რამდენიმე დღის განმავლობაში სოფელ კაბალის პირველ საჯარო სკოლაში სასწავლო პროცესი შეჩერებული იყო. პედაგოგები და მშობლები ქართველი დირექტორის დანიშვნას აპროტესტებდნენ და მიზეზად კომუნიკაციის პრობლემას ასახელებდნენ. როგორც სკოლის ახალი დირექტორი ლამარა ტაბატაძე speqtri.ge-სთან საუბრისას აცხადებს, ეს არის უპრეცედენტო შემთხვევა, როდესაც აზერბაიჯანულ სკოლაში ქართველი დირექტორი დაინიშნა. მის მიმართ პედაგოგების და მშობლების აგრესია კი არაინფორმირებულობამ გამოიწვია. „დირექტორების კონკურსი რომ გამოცხადდა, სამი სკოლა მოვხაზე, რომელთაგან ერთ-ერთი კაბალის საჯარო სკოლა იყო. აქ განათლების სამინისტრომ გამომაგზავნა, თუმცა კაბალის საჯარო სკოლის სამეურვეო საბჭომ არ მიმიღო. მინისტრმა გამოიყენა თავისი დისკრეციული (პირადი შეხედულების მიხედვით) უფლებამოსილება და დირექტორად დამნიშნა. ამის გამო ადგილობრივებისგან აგრესია წამოვიდა იმიტომ, რომ ეგონათ კანონი დაირღვა. მათ ჰქონდათ მინისტრის ბრძანების ძველი რედაქცია, სადაც ეწერა, რომ სამეურვეო საბჭო რომელ დირექტორსაც არ მიიღებდა, შემდგომში იგივე დირექტორი არ უნდა დანიშნულიყო. ადგილობრივებმა როცა ნახეს ახალი რედაქცია, რის მიხედვითაც მინისტრს უფლება ჰქონდა ეს გადაწყვეტილება მიეღო, დამშვიდნენ. თანაც ანალოგიურ მდგომარეობაში იყო კიდევ რამდენიმე სკოლა, მათ შორის ქართულენოვანიც.“ დირექტორი პედაგოგების არაინფორმირებულობას ქართულის უცოდინრობით ხსნის. „ფაქტიურად პედაგოგები განათლების სამინისტროს საწარმოო პროცესში არ იყვნენ ჩართულები, ვერ ეცნობოდნენ სიახლეებს. ყველაფერი რაც სკოლაში მოდის, ახალი რედაქციები თუ სხვა სახის ინფორმაცია, ცალკე საქაღალდეში უნდა იდებოდეს. აქ ენის პრობლემა მწვავედ დგას“. როგორც უკვე ცნობილია, კაბალის საჯარო სკოლის პედაგოგების და მშობლების პროტესტის ერთ-ერთი მიზეზი ის იყო, რომ დირექტორმა აზერბაიჯანული არ იცოდა. ამის გამო ლამარა ტაბატაძემ ენის შესწავლა უკვე დაიწყო. თუმცა, საქართველოს განათლებისა და მეცნიერების სამინისტროში აცხადებენ, რომ საქართველოში სამართალწარმოების ენა არის ქართული და კანონი დირექტორს არ ავალდებულებს იცოდეს რომელიმე უცხო ენა. "დირექტორმა კი არ უნდა ისწავლოს აზერბაიჯანული, მოქალაქეებმა უნდა იცოდნენ ქართული. ეს წერია კონსტიტუციაშიც და წერია ზოგადადმინისტრაციულ კოდექსშიც. ადგილობრივების მოთხოვნა და არგუმენტები არაკანონიერია და ამის გათვალისწინებას სამინისტრო არ აპირებს, რადგან დირექტორი სავსებით კანონიერად არის დანიშნული,"- განმარტავს speqtri.ge-სთან საუბრისას განათლების სამინისტროს პრესსამსახურის თანამშრომელი ლალი როზომაშვილი. სკოლის დირექტორის თქმით, აზერბაიჯანულენოვანმა პედაგოგებმაც გამოთქვეს სურვილი ქართული ენა ისწავლონ, თუმცა ამბობენ, რომ ენის შემსწავლელი სპეციალური პროგრამა განათლების სამინისტროს არ აქვს. „მე ვიცი, რომ განათლების სამინისტროს ამჟამად აქვს ენის შემსწავლელი პროგრამა და ეს აქაურ პედაგოგებს დაეხმარება ქართულის შესწავლაში“. როგორც განათლების და მეცნიერების სამინისტროს ზოგადი განათლების დეპარტამენტის უფროსი ნინო კვიტაიშვილი ჩვენთან საუბრისას განმარტავს, არის პროგრამები, რომელსაც მასწავლებელთა პროფესიული განვითარების ეროვნული ცენტრი ახორციელებს, რისი საშუალებითაც ეთნიკური უმცირესობის წარმომადგენელ პედაგოგებს ქართული ენის შესწავლის საშუალება აქვთ. „სოფელი კაბლის საჯარო სკოლის პედაგოგებს ალბათ აქამდე არ დაუყენებიათ მოთხოვნა და მაგიტომაც არ მიუღიათ მსგავსი დახმარება.“ „კაბალის თემში“ ხუთი სკოლაა და ხუთივე აზერბაიჯანულენოვანი. როგორც ლამარა ტაბატაძე ამბობს ამ სკოლებში ჯერ ქართველი დირექტორი აქამდე არ დაუნიშნავთ. "ჩემი შემთხვევა პირველი პრეცენდენტია. ამიტომაც გაუჭირდათ ასეთი სიახლის მიღება.“ რამდენიმედღიანი პაუზის შემდეგ გასულ კვირას კაბალის პირველ საჯარო სკოლაში სასწავლო პროცესი აღდგა. სკოლაში მასწავლებლების სრული შემადგენლობა გამოცხადდა და ბავშვების ნაწილიც მივიდა. „დღეის მდგომარეობით სასწავლო პროცესი ნორმალურ ვითარებაში მიმდინარეობს. რაც შეეხება დანარჩენ სირთულეებს, დავსხედით, დავილაპარაკეთ და პრობლემების გადაჭრის გზები დავსახეთ“, - ამბობს დირექტორი. მისივე განმარტებით, პრობლემების მოგვარების და მოლაპარაკებების საკითხში განათლებისა და მეცნიერების სამინისტრო არ ჩართულა. „მოლაპარაკებას სოფელ კაბალის რწმუნებულთან ერთად ვაწარმოებდით, რის შემდეგაც სასწავლო პროცესი განახლდა. პრობლემა ის იყო, რომ მოსწავლეები ზარალდებოდნენ“. განათლების სამინისტროში კი აცხადებენ, რომ მათ კონტაქტი ჰქონდათ ლაგოდეხის რესურსცენტრთან, რომლის უფროსიც სამინისტროს წარმომადგენელია.