"სპექტრის" საახალწლო ნომერში რუბრიკა "ბლიცის" სტუმარი გიორგი სიბაშვილია. ყოფილმა ვიცე-გუბერნატორმა ჩვენთან ბოლო პერიოდში განვითარებული მოვლენები შეაფასა. სამსახურებრივი უფლებამოსილების ბოროტად გამოყენებასა და სახელმწიფო ქონების მითვისება-გაფლანგვაში დადანაშაულებული სიბაშვილი ბრალს არ აღიარებს და დარწმუნებულია, რომ სიმართლის დამტკიცებას შეძლებს. რას ფიქრობს ძველ და ახალ ხელისუფლებაზე, შეჩერებულ თუ გაგრძელებულ პროექტებზე, დემოკრატიასა და მონარქიაზე. ვისთან ერთად დადიოდა თელავის კორპუსების სახურავებზე,-ეს იმ კითხვების არასრული ჩამონათვალია, რომლებზე პასუხებსაც ექსკლუზიური ინტერვიუდან მიიღებთ. -ბატონო გიორგი, თავდაპირველად დავიწყოთ ბოლო ამბით-სასამართლო სხდომებით. რატომ ჭიანურდება ეს პროცესი, რატომ ხდება თქვენი სასამართლო სხდომების გადადება? -ზოგადად, ჩემი სასამართლო ორი ნაწილისგან შედგება. ჯერ იყო წინა სასამართლო, რომელიც სამ სხდომად ჩატარდა. შემდეგ საქმის არსებითი განხილვა კი, 10 აპრილს დაიწყო, დღეს უკვე მეჩვიდმეტე სხდომა გაიმართა. საქმეში გათვალისწინებულია, რომ არსებით სხდომაზე გამოკვლეული უნდა იყოს მტკიცებულებები და დაიკითხოს 51 მოწმე. ჯერ ნახევარზეც არ ვართ მისულები. არ ვიცი რატომ არ ხდება მოწმეთა იმ რაოდენობის მოყვანა, რომ სასამართლო დროულად დასრულდეს. სამუშაო რეჟიმი ისეა ჩანიშნული, რომ 10 მოწმის დაკითხვას ჩვენ თავისუფლად მოვასწრებდით, მაგრამ გადადებას თავი დავანებოთ, სხდომა რომ ტარდება, მაშინაც არ მოჰყავთ იმ რაოდენობის მოწმე, რომ ინტერესი არსებობდეს. ჩემი ხედვით საქმემ ინტერესი დაკარგა. თუ არ ვცდები, დღეის მდგომარეობით 14 მოწმეა დაკითხული. არც ერთ მათგანს მინიშნებაც კი არ გაუკეთებია, რომ სიბაშვილმა რამე სახის დანაშაული ჩაიდინა. სხვა აქ რა კომენტარი უნდა გავაკეთო. 29 იანვარს ერთი წელი შესრულდება, რაც ბრალი წამიყენეს, ფაქტობრივად, მე ე.წ. ძალიან დიდი პოლიტიკური თამაშის მსხვერპლი აღმოვჩნდი. მახსენდება ფინანსური პოლიციის საზოგადოებასთან ურთიერთობის სამსახურის ბრიფინგი. ჩემს საქმესთან დაკავშირებით იმდენად ვრცელი ბრიფინგი ჩატარდა, საქართველოში, ყველა ვინც მიცნობდა, ფიქრობდა, თურმე ეს ვინ ყოფილაო. -ბატონო გიორგი, რატომ იცავთ თქვენს თავს თავად? -მე ვარ ადვოკატი. წავედი სამოქალაქო სექტორში. მქონდა, მაგრამ კიდევ დავაფუძნე საადვოკატო ფირმა. დღეს უკვე ვითვლები საერთო სპეციალიზაციის მქონე ლიცენზირებულ ადვოკატად და ვმოღვაწეობ სამოქალაქო სექტორში. როდესაც მაქვს ამის საშუალება, რატომ არ უნდა დავიცვა საკუთარი თავი მე თვითონ, იმ ფონზე, როცა შეუძლებელია