"ერთიანი ნაციონალური მოძრაობის" ერთ-ერთმა ლიდერმა ზურაბ ჭიაბერაშვილმა პენსიონერების ახლანდელ მდგომარეობასა და პენსიის გაზრდის შესაძლებლობაზე ისაუბრა. მისი თქმით, 2016 წელს პენსიების 50 ლარით ზრდა შესაძლებელია: „საზოგადოების ყველაზე მოწყვლად და გაჭირვებულ ფენას პენსიონერები მიეკუთვნებიან, რომელთაც ეკონომიკურმა კრიზისმა და ფასების ინფლაციამ ყველაზე დიდი დარტყმა მიაყენა. 10%-ით არის გაზრდილი ფასები მედიკამენტებსა და ჯანდაცვაზე, 7%-ით - კომუნალურ გადასახადებზე. ასეთ პირობებში პენსიის არგაზრდა პენსიონერთა დიდი ნაწილის სიღატაკისთვის გაწირვას ნიშნავს. გასათვალისწინებელია, რომ ბოლო 3 წლის განმავლობაში ჯანდაცვის სამინისტრომ საარსებო შემწეობა მოუხსნა 30,000 პენსიონერს, რომელთაგან ნახევარზე მეტი მარტოხელაა და უკიდურეს სიღარიბეში ცხოვრობს. იმავე პერიოდში, ბოლო 3 წლის განმავლობაში სახელმწიფო ბიუროკრატიის პრემიებსა და დანამატებზე 400 მლნ ლარამდეა დახარჯული მაშინ, როცა პენსიის 50 ლარით გაზრდას 420 მლნ ლარი სჭირდება. რომ არა ბიუროკრატიის “გამოსაკვებად” გათვლილი უამრავი არაფრისმომცემი პროგრამა, რომელიც ბიუჯეტშია ჩადებული და რომელიც ეკონომიკური ზრდის ერთ-ერთი ძირითადი შემაფერხებელი ფაქტორია, “ქართული ოცნების” მიერვე წარმოდგენილ 2016 წლის ბიუჯეტში შესაძლებელია გათვალისწინებული იყოს პენსიის 50-ლარიანი ზრდა. ამისათვის საჭიროა ბიუროკრატიის შემცირება, უსარგებლო პროექტების დაფინანსების შეწყვეტა, საყოველთაო დაფინანსებიდან მიზნობრივი ჯგუფების დაფინანსებაზე გადასვლა. ერთიან ნაციონალურ მოძრაობას აქვს კონკრეტული გეგმა, როგორ გავხადოთ სახელმწიფო ბიუჯეტის სოციალური ნაწილი მიზნობრივ ჯგუფებზე ორიენტირებული". შეგახსენებთ, რომ მომავალი წლის ბიუჯეტის განხილვისას საქართველოს ფინანსთა მინისტრის მოადგილემ გიორგი კაკაურიძემ განაცხადა, რომ 2016 წლის სახელმწიფო ბიუჯეტში პენსიების მატება გათვალისწინებული არ არის. აღსანიშნავია, რომ 2014 წლის ბოლოს მომავალი წლის ბიუჯეტის პროექტის წარდგენისას, ფინანსთა მინისტრ ნოდარ ხადურის განმარტებით, 2015-2016 წლებში პენსიები ეტაპობრივად მოიმატებდა. 2015 წლის სექტემბერში პენსია 10 ლარით გაიზარდა და 160 ლარი გახდა. 2016 წლისთვის დანაპირები ვერ შერულდება, რადგან დამატებით 57 მილიონი ლარი საჯარო მოხელეების ხელფასებისთვის არის გათვალისწინებული.