ბოლო დროს ნაადრევი ქორწინება საზოგადოების განსჯის საგნად იქცა. არაერთმა მოზარდმა თვითმკვლელობით დაასრულა სიცოცხლე მხოლოდ იმიტომ, რომ მშობლებმა საკუთარი სურვილის წინააღმდეგ დააქორწინეს. სპეციალისტების განმარტებით, ნაადრევი ქორწინების შედეგად არასრულწლოვნებს ექმნებათ ფსიქოლოგიური პრობლემები. ამ პრობლემასთან დაკავშირებით სახალხო დამცველის ანგარიშში აღნიშნულია, რომ მიუხედავად არსებული ეროვნული და საერთაშორისო სამართლებრივი რეგულაციისა, ადრეული ქორწინების მიზეზით ხშირია სკოლის მიტოვების ფაქტები. განსაკუთრებით მაღალი მაჩვენებელია რეგიონებსა და ეთნიკური უმცირესობების წარმომადგენლებით დასახლებულ ტერიტორიულ ერთეულებში. ნაადრევი ქორწინების შედეგად წარმოქმნილ პრობლემებზე გასულ კვირას საგარეჯოს მაჟორიტარი დეპუტატობის კანდიდატებმაც ისაუბრეს. შეხვედრაზე მოყვანილი იყო თელავის მუნიციპალიტეტეტის სოფელ ყარაჯალაში მომხდარი სუიციდის ფაქტები. კანდიდატებმა საკუთარი შეხედულებები საზოგადოებას გააცნეს. „პატრიოტთა ალიანსის“ ლიდერის ირმა ინაშვილის განცხადებით, ამ პრობლემის მოგვარებაზე ძირითადად განათლების სამინისტრო უნდა ზრუნავდეს. „აუცილებელია საგანმანათლებლო პროგრამების განხორციელება. მაგალითად, შევქმნიდი საბჭოს, სადაც შევიდოდნენ ექსპერტები, ფსიქოლოგები და ფსიქიატრები. მშობლებთან და პედაგოგებთან მუშაობაა აუციელებელი. უნდა შემუშავდეს კონკრეტული პროგრამა, მოზარდების დასახმარებლად. სახელმწიფოს ამ მიმართულებით არ გააჩნია მკაფიო პოლიტიკა, არსებობს უზარმაზარი სტრუქტურა - განათლების სამინისტრო და ვფიქრობ, რომ პირველ რიგში ის უნდა მუშაობდეს ჯანდაცვის სამინისტროსთან ერთად“. დეპუტატობის კანდიდატი „ქართული ოცნებიდან“ თამარ ხიდაშელი ოპონენტს არ ეთანხმება. მისი თქმით, სახელმწიფო ამ მიმართულებით აქტიურად მუშაობს და პრობლემის მოგვარებაც ეტაპობრივად ხდება: „განათლება, რა თქმა უნდა, არის ყველა პრობლემის მოსაგვარებლად ერთ-ერთი საუკეთესო საშუალება. ამ მიმართულებით, ასევე გააქტიურდნენ სამართალდამცავი ორგანოები, ეს უნდა ვაღიაროთ. გაზრდილია დაპატიმრებების რიცხვი იმ შემთხვევაში, როდესაც ახალგაზრდა გოგონას მოტაცება ხდება მისი სურვილის საწინააღმდეგოდ. შეწყალების კომისიის წევრი ვარ და მაქვს შეხება ასეთ მასალებთან. სახალხო დამცველის აპარატში მომზადდა კანონპროექტი, რომლის მიხედვითაც 16-დან 18-წლამდე მოზარდისთვის მხოლოდ მშობლის თანხმობა აღარ იქნება გადამწყვეტი. მოგეხსენებათ, ეთნიკური უმცირესობებით დასახებულ თემში მშობლის თანხმობის მიღება ძალიან მარტივად შეიძლება, ანუ შესაძლოა გოგონა ერთ ტომარა