ლანა გულოშვილი 10 და 11 მარტს, ქალაქ გურჯაანის მუნიციპალიტეტის გამგეობის შენობაში `საქართველოს უნივერსიტეტის~ სტუდენტებმა უფროსკლასელთათვის ტრენინგები ჩაატარეს თემაზე _ `პროექტის მენეჯმენტი~. ერთმანეთს გაცნობის და პრეზენტაციის შემდეგ ბავშვები საერთო ინტერესების მიხედვით ჯგუფებად გადანაწილდნენ და იმ პრობლემური თემების განხილვა დაიწყეს, რომლის მოგვარებაც სურთ. ე.წ. საინიციატივო გაერთიანებებმა მათთვის მნიშვნელოვანი მთავარი საკითხები აირჩიეს, რის შესახებაც ტრენერების დავალებით პროექტი უნდა შეედგინათ. ჯანსაღი ცხოვრების წესი, გარემოს დაცვა, არაფორმალური განათლება და ქალაქში კულტურული ღონისძიებების ნაკლებობა, _ ეს ის თემებია, რომლებზეც მოსწავლეებმა ტრენერებთან ერთად იმსჯელეს და განიხილეს, რათა შემდეგ უკვე კონკრეტულად პროექტის წერა შეესწავლათ. გიორგი ყანჩაველი, `საქართველოს უნივერსიტეტის~ სტუდენტი, ტრენერი: "ტრენინგი ტარდება პროექტის მენეჯმენტის თემაზე. მონაწილეები გურჯაანის საჯარო სკოლების მე-11, მე-12 კლასელები არიან. უნივერსიტეტმა ეს შემოთავაზება `ჯუნიორ ეჩივემენტის~ პროექტის ჩატარების შემდეგ მიიღო, სადაც ჩვენი წარმომადგენელიც იმყოფებოდა. დღევანდელი ტრენინგიც ახალგაზრდების სურვილის მიხედვით დაიგეგმა. მოსწავლეები გაიგებენ თუ რა მთავარი მეთოდები უნდა გამოიყენონ პროექტის წერისას. თავის მხრივ, ამ ღონისძიების მიზანია აგრეთვე `საქართველოს უნივერსიტეტის~ პოპულარიზაცია. როგორც ახალგაზრდებს სჭირდებათ `საქართველოს უნივერსიტეტის~ გვერდში დგომა, ასევე ჩვენ გვჭირდება მათთან ურთიერთობა, თანამშრომლობა.~ როგორც ტრენინგის მონაწილეები ამბობენ, მათ არამარტო ცოდნა მიიღეს, არამედ მეგობრებიც შეიძინეს. `ჩემთვის ეს არის ნაყოფიერი, ბევრის მომცემი ტრენინგი, რადგან ვსწავლობ პროექტის წერას და ხალხთან კომუნიკაციას. ასევე მნიშვნელოვანია, რომ ბევრი ახალი მეგობარი შევიძინე," _ ამბობს გიორგი მამულაშვილი. ტრენინგის მეორე დღეს ბავშვებმა, როგორც საინიციატივო ჯგუფის წევრებმა, დაწერეს პროექტები და მოაწყეს პრეზენტაცია. შემდეგ შეეცადნენ ეს ყველაფერი პრაქტიკაში გადაეტანათ. საბოლოოდ გუნდები გაერთიანდნენ და შეჯერდნენ ისეთ პრობლემატურ საკითხზე, როგორიცაა გარემოს დაბინძურება. ამ თემაზე ბავშვებმა ქუჩის გამოკითხვა ჩაატარეს და PR-ის ფარგლებში თავად დაიწყეს ქუჩების დასუფთავება, რომ ამ ქმედებით საზოგადოების ჩართულობაც მოეხდინათ. ტრენერის დათო მირველაშვილის თქმით, ტრენინგმა საკმაოდ ეფექტურად ჩაიარა. `დაახლოებით ოცამდე ახალგაზრდა იყო ჩართული. მათ საკუთარ იდეებს ფორმულირება გაუკეთეს. ამ ყველაფრის მიზანი არის მოსწავლეთათვის ცოდნის გაზიარება და შემდეგ უკვე მათი აქტიურობა საკუთარ გარემოში, ანუ სოციალური კუთხით მოტივირება და ინიციატივების განსაზღვრა.~ გადამზადებით მოსწავლეებიც კმაყოფილნი არიან და ამბობენ, რომ მათთვის ეს წინგადადგმული ნაბიჯია. ისწავლეს პროექტის შედგენა, მიიღეს გამოცდილება და შეიძინეს ბევრი მეგობარი. ტრენინგის დასრულების შემდეგ ბავშვებს `საქართველოს უნივერსიტეტის~ სერტიფიკატები გადაეცათ.