დაფინანსების ახალმა წესმა აბიტურიენტთა უკმაყოფილება გამოიწვია

განათლება

13:44 / 24.02.2011

ინგა ბიტარაშვილი

14 თებერვლიდან, უმაღლეს სასწავლებლებში ჩაბარების მსურველთა რეგისტრაცია დაიწყო, რომელიც 25 მარტამდე გაგრძელდება. მისაღები გამოცდებისთვის მინიმუმ ოთხი სავალდებულო საგანია ჩასაბარებელი.

საქართველოს განათლებისა და მეცნიერების სამინისტროს გურჯაანის საგანმანათლებლო რესურსცენტრის უფროსმა ლალი გაბიტაშვილმა განმარტა, რომ აბიტურიენტებს რეგისტრაციის გავლა რესურსცენტრებში შეუძლიათ, ხოლო მოსწავლეებს _ სკოლებში. თუმცა, ამ თვალსაზრისით, გარკვეული სიახლეებიც არსებობს. "წელს აბიტურიენტებს რეგისტრაცია ინტერნეტის საშუალებით, ონლაინ რეჟიმშიც შეუძლიათ. ეს აძლევთ იმის საშუალებას, რომ შეცვალონ არჩევანი. მაგალითად, რეგისტრაცია გაიარა, მაგრამ ერთი კვირის შემდეგ რომელიმე პუნქტის შეცვლა მოისურვა, ინტერნეტრეგისტრაცია ამის შესაძლებლობას აძლევთ," _ განმარტა ლალი გაბიტაშვილმა.

აღნიშნულ ინფორმაციას აბიტურიენტები დადებითად აფასებენ და ამბობენ, რომ ეს მეთოდი მათთვის ბევრად უფრო მისაღები და პრაქტიკულია. "ჩვენთვის ეს ძალიან მნიშვნელოვანია, რადგან ინტერნეტით რეგისტრაცია ვადის ამოწურვამდე ნებისმიერ დროს შეგვიძლია. ეს საშუალებას გვაძლევს, გადაწყვეტილება შევცვალოთ. ამ ფაქტს მივესალმებით," _ ამბობენ აბიტურიენტები.

ლალი გაბიტაშვილის თქმით, გამოცემულია სპეციალური წიგნი `ცნობარი აბიტურიენტებისთვის~ რომელიც ყველა სკოლას დაურიგდა. წიგნში მოცემულია კოდები, ფასები, უმაღლესი სასწავლებლების დასახელება, მისაღები სტუდენტების რაოდენობა და ა.შ. მისივე განმარტებით, აღნიშნული ინფორმაციის ნახვა საქართველოს განათლებისა და მეცნიერების სამინისტროს ვებ გვერდზე და გაზეთ `ახალ განათლებაშიცაა~ შესაძლებელი.

გარდა ამისა, 2011 წლიდან, გარკვეულ ფაკულტეტებზე შეიცვალა სახელმწიფო დაფინანსების წესი. "სიახლეა ის, რომ არის მიმართულებები, რომლებზეც მხოლოდ ასპროცენტიანი გრანტი გაიცემა. ესენია: სამართალი, ჯანდაცვა, ბიზნესის ადმინისტრირება (ტურიზმის გარდა), მასობრივი კომუნიკაცია, ჟურნალისტიკა, საერთაშორისო ურთიერთობები და საჯარო მმართველობა. დანარჩენ სპეციალობებზე ჩვეულებრივ 30%, 50%, 70% და 100%-იანი გრანტი გაიცემა," _ აღნიშნა `სპექტრთან~ საუბარში საქართველოს განათლებისა და მეცნიერების სამინისტროს გურჯაანის საგანამანათლებლო რესურსცენტრის უფროსმა ლალი გაბიტაშვილმა

აღნიშნულმა სიახლემ, აბიტურიენტების უკმაყოფილება გამოიწვია. ისინი ამბობენ, რომ განათლების სისტემაში გატარებული რეფორმის გამო, ფაკულტეტების არჩევის დროს ბევრმა გადაწყვეტილება შეცვალა."საერთაშორისოზე მინდა ჩაბარება, მაგრამ ახლა უკვე, თუ ასპროცენტიანი გრანტი არ ავიღე, სახელმწიფო აღარ დამაფინანსებს. ძალიან განვიცდით მე და ჩემი ამხანაგები, რადგანაც შეიძლება უმაღლესი ქულები ვერ დავაგროვოთ. სწავლის საფასურის მთლიანად გადახდას კი ჩემი ოჯახი ვერ შეძლებს," _ გვითხრა ნინომ, #1 საჯარო სკოლის მოსწავლემ, რომელმაც `სპექტრთან~ საუბარში გვარის დასახელებისგან თავი შეიკავა.

"ამ შემთხვევაში ჩვენ არჩევანის თავისუფლებას არ გვაძლევენ, იძულებულები ვართ ისეთ ფაკულტეტზე ჩავაბაროთ, სადაც სახელმწიფო 30, 50 ან 70 პროცენტსაც აფინანსებს," _ ამბობენ აბიტურიენტები.

_რა პრინციპით შეირჩა ფაკულტეტები და რამ განაპირობა აღნიშნული ცვლილება? იგეგმება თუ არა დაფინანსების ანალოგიური წესის ამოქმედება სხვა ფაკულტეტებზეც? ჩააყენებს თუ არა ეს სიახლე აბიტურიენტებს არათანაბარ მდგომარეობაში და უფინანსობის გამო, ბევრი ნიჭიერი ახალგაზრდა ხომ არ დარჩება სწავლის გარეშე? _ამ კითხვებით `სპექტრმა~ 15 თებერვალს მიმართა, ( This e-mail address is being protected from spambots. You need JavaScript enabled to view it ) თუმცა პასუხი ამ დრომდე არ მიგვიღია.

| Print | E-mail