ახალ სასწავლო წელს მოსწავლეები ახალ სკოლებში ახალი სახელმძღვანელოებითა და კომპიუტერებით, სამედიცინო კაბინეტებისა და უფასო ავტობუსების მომსახურებით დაიწყებენ. 509 650 მოსწავლე უფასოდ მიიღებს 4 033 295 სახელმძღვანელოსა და სამუშაო რვეულს. ახალი სახელმძღვანელოები გაუმჯობესებული ხარისხის ქაღალდზეა დაბეჭდილი და უფრო ნაკლები წონა აქვს. „წელს სახელმძღვანელოების პროექტი გაცილებით უფრო გამართულად მიმდინარეობს. რაოდენობის მოკვლევიდან დაწყებული, ფასთა კვოტირებით დამთავრებული და შემდეგ უკვე დისტრიბუცია ბევრად მოწესრიგებულია. სკოლებს თითქმის დამთავრებული აქვთ დაკომპლექტება და გაშვებული აქვთ სხვადასხვა კლასებში. ვფიქრობ, სკოლებმა ძალიან კარგად გაართვეს ამას თავი. დღეს დავათვალიერე სხვადასხვა კლასების მიხედვით წიგნების შეკვრა, სადაც მე პირადად გამიჭირდა, რომ მივმხვდარიყავი რომელი იყო ახალი სახელმძღვანელო და რომელი გამოყენებული. ვფიქრობ, ამ მხრივ საკამათო და სანერვიულო ნამდვილად არ იქნება“, - განმარტა განათლებისა და მეცნიერების მინისტრმა თამარ სანიკიძემ. როგორც საგანმანათლებლო და სამეცნიერო ინფრასტრუქტურის განვითარების სააგენტოს დირექტორი გრიგოლ გაგოშიძე აცხადებს, სახელმძღვანელოების 80% უკვე დაბეჭდილია, საიდანაც თბილისის მასშტაბით დარიგებულია 65%, ხოლო რეგიონებში - 70%. მისივე თქმით, აღნიშნული წიგნები აგვისტოს ბოლოს სრულად იქნება დაბეჭდილი და სკოლებს 10 სექტემბრამდე გადაეგზავნება. „სიახლეა პირველი კლასელების წიგნებში, რომელიც დაიბეჭდა სპეცილურ ქაღალდზე. რამაც დაახლოებით 150-დან 200 გრამამდე შეამცირა სახელმძღვანელოების წონა“, - აღნიშნა გაგოშიძემ. გარდა სახელმძღვანელოებისა, პირველკლასელებს და მათ დამრიგებლებს გაუმჯობესებული მონაცემების ახალი კომპიუტერებიც დახვდებათ, რომელსაც გაცილებით მაღალი ხარისხის ტექნიკური მონაცემები და შემცირებული წონა აქვს. ნეტბუქებში, რომლებიც პირველკლასელებს საჩუქრად გადაეცემა, ჩაწერილია საგანმანათლებლო-ინტერაქტიული თამაშები და სავარჯიშოები. "გაუმჯობესებულია პროცესორი, გარჩევადობა, ეკრანის რეზოლუცია. თვითონ ეკრანიც უფრო დიდია. აქვს უკეთესი ელემენტი, რომელიც დაახლოებით 7-8 საათი ძლებს, ეს ორჯერ მეტია წინა წლებში დარიგებულ კომპიუტერულ მოწყობილობებთან შედარებით. არის უფრო მჩატე, დაახლოებით 300 გრამით ნაკლები, ვიდრე წინა იყო. აქვს სპეციალური ზედაპირი, რომელიც ხელში არ სრიალებს და შესაბამისად, მცირდება იმის რისკი, რომ ბავშვს ხელიდან გაუვარდეს. თუმცა აქვს დაზღვევა და გავლილი აქვს ქარხნულად ე.