მოცემული საქმე ჩემზე კარგად ვინმემ იცოდეს. მათ შორის ბრალდების მხარემაც კი. იმიტომ, რომ იქ რამდენჯერმე შეიცვალა პროკურორი. -როგორ ფიქრობთ, მაინც როდისთვის დასრულდება თქვენი სასამართლო პროცესი და რა პროგნოზს გააკეთებდით, რა შედეგით დასრულდება? -თუ ჩვენ ვიანგარიშებთ პროცესუარულად, რომ ერთ სასამართლო სხდომაზე მოჰყავთ ორი მოწმე, თვეში იმართება ორი სასამართლო სხდომა, დაახლოებით წელიწად ნახევარი კიდევ სჭირდება საქმის დასრულებას, ანუ, მტკიცებულებათა სრულად გამოკვლევას. როდესაც ბრალი წამიყენეს, მაშინ ვთქვი, რომ მე დავამტკიცებ ჩემს უდანაშაულობას და მე ამის იმედი მაქვს. -დღეს "ერთიანი ნაციონალური მოძრაობა" ძალიან ხშირად აღნიშნავს, რომ სასამართლოც კი არის მიკერძოებული. აქედან გამომდინარე მინდა გკითხოთ, თქვენ დარწმუნებული ხართ, რომ შეძლებთ თქვენი სიმართლის დამტკიცებას? -კონკრეტულ შემთხვევაში ძალიან ძნელია რამე თქვა. მე ის ვიცი, რომ დანაშაული არ ჩამიდენია. მე ის ვიცი, რომ ვამაყობ იმ გაკეთებული საქმეებით, რაზეც ბრალი მაქვს წაყენებული. სუვენირების ეპიზოდია, სადაც მედავებიან (კერძო პირის შემოწირულობით ნაყიდი სუვენირებია, სხვათა შორის, კახეთის ტურიზმის განვითარების მასშტაბებშით იყო ეს პროექტი). მედავებიან იმაზე, რატომ შეიძინეთ საქართველოში და არა- ჩინეთში. მაშინ შეუძლიათ იმაზეც ჩვენ მოგვედავონ, ქალაქის ბაღში ლოკოკინას და მეარღნეს მონუმენტები რომაა. ისიც ჩვენ შევუკვეთეთ და კახეთის რეგიონული განვითარების სააგენტოს მეშვეობით არის იქაც თანხა გადარიცხული. შეიძლება ისიც თქვან, რატომ დაამზადა მონა ვარდისაშვილმა და არ დაამზადა ვინმე ვარდისუბნელმა "ჟესტიანშიკმა." კიდევ ერთხელ ვიმეორებ, ჩემს მიერ წარმოდგენილი დოკუმენტებით ჩემს უდანაშაულობას აუცილებლად დავამტკიცებ. ეს ბრალის წაყენების დღეს ვთქვი და დღემდე ვამბობ. სასამართლო სხდომებიც ისე მიდის, რომ ჯერჯერობით არც ერთ მოწმეს არ უთქვამს, რომ რომელიმე საქმეზე დანაშაულის ნიშნები არსებობს. ფურცელი არ წარმოებს, რომელზეც შავით თეთრზე წერია, რომ სიბაშვილმა ჩაიდინა ესა და ეს დანაშაული. -აქვე მინდა გკითხოთ ყოფილი პრემიერ-მინისტრის, ვანო მერაბიშვილის მიერ რამდენიმე დღის წინ გაკეთებული სკანდალური განცხადების შესახებ. -მე მაგალითად, ხელისუფლების ადგილზე დავიწყებდი გამოძიებას. თუ დავინახავდი, რომ ეს ყველაფერი ტყუილია, უფრო მაგარი იქნებოდა ჩემთვის. კითხვა მაქვს, რატომ არ უნდა ვენდო ვანო მერაბიშვილს და რატომ უნდა ვენდო თინა ხიდაშელის განცხადებას. ჩატარდეს გამოძიება, ამოიღონ ის კადრები, თუ იქიდან ვანო მერაბიშვილი არ გამოუყვანიათ, ჩავთვალოთ, რომ ის ტყუის. მოქმედი კანონმდებლობით, თუ გამოძიება არ იქნა დაწყებული-ფირები საჯარო ვერ გახდება. ამიტომ ჯობია, დაიწყოს გამოძიება და გააჩუმონ ვანოც და ვანოს მხარდამჭერებიც. -თქვენ აღნიშნეთ, რომ პოლიტიკური თამაშის მსხვერპლი გახდით. რა პოლიტიკურ თამაშს გულისხმობთ, რომ დააკონკრეტოთ. -ზოგადად ინტერესი, რომ სიბაშვილი უნდა ყოფილიყო ბრალდებული, ფაქტობრივად არსებობდა. ბაკალავრიატის იურისტმა რომ ნახოს ჩემი ბრალის წაყენების დადგენილება, ისიც კი მიხვდება, რომ იქ ყველაფერი რიგზე არ არის. მე ვფიქრობ, რომ ეს იყო ტვირთი, რომელიც მე უნდა მეტარებინა გარკვეული დროის განმავლობაში. თქვენ წარმოიდგინეთ, რომ სიამოვნებით ვატარებ. -სიამოვნება რაში მდგომარეობს? -სიამოვნება არის გაკეთებულის ტკბობაში. ზუსტად ის დროა ეხლა, რომ გაკეთებულით იამაყო. ისეთ ეპიზოდებში წამიყენეს ბრალი, რითიც სიცოცხლის ბოლომდე მეც და ჩემი მომავალი თაობაც ვიამაყებთ. შეიძლება ვინმემ ამას ფასადური უწოდოს, შეიძლება იარლიყი მიაწებოს, მაგრამ მე ვამაყობ ამით, რომ ეს ჩემს პერიოდში ხდებოდა. რატომ გააკეთეო, იმაზე გსჯიან ხო? -თქვენი საუბრიდან გამომდინარე, შეიძლება ვიგულისხმოთ, რომ თქვენი აზრით, ახალი ხელისუფლება პოლიტიკური თამაშისთვის ძლიერ კანდიდატებს, ძლიერ მოწინააღმდეგეებს სჯის? -მე არ ვთვლი, რომ ძლიერი კანდიდატი ვარ. მე ვარ ჩემი ქვეყნის მსახური. ძალიან ბევრ ხელისუფლებაში მიმუშავია. როდესაც გურჯაანის გამგებელი ვიყავი, მაშინ შევარდნაძის ხელისუფლება იყო. შემდეგ "ნაციონალური მოძრაობის" ხელისუფლებაში ვმუშაობდი. რითიც ვამაყობ. ეს იყო ზუსტად ის განსხვავებული წლები, რომელიც მგონია, რომ უახლოეს პერიოდში არ განმეორდება. მინდა, რომ ამ ხელისუფლებამ ნაწილობრივ მაინც შეძლოს იმ აღმშენებლობის გაგრძელება, რაც ქვეყანაში მიმდინარეობდა. რაც შეეხება იმას, რომ ჩემი გამოცდილება მაძლევს საქმის კარგად კეთების საშუალებას და კარგი მენეჯერი ვარ, თუ ამის გამო ვიღაცისთვის ძლიერი მოწინააღმდეგე ვარ, ეს მისი პრობლემაა. ვინც არ უნდა იყოს ხელისუფლებაში, ყოველთვის დავრჩები ჩემი ქვეყნის პატრიოტად, ჩემი პრინციპების ერთგულად. ყველაზე მნიშვნელოვანია, რომ რა რაოდენობის და როგორი ხარისხითაც არ უნდა ჰქონდეს ადამიანს ღირსება, ისე უნდა უფრთხილდებოდეს, რომ არ დაკარგოს. ცხოვრება ისეთი რამ არის, შეიძლება შენი დაკარგული ღირსება წინ დაგხვდეს და შენვე მოგიწიოს მასზე ფეხის დაბიჯება. ამას ადამიანმა ანგარიში უნდა გაუწიოს.Mმე ყოველთვის ასე მოვდივარ. -ბატონო გიორგი, ხომ არ გქონიათ შემოთავაზება რომელიმე თანამდებობაზე „ქართული ოცნების“ მხრიდან? რომ ყოფილიყო ასეთი შემოთავაზება, ან თეორიულად რომ დავუშვათ, რა შემთხვევაში შეიძლება დაეთანხმოთ? -არ ყოფილა და არც უნდა ყოფილიყო, ლოგიკურად რომ ვიმსჯელოთ. -როგორც მახსოვს ვიცე-გუბერნატორის თანამდებობა იქამდე დატოვეთ, სანამ ბრალს წაგიყენებდნენ. პირადი განცხადების საფუძველზე წამოხვედით. რატომ? -თანამდებობაზე გამოკერებული ადამიანი არასდროს ვყოფილვარ. ყოველთვის აქტიურად ვიყავი ჩართული არა პოლიტიკურ, არამედ სამეურნეო საქმიანობაში. გუბერნიისთვის ეს ერთი წელი (საპრეზიდენტო არჩევნებამდე) შედარებით გათიშული პერიოდი იყო. მე ვერ ვიქნებოდი ამ პერიოდში იქ. რისთვის დავრჩენილიყავი, იმიტომ რომ ხელფასი მიმეღო? ამიტომ დავწერე განცხადება და წამოვედი. მაშინ დაკითხულიც კი არ ვიყავი. ჩავთვალე, რომ ასე სჯობდა. თუმცა ეს არ ნიშნავს, რომ "ნაციონალურ მოძრაობასთან" ურთიერთობა გავწყვიტე, პირიქით, პოლიტიკურად უფრო მოვიცალე. სახელმწიფო სტრუქტურაში მუშაობა ჩემთვის ჰობი და პანაცეა არ არის. ჰობი არის ის, რასაც წლების წინ "ბარისტერში" (საადვოკატო ბიურო, ავტ.) ვაკეთებდი და რასაც ახლა ვაკეთებ. დღეს ვარ ლიცენზირებული ადვოკატი და წავედი სამოქალაქო სექტორში. ეს ფრაზა ძალიან მომწონს. -ერთი წლის განმავლობაში, ახალმა ხელისუფლებამ გადადგა ისეთი ნაბიჯი, რაც თქვენთვის, პოლიტიკური იდეოლოგიის განსხვავების მიუხედავად, მისაღები და მოსაწონია? -რამე პროექტი განხორციელდა? თქვენ უნდა დამისახელოთ ეს რომელიმე პროექტი და მე გეტყვით მისაღებია თუ არა. დღეს "ფეისბუქზე" ვკითხულობდი, ფინანსთა მინისტრმა დაახლოებით ასეთი რამ თქვა:-დავიღალეთ ობიექტების გახსნითო. დაგვცინის-მეთქი კომეტარი გავაკეთე. რეგიონში რა შიდაპროექტები განხორციელდა, მე არ ვიცი. ერთი ის ვიცი-ე.წ "კაკლის ყურის" ნაპირსამაგრი სამუშაოებისთვის გამოიყო მილიონი ლარი. ვთვლი, რომ გარემოს დაცვის თვალსაზრისით მნიშვნელოვანი პროექტია. მაგრამ აგერ არის ჭავჭავაძის ქუჩა (თელავში ავტ.) ჩვენი დაწყებული პროექტია, მაგრამ შეჩერდა. იმიტომ, რომ მუნიციპალიტეტმა დაფინანსებაზე უარი განაცხადა. როგორ ვთქვათ, რომ ყიტაანის გზა გააკეთეს გურჯაანში და არ მომწონს-მეთქი. კიდევ ვიმეორებ-გრძელვადიან გეგმებში ეს პროექტები ჩვენი გაწერილი იყო. გამიხარდებოდა "ქოჩების ტბის" სარეაბილიტაციო სამუშაოებიც გაგრძელებულიყო,მაგრამ არ მომწონს როცა ვიგებ, რომ "ილიას ტბაზე" ყვარელში "ჩერდაკები" ჩაუდგამთ დამატებით. თუ პოლიტიკურ შეფასებებს მივცემთ, ძალიან შორს წაგვიყვანს, იმიტომ, რომ ბევრი დაპირება არ შესრულდა. არ დავპირდებოდი, თუ ამის გაკეთებას ვერ შევძლებდი. -როდესაც შეიცვალა ხელისუფლება, ძალიან ბევრმა საჯარო მოხელემ (გამგებელი, საკრებულოს თავმჯდომარე და ა.