ინგა ბიტარაშვილი ორი კვირაა, რაც ახალი სასწავლო წელი დაიწყო, თუმცა სასკოლო წიგნების მაღაზიებთან კვლავ გრძელი რიგებია. დიალოგს, რომელსაც აქ მოისმენთ, რა თქმა უნდა, ძირითადად, სასკოლო სახელმძღვანელოებს ეხება. ზოგი სიახლეებით, ზოგი ფასით, ზოგიც წიგნების სიმძიმით არის უკმაყოფილო. გარდა იმისა, რომ მშობელთა უმრავლესობის თქმით, საერთო ჯამში, გასულ წელთან შედარებით, მათი ფასი არ შეცვლილა, ნეტ-ბუკების ავკარგიანობაც განხილვის საგანი გახდა. სწავლის დაწყებამდე, საქართველოს განათლებისა და მეცნიერების სამინისტრო ახალი 2011-2012 სასწავლო წლისთვის საგანგებოდ ემზადებოდა. 19 აგვისტოს მინისტრმა დიმიტრი შაშკინმა პრეზენტაცია გამართა, სადაც არაერთ სიახლეზე ისაუბრა. მისი განცხადებით, `ქვეყნის მასშტაბით 350 საჯარო სკოლას რეაბილიტაცია ჩაუტარდა, ყველა სოციალურად დაუცველ მოსწავლეს სახელმწიფოსგან საჩუქრად სახელმძღვანელოები გადაეცემა... პირველად საქართველოში ყველა პირველკლასელი და მათი დამრიგებელი სახელმწიფოსგან საჩუქრად 60 000 ნეტ-ბუკს მიიღებს...~ საქართველოს განათლებისა და მეცნიერების მინისტრმა სახელმძღვანელოების ფასზეც გაამახვილა ყურადღება და განმარტა, რომ პირველიდან მეექვსე კლასის ჩათვლით, თითოეული წიგნის ღირებულება 10 ლარს არ ასცდება. მიუხედავად ამისა, მშობელთა უმრავლესობა, გასული წლის მსგავსად, უკმაყოფილებას ამჯერადაც გამოთქვამს. ისინი `სპექტრთან~ საუბარში განმარტავენ, რომ `ხელისუფლებამ ეშმაკურ ხერხს~ მიმართა. "ორი შვილი მყავს: მეოთხე და მეექვსე კლასის მოსწავლეები, ამიტომ ეს საკითხი კარგად ვიცი. ტყუილს როგორ ვიტყვი, ერთი წიგნის ფასი 10 ლარს ნამდვილად არ სცდება, მაგრამ საქმე იცით რაშია?! თითქმის ყველა წიგნს თან რვეული მოჰყვება, რომელსაც რა თქმა უნდა, სხვა ფასი აქვს. მაგალითად, მათემატიკის წიგნს ოთხი დამატებითი რვეული ახლავს, თითოეულის ფასი ათს არ სცდება, მაგრამ მთლიანობაში მხოლოდ ეს კომპლექტი 26 ლარი დამიჯდა. მიჩნდება კითხვა, 26 ლარი ერთი საგნისთვის იაფი და ხელმისაწვდომია?! ამას რა დიდი მიხვედრა უნდა, რომ სახელმძღვანელოებზე ხელისუფლებამ პიარის მიზნით, ეშმაკური ხერხი გამოიყენა და ჩვენც იძულებულები ვართ, დავემორჩილოთ. აბა, ბავშვებს წიგნების გარეშე ხომ არ დავტოვებთ?!" _ აღნიშნა ქალბატონმა მზიამ, რომელმაც გვარის დასახელებისგან თავი შეიკავა. გარდა აღნიშნულისა, პირველკლასელთა მშობლები სხვა პრობლემებზეც საუბრობენ. შორენა ჯანიაშვილს არც ნეტ-ბუკებით სწავლება მოსწონს და ამბობს, რომ კომპიუტერი ბავშვის ჯანმრთელობას ზიანს აყენებს. "კარგი სიახლე ნამდვილად მისაღებია, მაგრამ ვფიქრობ, ამან ბავშვზე ცუდი ზეგავლენა არ უნდა მოახდინოს. სკოლაში ნეტ-ბუკები რომ დაურიგეს, ზუსტად ორი დღის შემდეგ ჩემს შვილს თვალები ისეთი ჩაწითლებული ჰქონდა, მეგონა ვეღარც წაიკითხავს-მეთქი. იმას არ ვამბობ, რომ ცუდია და გადავყაროთ, უბრალოდ შეიძლება ზოგს სუსტი თვალები აქვს და ალბათ ამის დაცვაზეც უნდა ეფიქრათ,~ _ გვითხრა შორენა ჯანიაშვილმა. ზემოთ აღნიშნული პრობლემების გარდა, გურჯაანის მკვიდრი ნანა ხოსიტაშვილი წიგნების ხარისხზეც საუბრობს. `ჩემი შვილიშვილი მესამე კლასის მოსწავლეა და ყოველდღე თან დავყვები. თითისტოლა ბავშვს ისეთი მძიმე ჩანთა აქვს, რომ ვერ ძრავს. დღეში 4-5 გაკვეთილი უტარდება, მაგრამ დიდი ზომის რვა-ცხრა წიგნი სჭირდება. იმიტომ, რომ ყველა სახელმძღვანელოს თავისი რვეული მოჰყვება. ხომ წარმოგიდგენიათ, ეს მოზარდის ხერხემლისთვის როგორი საზიანო იქნება. გარდა ამისა, სახელმძღვანელოები იმდენად ცუდად არის აკინძული, რომ წლის ბოლომდე ვერც მიჰყვება, რადგან ხშირი გამოყენების გამო ფურცლები სცვივა. ჩემი დროის სასკოლო წიგნი ახლაც მაქვს შემორჩენილი და ალბათ კიდევ ბევრ თაობას გაზრდის," _ ამბობს ნანა ხოსიტაშვილი. მძიმე ჩანთის ტარებას ბავშვის ჯანმრთელობისთვის მნიშვნელოვანი ზიანის მიყენება რომ შეუძლია, ამას ექიმი-პედიატრი ნაირა სეხნიაშვილიც ადასტურებს."ზედმეტწონიანი ტვირთის ტარება დიდი ადამიანებისთვისაც კი არ შეიძლება და მითუმეტეს საზიანოა ბავშვებისთვის. ამიტომ განათლების სამინისტროსთან ჩვენი, ექიმების თხოვნაც ყოველთვის ის არის, რომ სასკოლო სახელმძღვანელოები შედარებით მცირე ზომის იყოს. ყოველ შემთხვევაში ნაწილი მაინც, რათა ბავშვს ერთდროულად ბევრი წიგნის ტარება არ დასჭირდეს. რაც შეეხება ნეტ-ბუკებს, თუკი პირველი კლასის მოსწავლეები მას გეგმაზომიერად გამოიყენებენ, იგი არანაირ საფრთხეს არ წარმოადგენს არც თვალებისთვის და ზოგადად, არც ჯანმრთელობისთვის,"_ აღნიშნა ნაირა სეხნიაშვილმა. მისივე განმარტებით, ბავშვისთვის წონის ტარება უფრო მავნებელია, ვიდრე კომპიუტერთან ნორმალური კონტაქტი.