სოფელ ჩუმლაყის მოსახლეობა ამბულატორიის ცენტრში გადმოტანას ითხოვს.
ჩუმლაყის მკვიდრის მარინა ბალუაშვილის თქმით, შენობაში არასათანადო პირობებია.
"მართალია, ამბულატორია ძალიან შორს არ არის, მაგრამ ფეხით მიმავალისთვის, თან მითუმეტეს თუ ბავშვიც მიგყავს, ცოტა რთული მისადგომია. გარდა ამისა, შენობა სტანდარტებს არ აკმაყოფილებს და პირობებიც არ არის ნორმალური. "-აღნიშნა მან.
მის აზრს იზიარებს ამავე სოფლის მკვიდრი ნატო ყოჩაშვილიც.
"ამბულატორიაში მისვლა ცოტა ჭირს, გზაც დაზიანებულია. სამედიცინო დაწესებულება უნდა გადმოვიდეს სოფლის ცენტრში, გამგეობის ყოფილ შენობაში, რადგან ყველასთვის მოსახერხებელია აქ მოსვლა და ფართიც დიდია. "
"უკვე წლებია ამაზე ვლაპარაკობთ, მაგრამ ყურადღება არავინ მოგვაქცია, არც წინა ხელისუფლებამ და არც ამათ. თითქმის ყოველ წელიწადს სოფლის კრებაზე ამ საკითხს ვაჟღერებთ. გვპირდებიან, მაგრამ უშედეგოდ. წელსაც კრებაზე გამგეობის წარმომადგენლები დაგვპირდნენ, რომ ამბულატორიას აქ გადმოიტანდნენ, მაგრამ ზაფხულში ისევ იმ ძველი შენობის რემონტი დაიწყეს. მაინცდამაინც ქუჩაში უნდა გამოვიდეთ, რომ რამე რეაგირება მოჰყვეს? "-გვითხრა ამავე სოფლის მაცხოვრებელმა აკაკიმ, რომელმაც გვარის დასახელებისგან თავი შეიკავა.
ჩუმლაყის მაჟორიტარი დეპუტატის გია შაოშვილის თქმით, მოსახლეობამ ამ პრობლემით მასაც მიმართა.
"ადგილობრივებს მოქმედი ამბულატორიის შენობაში მისვლა უჭირთ. სოფლის კრებაზე დაისვა საკითხი, რომ მაგისტრალზე მდებარე შენობა, რომელიც ავარიულ მდგომარეობაშია, გარემონტებულიყო და სამედიცინო პუნქტი იქ განთავსებულიყო. ვიცი, რომ ამ შენობის შეკეთება ძალიან ძვირი დაჯდება. რაღაც გამოსავალი ვიპოვე, მაგრამ არ ვიცი მოვლენები როგორ განვითარდება. მინდა, მოქმედი ამბულატორია პირობით გავაყიდინო. თუ ასე მოხდა, ადგილობრივი ბიუჯეტიდან ბევრის დამატება აღარ დასჭირდება. მთელი სოფელი დარაზმულია, რომ ეს საქმე გაკეთდეს."
გურჯაანის მუნიციპალიტეტის გამგეობის, პრესასთან და საზოგადოებასთან ურთიერთობის განყოფილების უფროსის ზვიად ბიაშვილის განმარტებით, მომავალ წელს ეს საკითხი შეიძლება დღის წესრიგში მართლაც დადგეს.
"სოფლის კრებაზე ნამდვილად დასვეს ეს საკითხი. შენობა, რომელსაც მოსახლეობა ითხოვს, საკმაოდ ცუდ მდგომარეობაშია. მის რეაბილიტაციას დიდი თანხა დასჭირდება. სოფლის მხარდაჭერის პროგრამის ფარგლებში გათვალისწინებული თანხიდან ეს შეუძლებელი იყო, ამიტომ არსებული ამბულატორია გარემონტდა. მომავალ წელს ეს საკითხი შეიძლება მართლაც გადაიხედოს. თუმცა, არც არსებული ამბულატორიაა ცუდ მდგომარეობაში. ჩაუტარდა კოსმეტიკური რემონტი, მოეწყო სველი წერტილები და ა. შ. ასე რომ, მოქალაქეებს იქ არანაირი პრობლემები არ აქვთ. "-აღნიშნა მან.
შეგახსენებთ, რომ წელს "სოფლის მხარდაჭერის პროგრამის" ფარგლებში სოფელ ჩუმლაყისთვის 65 759 ლარი გამოიყო. ამბულატორიის რეაბილიტაციისთვის კი თორმეტიათას ოცდაშვიდი ლარი დაიხარჯა.
მასალის გამოყენების პირობები