უგულოდ გასწორებული თუ ობიექტურად შეფასებული სასერტიფიკაციო გამოცდები

17:33 / 09.09.2010

[caption id="attachment_509" align="alignleft" width="300" caption=" პედაგოგთა სასერტიფიკაციო გამოცდების შედეგები სააპელაციო წესით კახეთის რეგიონში 123-მა პედაგოგმა გაასაჩივრა"][/caption] ინგა ბიტარაშვილი

განათლებისა და მეცნიერების სამინისტროს გადაწყვეტილებით, წელს პედაგოგების სერტიფიცირება დაიწყო. ამ ეტაპზე ტესტირება ნებაყოფლობითი იყო, მომავალი წლიდან კი სავარაუდოდ სავალდებულო გახდება. გამოცდები, რომელიც 13-დან 23 ივლისის ჩათვლით მიმდინარეობდა, საქართველოში სულ 10 ათასზე მეტმა პედაგოგმა ჩააბარა, თუმცა სერტიფიკატი მხოლოდ 1147-ს მიენიჭა.

სასერტიფიკაციო გამოცდების შედეგები უკვე ცნობილია, თუმცა გურჯაანში არსებული მდგომარეობის შესახებ ოფიციალური სტატისტიკა საგანმანათლებლო რესურსცენტრს ჯერჯერობით არ გააჩნია. "მასწავლებელთა სერტიფიკაციის ზუსტი შედეგები არ გვაქვს, თუმცა ვიცი, რომ გურჯაანში 159-დან დაახლოებით 10-მდე პედაგოგი აიღებს სერტიფიკატს, რადგან ბარიერი ორივე საგანში (პროფესიული უნარები და საგნობრივი) გადალახეს. არიან პედაგოგები, რომლებსაც 1-ან 2 ქულა დააკლდათ, მათ აქვთ აპელაციაზე შეტანილი საბუთები და, შესაძლოა, ქულები მოუმატონ," _ გვითხრა რესურსცენტრის უფროსმა ლალი გაბიტაშვილმა.

სასერტიფიკაციო გამოცდებმა პედაგოგთა შორის აზრთა სხვადასხვაობა გამოიწვია. გურჯაანის #2 საჯარო სკოლის ინგლისური ენის მასწავლებელი თამარ კალაძე "სპექტრთან" საუბარში განმარტავს, რომ ტესტები საშუალო სირთულის იყო და სიღრმისეულ ცოდნას მოითხოვდა. "ორივე გამოცდა წარმატებით ჩავაბარე. ძალიან დამეხმარა ტრენინგები, რომელიც წინასაგამოცდოდ ჩაგვიტარდა. მინდა შემთხვევით ვისარგებლო და ყველას, ვინც დამეხმარა, ძალიან დიდი მადლობა გადავუხადო. ტრენინგების გარდა სახლში ჩემს თავზე ძალიან ბევრს ვმუშაობდი და შედეგით კმაყოფილი ვარ. ამის შემდეგ გაკვეთილის ჩასატარებლად უფრო თავდაჯერებული შევალ. ჩემი აზრით, გამოცდების ჩატარება სამინისტროს მხრიდან არაჩვეულებრივი გადაწყვეტილება იყო, რადგან პედაგოგი მუდმივად უნდა განიცდიდეს წინსვლას. გული იმაზე მწყდება, რომ მასწავლებელთა მხოლოდ 11%-მა მოახერხა ბარიერის გადალახვა, მინდა ყველა მასწავლებელს წინსვლა და წარმატება ვუსურვო. რაც შეეხება შეფასებას, ამ საკითხთან მიმართებაში მინდა ობიექტური ვიყო. ვთვლი, რომ ნაწერი ადეკვატურად შემიფასეს," _ აღნიშნავს თამარ კალაძე.

აღნიშნულთან დაკავშირებით საპირისპირო მოსაზრება აქვს ქ. გურჯაანის სოფელ კარდენახის საჯარო სკოლის მუსიკის პედაგოგს ნინო კორკოტაშვილს, რომელმაც ჯერ მხოლოდ პროფესიული უნარების გამოცდებში მიიღო მონაწილეობა. მისი თქმით, გამსწორებლებმა 2 ქულა დააკლეს, რის გამოც საჩივარი უკვე შეტანილი აქვს. ამბობს, რომ თუ ქულას არ მოუმატებენ, სასამართლოშიც იჩივლებს. "ნაწერი ზერელედ, უგულოდ არის გასწორებული. დავალებები ძალიან რთული იყო, გარდა ამისა, გამოცდების ჩაბარება საშინელ სიცხეში მოგვიხდა (გამოცდები სიღნაღში ჩატარდა). მინდა აღვნიშნო, რომ სკოლებში გადამზადებისთვის წიგნების მხოლოდ თითო ეგზემპლარი მოდიოდა, რაც, რა თქმა უნდა, არასაკმარისი იყო, ამიტომ თვითონ მომიწია რამდენიმე სახელმძღვანელოს ყიდვა. ტრენინგებზე ძირითადად ფსიქოლოგების ბიოგრაფიებს და მათ მოსაზრებებს განვიხილავდით. ტესტები კი წიგნებში იყო გაბნეული. თავად სინდიკატის ძალიან კმაყოფილი ვარ, ასე ვთქვათ გონება გაგვიხსნა," _ ამბობს ნინო კორკოტაშვილი.

მისივე განმარტებით, გურჯაანის მუნიციპალიტეტში მის გარდა მუსიკის სხვა პედაგოგი გამოცდებზე არ გასულა. ეს სოფელ კარდენახის სკოლას უნდა გაეთვალისიწინებინა და საათების განაწილების პროცედურაზე გავლენა მოეხდინა. "ორი დიპლომი და ორმაგი კვალიფიკაცია მაქვს, ამის მიუხედევად საჯარო სკოლაში მხოლოდ 5 საათი მომცეს. მინდა აღვნიშნო, რომ საჯარო სკოლებში უმაღლესდამთავრებული მუსიკის სპეციალისტი საერთოდ არ ჰყავთ. გამოცდებზე იმიტომ გავედი, რომ ჩემს კვალიფიკაციისთვის კიდევ ერთი საფეხური მიმემატებინა, თუმცა ამის საჭიროება არ მქონდა. მეგონა ჩემთვის კარი გაიღებოდა და მეტყოდნენ ჯერ შენ დაკმაყოფილდი საათებით და მერე სხვა, მაგრამ პირიქით მოხდა" _ აღნიშნავს `სპექტრთან~ საუბარში ნინო კორკოტაშვილი და აქვე დასძენს, რომ საათების განაწილების პრობლემა უკვე წლებია გრძელდება.

შეგახსენებთ, რომ კახეთის საინფორმციო ცენტრის ინფორმაციით, პედაგოგთა სასერტიფიკაციო გამოცდების შედეგები სააპელაციო წესით კახეთის რეგიონში 123-მა პედაგოგმა გაასაჩივრა.

| Print | E-mail