მე-12 კლასის საატესტატო გამოცდები დასრულდა. გურჯაანის საგანმანათლებლო რესურსცენტრმა შედეგები გამოაქვეყნა. საგანმანათლებლო რესურსცენტრის უფროსის დალი მინდიაშვილის თქმით, 2014-1015 სასწავლო წლის ბოლოს 529 მოსწავლე დარეგისტრირდა. "529-დან ზოგი მოსწავლე იყო, ზოგი კი ის, ვინც გასულ წელს ჩაიჭრა. გამოცდაზე 527 ბავშვი გამოცხადდა. წინა წელს ჩაჭრილებიდან 19 დარეგისტრირდა და აქედან 17 ისევ ჩაიჭრა. შედეგი ერთხელ კიდევ გვაჩვენებს, რომ თუ არ იმუშავე, გამოცდები მარტივად ჩასაბარებელი არ არის. მთლიანობაში ატესტატის გარეშე სულ 41 ბავშვი დარჩა. რაც შეეხება მაღალ ქულებს,როდესაც სკოლებიდან სტატისტიკა გამოვითხოვეთ, მაღალ შეფასებად ჩავთვალეთ სრული რვა ქულა დამრგვალების გარეშე და ზემოთ. ასეთი 44 მოსწავლე გამოიკვეთა. ეს არ არის ძალიან დიდი რიცხვი, მაგრამ არც დაბალი მაჩვენებელია. გამოცდები მთლიანობაში მშვიდად, ნორმალურად ჩატარდა. ზოგადი განათლების შესახებ კანონი გვეუბნება, რომ განათლება არის უწყვეტი. თუკი ჩაჭრილ მოსწავლეებს ექნებათ სურვილი აიღონ ატესტატი, რამდენჯერაც სურთ, იმდენჯერ შეუძლიათ დარეგისტრირდნენ."- აღნიშნა საგანმანათლებლო რესურსცენტრის უფროსმა. ნომერ 1 საჯარო სკოლის დირექტორის მოადგილე თინათინ ბარბაქაძე თვლის, რომ მათმა სკოლამ წელს კარგი შედეგი აჩვენა. "სულ 33 ბავშვი გავიდა გამოცდებზე. ატესტატი 4-მა ვერ აიღო. ისინიც ის წარუმატებელი მოსწავლეები იყვნენ, რომლებიც სკოლას ხშირად აცდენდნენ." შეგახსენებთ, რომ მე-12 კლასის საატესტატო გამოცდები 21 მაისს დაიწყო და 25 მაისს დამთავრდა. გამოცდების ეროვნული ცენტრის ინფორმაციით, საქართველოს მასშტაბით 44 ათასზე მეტი მოსწავლე იყო დარეგისტრირებული.