მარინა პეტრიაშვილი 14 სექტემბერს სასწავლო პროცესი საქართველოს ყველა ბაგა-ბაღში განახლდა. მანამდე გავრცელდა ინფორმაცია იმის შესახებ, რომ თუ ბავშვმა სკოლამდელი ასაკის მოსამზადებელი კურსი საბავშვო ბაღში არ გაიარა, სკოლაში არ მიიღებენ. შედეგად ბაგა-ბაღებში ბავშვთა რაოდენობა თითქმის გაორმაგდა, რის გამოც ჯგუფები ისე გადაიტვირთა, რომ ბავშვები საწოლების გარეშე დარჩნენ. ამას დაემატა სხვა პრობლემები, რამაც მშობლების უკმაყოფილება გამოიწვია. ინფორმაცია იმის შესახებ, რომ თუ ბავშვმა სკოლამდელი ასაკის მოსამზადებელი კურსი საბავშვო ბაღში არ გაიარა, სკოლაში არ მიიღებენ, სასწავლო წლის დაწყებამდე რამდენიმე ხნით ადრე გავრცელდა. რასაც მოსახლეობის მხრიდან არაერთგვაროვანი რეაქცია მოჰყვა."ჩემი ბიჭი მომავალ წელს სასკოლე ასაკის იქნება. რადგან გაჭირვებული ოჯახი მაქვს, თანაც დიასახლისი გახლავართ, არ ვაპირებდი, ბავშვი ბაღში მიმეყვანა. ფინანსური შესაძლებლობა არ მაქვს, რომ გადასახადი გადავიხადო, მაგრამ ეს ინფორმაცია 2 კვირის წინ გავიგე და იძულებული გავხდი ბავშვი ბაღში მიმეყვანა," _ გვითხრა ჯ. ქადაგიშვილმა. ანალოგიურ პრობლემებზე საუბრობენ სხვა მშობლებიც და აქვე აღნიშნავენ, რომ დღესდღეობით ბაღში დამამთავრებელი ჯგუფები გადავსებულია და ფაქტობრივად ბავშვის მიყვანა შეუძლებელია. "ბავშვი 5 წლის ასაკამდე ისე გავზარდე, ბაღში არ უვლია. ეხლა გავიგე, რომ ახალი კანონი გამოდის და იძულებული გავხდი, მიმეყვანა. პირველი, ფიზიკურად თანხის გადახდა მიჭირს, მეორეც, ჯგუფები ისეა გადავსებული, რომ ძიძას ყურადღების მიქცევაც კი უჭირს. 35 ბავშვს მოვლა ხომ უნდა?!" _ გვითხრა გულიკო ბერიძიშვილმა. ბავშვთა კონტინგენტის მატებამ სხვა პრობლემებიც გამოიწვია. ზოგიერთ ჯგუფში აღსაზრდელების რაოდენობა განსაზღვრულზე გაცილებით მეტია, რის გამოც ბავშვებს საწოლები არ ჰყოფნით, რომ შუადღისას დაიძინონ. "ჩემი შვილი შუადღის ძილს მიჩვეულია, სახლშიც ყოველთვის ვაძინებ. წელს ბავშვთა რაოდენობა ძალიან გაიზარდა, ამიტომ საწოლების რაოდენობა საკმარისი არ არის. გვითხრეს, რომ ბავშვები რიგრიგობით ვატაროთ, ან სულ წავიყვანოთ. მე მრავალშვილიანი დედა ვარ, მცირეწლოვანებს თვითონ ვუვლი, უფროსი კი ბაღში დამყავს. სად მაქვს იმის დრო, რომ შუადღისით დასაძინებლად სახლში წამოვიყვანო?!" _ გვითხრა ა. მარტაშვილმა. ამ პრობლემებთან დაკავშირებით `სპექტრი~ საბავშვო ბაგა-ბაღების მენეჯერებს გაესაუბრა. ქ. გურჯაანის #1 ბაგა-ბაღის მენეჯერის ნათია ბეთანელის თქმით, ინფორმაცია იმის შესახებ, რომ სკოლამდელი ასაკის ბავშვისთვის, ბოლო წელს ბაღში სიარული სავალდებულოა, მისთვისაც ცნობილია, თუმცა, ოფიციალური მითითება დღემდე არ მიუღია. "შარშანდელთან შედარებით ბავშვების რაოდენობამ მართლაც საკმაოდ მოიმატა. გამოსაშვები ჯგუფი გადავსებულია. 