ლანა გულოშვილი

სამოქალაქო განათლებისა და პედაგოგების გადამზადების პროექტის ფარგლებში, 20 აპრილს გურჯაანის მუნიციპალიტეტის საჯარო სკოლის უფროსკლასელები ქალაქის სასამართლოს, პორკურატურას და პოლიციას სტუმრობდნენ. პროექტს ახორციელებს ფონდი "ჰარმონია" მეცნიერებისა და განათლების სამინისტროს მხარდაჭერით. მოსწავლეებმა პროკურატურის პროკურორებთან თინათინ ზუბიაშვილსა და ანრი არსენიშვილთან ერთად სამართლებრივ საკითხებზე ისაუბრეს.

ბავშვებმა მათ გარკვეულ დანაშაულებრივ ქმედებებთან დაკავშირებით კითხვები დაუსვეს, რის შემდეგაც პროკურატურისა და სასამართლოს საპროცედურო ოთახები დაათვალიერეს. დასასრულს მოსწავლეები გურჯაანის შსს სამმართველოში იმყოფებოდნენ, პოლიციელთა საქმიანობას გაეცნენ და გურჯაანის რაიონული სამმართველოს უფროსის მოადგილე გოჩა სიბაშვილთან ერთად პოლიციის შენობა დაათვალიერეს. პროექტის კოორდინირებას ახდენდა არასამთავრობო ორგანიზაცია თელავის განათლების, განვითარების და დასაქმების ცენტრი. როგორც მისმა კოორდინატორმა ქრისტინე მჭედლიშვილმა ჩვენთან საუბარში აღნიშნა, ასეთი შეხვედრები ახალგაზრდებსა და საჯარო მოხელეებს შორის ურთიერთობების გაღრმავებასა და თანამშრომლობას ისახავს მიზნად. ამ გზით, ისინი ცდილობენ ბავშვებს არ ჰქონდეთ გაუცხოების შეგრძნება და სამოქლაქო საქმიანობაში აქტიურად იყვნენ ჩართულები. "ასეთი ღონისძიებების დანიშნულებაა ჩვენი პარტნიორი სკოლების სტუმრობა სხვადასხვა საჯარო სამსახურებში. დღევანდელი ვიზიტიც ემსახურებოდა იმას, რომ მოსწავლეები შეხვედროდნენ რაიონის პროკურორს და ახლოს გაცნობოდნენ მის საქმიანობას. იმედია, ეს მათთვის საინტერესო იყო. ასეთი პროექტებით ხელს ვუწყობთ მოსწავლეებსა და სხვადასხვა თანამდებობის პირებს შორის ბარიერის აღმოფხვრას."

პროკურატურის პროკურორმა თინათინ ზუბიაშვილმა აღნიშნა, რომ ასეთი ღონისძიებები ძალიან სასიამოვნო და ამავე დროს აუცილებელია. "დღევანდელი შეხვედრის მიზანი იყო მოსწავლეები ახლოს გაცნობოდნენ რაიონის პროკურატურასა და სასამართლოს საქმიანობას. ასევე გაეანალიზებინათ რა არის დანაშაული და რა აღმკვეთი ღონისძიება უნდა გატარდეს სამართლებრივად ასეთი დანაშაულების აღმოსაფხვრელად. კარგია, რომ ეს ყველაფერი მოხდა თელავის განათლებისა და დასაქმების ცენტრის კოორდინირებით. ჩვენ მომავალშიც აქტიურად ვითანამშრომლებთ."

გურჯაანის #2 საჯარო სკოლის მოსწავლის გიორგი მამულაშვილის თქმით, პროექტის ფარგლებში ბევრი ახალი ინფორმაცია მიიღო. "დავსვით კითხვები, რომელზეც მივიღეთ საინტერესო პასუხები. ვთვლი, რომ ეს დღე ჩვენთვის ნაყოფიერი იყო." მოსწავლეები იმედს გამოთქვამენ, რომ მსგავსი ღონისძიებები მომავალშიც ჩატარდება, რაშიც აქტიურად ჩაერთვებიან.