა, იძულებულები ვიქნებით ძველი გამოცემებით ვასწავლოთ. ასეთ პირობებში კი სათანადო ცოდნის მიღება შეუძლებელია."_გვითხრა მუსლიმ აბუზაროვმა. როგორც განათლებისა და მეცნიერების მინისტრმა გიორგი მარგველაშვილმა ჟურნალისტებთან განცხადა, აღნიშნულ საკითხზე მუშაობა მიმდინარეობს და პრობლემა უახლოეს მომავალში მოგვარდება. ლანა გულოშვილი მსგავსი სტატიები რატომ გახდა კრიტიკის საგანი უფასო სახელმძღვანელოები? არასწორად გადანაწილებული დახმარება და სახელმძღვანელოების გარეშე დარჩენილი მოსწავლეები ხელისუფლების “ეშმაკურ ხერხს” მშობლები იძულებით ემორჩილებიან