25 ბავშვის ნაცვლად ორმოცამდე აღსაზრდელი გვყავს. მსურველი კვლავაც ბევრია, მაგრამ აღარ ვიღებთ. ჯგუფის გაყოფა შეუძლებელია, იმიტომ რომ შესაბამისი ფართი არ გვაქვს. აღსაზრდელების რაოდენობის გაზრდა შესაძლოა რამდენიმე მიზეზით იყოს განპირობებული. შობადობის მატება, სხვა ბაღებიდანაც გადმოსული კონტინგენტი ან გავრცელებული ინფორმაცია ბაღში სავალდებულო სწავლების შესახებ," _ გვითხრა ნათია ბეთანელმა და იქვე სხვა პრობლემაზეც ისაუბრა. "დღესდღეობით ბაგაში ბავშვთა რაოდენობა დასაშვებ ზღვარს საკმაოდ აღემატება. ახალი ნაკადი იმ პირობით მივიღეთ, რომ ბავშვებს ძილის დროს სახლში წაიყვანდნენ და პრობლემას სხვებსაც არ შეუქმნიდნენ. დღესდღეობით კი ყველას გაუჩნდა იმის სურვილი, რომ ბავშვები დღის ბოლომდე დატოვოს. მე კრებაზე ასეთი რამ ვთქვი, რომ ადგილი არ გვაქვს, არც საწოლებია საკმარისი და ამიტომ მშობლებს ასეთი პირობა წავუყენე: თუ გნებავთ ბავშვს ნუ დააძინებთ, თუ არადა, სადაც გინდათ წაიყვანეთ. სხვა ჯერჯერობით არაფრის გაკეთება არ შეგვიძლია. მესმის, ძალიან ძნელია ბავშვს კარი მიუხურო და უკან გააბრუნო, მაგრამ სხვა გამოსავალი ამჯერად მართლა არ არის. თუ არ აკმაყოფილებთ ჩვენი პირობები, მაშინ წაიყვანონ. წინა წელს მიღებულ ბავშვებს საწოლს ვერ წავართმევთ," _ გვითხრა ნათია ბეთანელმა. ქალაქ გურჯაანის #4 ბაგა-ბაღის მენეჯერის თამილა წერეთელის თქმით, ბაღში აღსაზრდელების ნაკადი შარშანდელთან შედარებით ბევრად მეტია. თუმცა, მათ საბავშვო ბაღში ყველა პირობაა შექმნილი, რომ პატარებმა თავი კარგად იგრძნონ. "ვფიქრობ, ბავშვთა ნაკადის მატება, პირველ რიგში შობადობამ და საბავშვო ბაღებში პირობების გაუმჯობესებამ გამოიწვია. გეთანხმებით, რომ ჯგუფში არ უნდა იყოს ამდენი ბავშვი, მაგრამ რა ვუყოთ იმ მშობლებს, რომელთა შვილებსაც შემდგომში შეიძლება პრობლემები შეექმნათ, თუ ბაღში მოსამზადებელ კურსს არ გაივლიან. ამიტომ მათ მდგომარეობაში შევდივართ. მართალია, ძალიან ბევრი ბავშვი გვყავს, მაგრამ მაქსიმალურად ვიტვირთებით და ყურადღებას არ ვაკლებთ. ქალაქის ცენტრში მცხოვრებ ბავშვს, კოტეხში ან ცხრა აპრილზე ხომ ვერ ატარებენ მშობლები? ჩვენი მხრიდან, რამდენ ბავშვსაც ვიღებთ, ყველაზე პასუხს ვაგებთ. ჩვენს ბაღში საწოლების საკმარისი რაოდენობაა," _ გვითხრა თამილა წერეთელმა. მშობლებს ახალი სასწავლო წლიდან კიდევ ერთი პრობლემა შეექმნათ. მათი თქმით, თუ ბავშვს ბაღში ათის ნახევრამდე არ მიიყვანენ, კარებს უკეტავენ და აღარ უშვებენ."თითქოს სხვა პრობლემა აღარ ჰქონდეს ადამიანს მოსაგვარებელი, ერთი კიდევ დაგვიმატეს. ბავშვი ათის ნახევრამდე თუ არ მივიყვანეთ, კარებს კეტავენ და აღარ უშვებენ. ორი შვილი მყავს. უფროსი მეორე კლასშია და ყოველ დილით ჯერ ის მიმყავს სკოლაში, შემდეგ უმცროსი _ ბაღში. ფიზიკურად ვერ ვასწრებ, რომ ათის ნახევარს არ გადავაცილო. გუშინაც კარები დაკეტილი დაგვხვდა და დიდი ხვეწნა დაგვჭირდა იმისთვის, რომ ბავშვი მიეღოთ. ეს პრობლემა აუცილებლად უნდა გადაიჭრას, ასე ნამდვილად არ შეიძლება. ჩემს მდგომარეობაში ალბათ კიდევ ბევრი მშობელია," _ გვითხრა მ. გეთიაშვილმა. გურჯაანის მუნიციპალიტეტის საკრებულოს სოციალურ საკითხთა კომისიის თავმჯდომარის გია ენუქიძის თქმით, მისთვის ყველა ეს პრობლემა ცნობილია და ცდილობს სიტუაცია შეძლებისდაგვარად დაარეგულიროს. "არც ერთ ბაღში ისეთი მდგომარეობა არ არის, როგორც პირველ და მეოთხე ბაგა-ბაღში, იმიტომ, რომ ყველა მშობელი ცდილობს თავისი შვილი ცენტრში ატაროს. ჩვენ გავეცით მითითებები მენეჯერებზე და სიტუაციას თვითონ დაარეგულირებენ. მათ პირველ ადგილზე უნდა დააყენონ იმ მშობლების ბავშვები, რომლებიც მუშაობენ. გადატვირთვა ძირითადად ბაგაზე გვაქვს, ზოგან საწოლები არ ჰყოფნით, ეს საკითხი თვითონ მენეჯერმა უნდა მოაგვაროს. კიდევ რაღაც პრობლემები იყო დილით ბავშვის მიყვანასთან დაკავშირებით, ამიტომ მიღების დრო ნახევარი საათით გადავწიეთ, ეს ყველაფერი დავარეგულირეთ და დილით ბავშვების მიღება ათ საათამდე იქნება. ასე რომ ყველაფერი გამოსწორდება. ვფიქრობ, მოგვიწევს ჯგუფების დამატება ან ქვემოთ კალოსუბნის ბაღის რეაბილიტაცია, ეს საკითხი ალბათ მოკლე ხანში გადაწყდება," _ გვითხრა გია ენუქიძემ. გურჯაანის მუნიციპალიტეტის საკრებულოს სოციალურ საკითხთა კომისიის თავმჯდომარის ოპტიმისტური განცხადებების მიუხედავად, სააღმზრდელო დაწესებულებებში ჭარბ კონტინგენტთან დაკავშირებული პრობლემები კვლავ აქტუალურია. როგორ მოაგვარებენ მენეჯერები დამოუკიდებლად ამ საკითხს, ეს მშობლებისთვის ჯერჯერობით გაურკვეველია.