გათავისუფლებული თანამშრომლები ააიპი-ს ხელმძღვანელს უპირისპირდებიან
ააიპი "სამუზეუმო გაერთიანების" და ააიპი "საბიბლიოთეკო გაერთიანების" ოპტიმიზაციის შემდეგ ახალმა ხელმძღვანელმა შტატების შემცირება დაიწყო.
გათავისუფლებული თანამშრომლები ამბობენ, რომ მათი სამსახურიდან გაშვება არაკანონიერად მოხდა. მათივე თქმით, ამ გადაწყვეტილებაში ბრალი გურჯაანის მუნიციპალიტეტის გამგებელსაც მიუძღვის.
როგორც გასულ კვირას "გურჯაანის საბიბლიოთეკო და სამუზეუმო გაერთიანების" ხელმძღვანელმა მაია ბეროშვილმა განაცხადა, გასათავისუფლებელი თანამშრომლების სია ცნობილია და მათი სამსახურიდან წასვლა ეტაპობრივად მოხდება.
სამსახურის გარეშე დარჩენილი თანამშრომლები ახალ ხელმძღვანელს უპირისპირდებიან და აცხადებენ, რომ ისინი უკანონოდ გაათავისუფლეს.
"პირველ რიგში სასურველია გაეცეს პასუხი კითხვას, რატომ გაერთიანდა მაინცდამაინც ეს ორი ააიპი და არა სხვა. ჩემს თავს პროფესიონალად ვთვლი და ვერ ვხვდები, რატომ უნდა ვიყო დღეს გარეთ. როგორც ვიცი, ასაყვან თანამშრომელთა სიაში არ მოვიაზრები. ჩემს გარდა გათავისუფლებულია სოფლებიდან კარდენახის ბიბლიოთეკარი, ქალაქის ბიბლიოთეკიდან სპეციალისტები ელენე ყუშიტაშვილი და ნინო სიბაშვილი. ყველა ძველი და პროფესიონალი კადრია. საოცარია ისიც, რომ ამ ოთხი ადამიანიდან, სამნი ქვრივები ვართ. აქედან გამომდინარე, იქმნება შთაბეჭდილება, რომ გამგებელმა უკაცო ოჯახები დაიბრიყვა. ჩემი აზრი თუ გაინტერსებთ, უნდა ყოფილიყო შიდა ტესტირება, რათა არ გვეფიქრა, რომ აქ ადგილი აქვს კორუფციასა და ნეპოტიზმს. არ გვქონდეს იმის განცდა, რომ დღეს, როგორც უქმრო ქალი, ვარ დაჩაგრული და იზოლირებული საყვარელი საქმიდან," _ გვითხრა ბიბლიოთეკის ყოფილმა დირექტორმა მზია გლურჯიძემ.
მისივე თქმით, რეორგანიზაციის შემდეგ ბიბლიოთეკა არაპროფესიონალი კადრებით დაკომპლექტდა.
"2007 წელს, როდესაც რეორგანიზაცია ჩატარდა, მე გავედი დირექტორად. მაშინ ყოფილი ხელმძღვანელი გამგის პოზიციაზე ავიყვანე. ამით არაფერი დამკლებია. პირიქით, ბევრი რამ ვისწავლე მისგან. გამგებელმა გამცეს პასუხი, რა დააშავეს მზია გლურჯიძემ და სხვა გათავისუფლებულმა ადამიანებმა. დღესდღეობით ბიბლიოთეკა არაპროფესიონალის ხელშია. დირექტორად დაინიშნა არასპეციალისტი, მოადგილედ შრომის მასწავლებელი და ა. შ. მოვითხოვ, ჩატარდეს შიდა ტესტირება და ამით გაირკვევა, ვინ არის პროფესიონალი და ვინ _ არა," _ აღნიშნა მან.
უკმაყოფილებას გამოთქვამს ბიბლიოთეკის ყოფილი თანამშრომელი, ელენე ყუშიტაშვილიც.
"ბიბლიოთეკის ამჟამინდელ ხელმძღვნელთან გუშინაც ვიყავი მისული. რომ ვთხოვე, ჩემი ოჯახური მდგომარეობა გაითვალისწინეთ-მეთქი, მითხრა, მიღებაზე საერთოდ არ დამელაპარაკოო. შენი განყოფილება გაუქმდა, მეორე თანამშრომელი კი იმიტომ დავტოვეთ, რომ აუცილებლობას წარმოადგენდაო. სოციალურად დაუცველი ვარ. მეუღლე დაღუპილია. მყავს უნარშეზღუდული შვილიშვილი, რომელიც 7 წლისაა და მიწაზე ჯერ ფეხი არ დაუდგამს. ბავშვს სჭირდება მუდმივი მკურნალობა, მშობლები კი უმუშევრები არიან. ჩემი ხელფასი ჩვენი ოჯახისთვის დიდ რამეს ნიშნავდა. დამთავრებული მაქვს პუშკინის სახელობის სახელმწიფო პედაგოგიური ინსტიტუტი. ბიბლიოთეკაში 37 წელი ვიმუშავე. დღეს მე გამომიშვა გარეთ და დატოვა არასპეციალისტები და ახალი მიღებულები. რაიონის ხელმძღვანელობასაც მივმართე, მაგრამ უარით გამომისტუმრეს. ალბათ, იმიტომ, რომ მე ვერც კარებს შევუნგრევ ვერავის, ვერც გავლანძღავ და წინააღმდეგობას ვერ გავუწევ."
ბრალდებებს უარყოფს ააიპი "გურჯაანის საბიბლიოთეკო და სამუზეუმო გაერთიანების" დირექტორი მაია ბეროშვილი.
"ამ დროისთვის თანამშრომლების ნაწილი ავიყვანე, ნაწილი კი ჯერ არ შემირჩევია. პროცესი კიდევ გრძელდება და საბოლოო შედეგები სავარაუდოდ ორშაბათისთვის იქნება ცნობილი. თანამშრომლების ის კატეგორია, ვინც რჩება, ყველა სპეციალისტი და სისტემაში ნამუშევარია. რაც შეეხება ტესტირებას, ააიპი-ებში არ არის მოთხოვნა, რომ მაინც და მაინც ტესტირება უნდა ჩატარდეს და თანამშრომლები ისე დაინიშნონ," _ გვითხრა მან.
აღნიშნულ თემასთან დაკავშირებით კომენტარისთვის გურჯაანის მუნიციპალიტეტის გამგებელსაც მივმართეთ, თუმცა, მან ამ საკითხზე საუბარი არ ისურვა.
მასალის გამოყენების პირობები