წ. დროპტესტი. დაცულია 70 სანტიმეტრის სიმაღლიდან ვარდნისგან, რომელიც არის ბავშვის მერხის სიმაღლე“, - განმარტავს განათლების მართვის საინფორმაციო სისტემის უფროსი ლაშა ვერულავა. ახალი სასწავლო წლიდან მოსწავლეებს კიდევ ერთი სიახლე ელით. საჯარო სკოლებში სამედნიცინო კაბინეტები აღდგება. ზაფხულის განმავლობაში სკოლებში სარემონტო სამუშაოები ტარდება და ხდება კაბინეტების ინვენტარით მოწყობა. განათლებისა და მეცნიერების სამინისტროს დაფინანსებით მიმდინარე პროექტი პირველ ეტაპზე, 100 საჯარო სკოლაში განხორციელდება. როგორც განათლებისა და მეცნიერების სამინისტროს ზოგადი განათლების მართვისა და განვითარების დეპარტამენტის უფროსი ნინო კვიტაიშვილი განმარტავს, სკოლაში შესაძლებელი იქნება მოსწავლეებისთვის პირველადი გადაუდებელი დახმარების აღმოჩენა. განხორციელდება სანიტარულ-ჰიგიენური ნორმების ზედამხედველობა. მოხდება, იმუნიზაციის პროცესის ხელშეწყობა. ინფექციური დაავადებებისა და ზოგადად, ჯანმრთელობის რისკების შესახებ ინფორმაციის მიწოდება და ცოდნის ამაღლება. გარდა ამისა, მისივე თქმით, სკოლის ექიმი უფრო პოპულალურს გახდის ჯანსაღი ცხოვრების წესს. მიმდინარე წელსაც ერთ-ერთ მნიშვნელოვან პრიორიტეტად რჩება სკოლებში ინკლუზიური განათლების დანერგვა და ეფექტური განვითარება. გრძელდება უსინათლო მოსწავლეებისთვის ბრაილის შრიფტით სახელმძღვანელოების დაბეჭვდა. წელს დამატებით გამოიცა ქართულის, მათემათიკისა და ინგლისურის სახელმძღვანელოები 6-დან 12 კლასის ჩათვლით. ასევე 2014-15 სასწავლო წლიდან გაიხსნება კიდევ 3 ახალი ინტეგრირებული კლასი აუტისტური სპექტრის აშლილობის მქონე მოსწავლეებისთვის. სამი კლასიდან ორი თბილისში იქნება, ერთი კი კახეთში, თელავის №9 საჯარო სკოლაში. გრძელდება საჯარო სკოლების მოსწავლეთა უფასო ტრანსპორტირების პროგრამაც. გასულ სასწავლო წელს უფასო ავტობუსებით საქართველოს 900-ზე მეტი სკოლის 47 085 მოსწავლე სარგებლობდა. სექტემბრიდან უფასო ტრანსპორტი კიდევ 100 სკოლას დაენიშნება. აქტიურად მიმდინარეობს ახალი სკოლების მშენებლობაც. გასულ წელს განათლებისა და მეცნიერების სამინისტრომ განსაკუთრებით მძიმე მდგომარეობაში მყოფი 9 სკოლა შეარჩია, რომელთა ადგილზეც თანამედროვე სტანდარტების ნაგებობების მშენებლობა დაიგეგმა. სიახლეები დაინერგა ეროვნულ სასწავლო გეგმაშიც. გაიზარდა სასწავლო წლის ხანგრძლივობა და გაუთანაბრდა საერთაშორისო სტანდარტს. მეორე სავალდებულო უცხო ენის შესწავლას ბავშვები მე-7 კლასის ნაცვლად მე-5 კლასიდან დაიწყებენ, რაც სრულად დაფინანსდება სახელმწიფოს მიერ. დაიხვეწა სადამრიგებლო საათის შინაარსიც, რომელიც დაწყებით, საბაზო და საშუალო საფეხურებს მოიცავს. შემუშავდა მასწავლებელთა პროფესიული განვითარების ახალი სქემაც, რომელიც 4 დონიანია და ყველა მასწავლებელს ჩართვისა და განვითარების თანაბარ შესაძლებლობას აძლევს, განსხვავებით ძველი სქემისგან, რომელიც მხოლოდ სერტიფიცირებულ პედაგოგებზე იყო გათვლილი. ახალი სქემით გაწერილია კონკრეტული გზები, თუ როგორ შეიძლება მასწავლებლის პროფესიაში შევიდნენ სხვადასხვა განათლებისა თუ გამოცდილების კადრები. ზოგადი განათლების ხარისხის გაზრდისა და ხელმისაწვდომობის ამაღლების მიზნით დაგეგმილი სიახლეები საჯარო სკოლებში სექტემბრიდან განხორციელდება.