გუშინ პრემიერმინისტრი ირაკლი ღარიბაშვილი რეგიონული ტურნეს ფარგლებში კახეთს ეწვია. მან საგარეჯოს მუნიციპალიტეტის სოფელ ლამბალოში მშენებარე სკოლა, თელავში შპს "ვაზიანის"ღვინის ქარხანა, ყვარლის მუნიციპალიტეტის სოფელ ენისელში ახლადგაშენებული ვენახი მოინახულა. პრემიერი გურჯაანის მუნიციპალიტეტის სოფელ ქოდალოს მოსახლეობასაც შეხვდა, კურდღელაურსაც სტუმრობდა, სადაც აეროდრომი და საქართველოს საავიაციო უნივერსიტეტის ფილიალი უნდა აშენდეს. პრემიერი ალავერდის საკათედრო ტაძარსაც სტუმრობდა. საღამოს კი კახელებს თელავიდან მიმართა: "დღეს მე ამაყი ვარ, რომ კახეთის მიწაზე ვდგავარ. აქ, მეფე ერეკლეს ქალაქში, არა ერთხელ გადაწყვეტილა საქართველოს ბედი. კახეთი ბევრი განსაცდელის წინაშე დამდგარა, მაგრამ ყოველთვის მედგრად დახვედრია გასაჭირს - კახეთი ყოველთვის გადარჩა და მთელი საქართველო იხსნა ფიზიკური და სულიერი განადგურებისაგან. ეს ძალა კახეთს არასოდეს დაუკარგავს და დღესაც მყარად დგას ფეხზე. კახელებმა განუწყვეტელი ომების ქარცეცხლში გამოატარეს და გადაარჩინეს თავისი მთავარი განძი და ფასეულობა - ქართული ვაზი. სწორედ ამიტომ არის ვაზი და ვენახი კახელი კაცისთვის წმინდა. ეს არის ჩვენი ფესვები და სწორედ ამ შეგნებით უვლის და იცავს გლეხი კაცი ვაზს. მაგრამ ჩვენ ისეთ დროსაც მოვესწარით, როცა კახელი გლეხი თავისი ხელით ჩეხდა ვენახს. ვაზისა და ღვინის ქვეყანაში ასეთი რამ აღარ უნდა მოხდეს. ამას ჩვენ არ დავუშვებთ! ჩვენ ვზრუნავთ მევენახეობაზე, ხელს ვუწყობთ მის გადარჩენასა და განვითარებას. სწორედ ამ მიდგომით ჩავატარეთ გასულ შემოდგომაზე ისეთი რთველი, რომლის პრეცედენტიც ბოლო ოცი წლის განმავლობაში საქართველოს არ ახსოვს. თამამად შემიძლია ვთქვა, რომ არ დარჩენილა გლეხი, რომელსაც ყურძენი ჩაუბარებელი დარჩა. დღეს კახელ გლეხს შრომა უფასდება. ეს ნამდვილად დიდი სტიმულია ჩვენი ხალხისთვის."– აღნიშნა მან. ამომრჩეველს მხარდაჭერისაკენ თელავის მერობის კანდიდატმა პლატონ კალმახელიძემაც მოუწოდა. "ამ ქალაქში დავიბადე და გავიზარდე, მიყვარს ეს ქალაქი და მინდა, ჩემი გამოცდილებით ვემსახურო ჩემს ხალხს, გვერდში დავუდგე და დავეხმარო პრობლემების მოგვარებაში! კარგად მოგეხსენებათ, რომ ის, რაც წლების განმავლობაში ფუჭდებოდა, ერთი ხელის მოსმით ვერ გაკეთდება, მაგრამ მე და ჩვენი გუნდი მდგომარეობის გამოსასწორებლად ძალ-ღონეს არ დავიშურებთ. გვახსოვდეს - ჩვენი ძალა ჩვენს ერთობაშია, მე თქვენი მხარდაჭერა მჭირდება, თქვენ - ჩემი გვერდში დგომა! ყველა ცვლილებას ერთად დავგეგმავთ, ერთად ვიბრძოლებთ, რომ ეს უძველესი და ულამაზესი ქალაქი უფრო ძლიერი და ლამაზი გახდეს, რომ ყველას გვიხაროდეს აქ ცხოვრება!დიდი ილიას შეგონებას , ჩვენი თავი ჩვენამდე გვეყუდნესო, „ქართული ოცნება“ 15 ივნისს რეალობად გვიქცევს - თავად გავხდებით ჩვენი ქალაქის ბედის გამგებლები! თელავი მნიშვნელოვანი სატრანსპორტო კვანძი, სამრეწველო, სასოფლო-სამეურნეო და კულტურული ცენტრია. ღვინის სამშობლოს მთავარ ქალაქს ყველა რესურსი აქვს იმისათვის, რომ ღვინის მსოფლიო დედაქალაქად იქცეს. ეს ტურიზმის განვითარებას, ინვესტიციების მოზიდვასაც შეუწყობს ხელს. გპირდებით, ერთად ავიხდენთ ოცნებას, ერთად ვაქცევთ ჩვენი ქალაქის დიდ შესაძლებლობებს ჩვენი ოჯახებისა და შვილების კეთილდღეობად."