კარტოფილზე გაცვალონ, ამიტომ ჩვენ მაშინ ჩავთვალეთ, რომ ეს მექანიზმი არ არის საკმარისი და ამ შემთხვევაში აუცილებელია სასამართლოს მხრიდან თანხმობა. კანონპროექტი მომზადებულია და გაგზავნილია პარლამენტში. ადამიანის უფლებათა და იურიდიულ საკითხთა კომიტეტებმა კანონპროექტი უკვე მოიწონეს, მისი ინიციატორი იქნება თამარ კორძაია. ეს ერთ-ერთი პატარა კომპონენტია, რამაც შესაძლოა პრობლემა ნაწილობრივ მოაგვაროს“. შეხვედრაზე აღნიშნეს, რომ საკანონმდებლო ცვლილება პრობლემას არ აღმოფხვრის, რადგან ხშირ შემთხვევაში არასრულწლოვნების ქორწინებას არ არეგისტრირებენ, თუმცა რეალურად ისინი ცოლ-ქმარი არიან. “სპექტრთან” საუბარში არასამთავრობო ორგანიზაცია “პარტნიორობა ადამიანის უფლებებისთვის” ხელმძღვანელი ანა აბაშიძე აღნიშნავს, რომ არასრულწლოვანთა ქორწინების პრობლემა მასშტაბურია: “მსგავსი შემთხვევები საკმაოდ გავრცელებულია. პრობლემა არ იდენტიფიცირდება მხოლოდ ეთნიკურ ან რელიგიურ უმცირესობასთან. ეს არის მთელი ქვეყნის პრობლემა და თანაბრად წარმოდგენილია სხვადასხვა ტერიტორიაზე.” ანა აბაშიძე პრობლემის მიზეზებზე და აღმოფხვრის გზებზე საუბრობს: “თუ რა მავნე შედეგებს შეიძლება შეიცავდეს აღნიშნული ქმედება, ამასთან დაკავშირებით ცოდნა არა თუ კონკრეტულ ადამიანს, არამედ პროფესიონალებსაც კი არ აქვთ. მაგალითად, სოციალურ მუშაკებს, პედაგოგებსა და სამართალდამცავი უწყების წარმომადგენლებს. ამის თქმის საფუძველს მაძლევს ის, რომ უამრავი ფაქტი გამოვლინდა, რასაც კონკრეტული შედეგი არ მოჰყოლია. ქვეყნის კანონმდებლობაშიც მეტ-ნაკლებად რეგულირდება ამ ტიპის ქმედებები. ძალიან მნიშვნელოვანია საზოგადოების დუმილის კომფორტის დარღვევა. საკითხი უნდა დარეგულირდეს ისე, რომ სკოლას არ ჰქონდეს მრავალგვარი ინტერპრეტაციის საშუალება.” არასამთავრობო ორგანიზაცია “პარტნიორობა ადამიანის უფლებებისთვის” ხელმძღვანელი მიიჩნევს, რომ ერთი კონკრეტული სამინისტრო კი არა, თითქმის ყველა აქტორი უნდა ჩაერთოს, რომელიც რაიმე ნაწილით დაკავშირებულია არასრულწლოვანთან. საქართველოს მართვის საინფორმაციო სისტემის მონაცემებით სავალდებულო საბაზო განათლების დასრულებამდე სწავლის მიტოვების მაჩვენებელი ქორწინების მიზეზით ასეთია: 9 კლასის ჩათვლით ქორწინების გამო მიტოვება: 2011-2012 სასწავლო წელი - 64 (მონაცემები არ არის პერსონიფიცირებული); 2012-2013 წლები– მამრობითი 4, მდედრობითი 43; 2013-2014 წლები – მამრობითი 4, მდედრობითი 67; 2014-2015 წლები- მამრობითი 1, მდედრობითი 4. 2011-2014 წლებში სკოლის მიტოვების მაჩვენებელი საბაზო საფეხურის დასრულებამდე სულ 187-ია.