შ) პირადი განცხადების საფუძველზე თანამდებობები დატოვა. თქვენი პოზიცია მაინტერესებს, ნამდვილად პირადი სურვილის საფუძველზე იწერებოდა განცხადებები? -ესენი ამბობენ, რომ განცხადებები დაწერეს პირადი სურვილის საფუძველზე, მაგრამ მე მაქვს საფუძვლიანი ეჭვი, ვივარაუდო, რომ მათზე იყო ზეწოლა. -ეჭვის საფუძველს რა გაძლევთ? -ის კონკრეტული ფაქტები, რაც მე გამაჩნია. -რა ფაქტებზე საუბრობთ? -აქ იმაზე არ არის საუბარი გამგებელი განცხადებას დაწერდა თუ არა. იგივე ახმეტის მაგალითზე: საკრებულო შეცვალეს და გამგებელი რა პრობლემაა?! ძალიან ბევრი შემთხვევაა, რომ თვითონ დაწერეს და წავიდნენ, თუმცა აბსოლუტურად ყველაზე იყო შეთვლა. -რა სახის შეთვლა იყო, გაქვთ ინფორმაცია? -მე მაქვს საფუძვლიანი ეჭვი, თუ არ დატოვებდნენ, ისინი ზეწოლას განახორციელებდნენ. რასაც ე.წ შეთვლა ჰქვია. -და რას უთვლიან ხოლმე შეგიძლიათ გვითხრათ? -არ ვიცი, რას უთვლიან ხოლმე, ეს მათ უნდა ჰკითხოთ. გუშინ "ფეისბუქზე" ვნახე სიღნაღის საკრებულოს სია. პიროვნებები ხელს აწერენ სხდომაზე გამოცხადების შესახებ. დღეს კი აღარ არიან "ნაციონალური მოძრაობის" წევრები, "ოცნებაში" გადაბარგდნენ, მაგრამ უწერიათ-სახელი, გვარი და ისევ "ნაციონალური მოძრაობა." შეცვალე რა. წეღან ღირსებაზე ვისაუბრე. მგონი გურჯაანის ტელევიზიის სიუჟეტი ვნახე, საკრებულოს ერთ-ერთი წევრი ამბობდა, ორიენტაცია შევიცვალე და "ქართული ოცნების" წევრი გავხდიო. იმ წუთებში ჩემი თავი შემეზიზღა. თქვენ როგორ ფიქრობთ, ამ შემთხვევაში მათ რაიონის ინტერესები ამოძრავებთ? როგორ შეიძლება პიროვნებამ არჩევნებამდე სამი დღით ადრე მკერდი მოგიშვიროს ღირსების ორდენის დასაკიდად და არჩევნების მეორე დღეს თქვას, ღირსებაშელახული ვიყავიო. ჩემზე კარგად ხელისუფლებათა ცვლილებები არავინ იცის. წლების წინ გაზეთი "გურჯაანის ქრონიკა" გამოდიოდა, სადაც ჩემი ინტერვიუ დაიბეჭდა. მაშინ ვთქვი-"მე მივდივარ იმიტომ, რომ მოვიდე." რამდენიმე შემოთავაზების მიუხედავად, გურჯაანის გამგებლობაზე ყოველთვის უარს ვამბობდი. ერთი და იმავე მდინარეში ორჯერ ვერ შეხვალ. იგივეს ვიტყვი ახლაც, მაგრამ ეს არ ნიშნავს, რომ შენ რაღაც ფოკუსიდან ამოვარდები და კონცენტრაცია აღარ გექნება. ამ ადამიანებს, როდესაც შევარდნაძის ხელისუფლება სააკაშვილის ხელისუფებამ შეცვალა, მაშინაც ზუსტად ეს პოზიცია ეკავათ. იქამდე კი კომუნისტები და ზვიადისტები იყვნენ. -გიორგი ღვინიაშვილის გუბერნატორობისა და თქვენი ვიცე-გუბერნატორობის პერიოდში კულუარულად საუბრობდნენ, რომ თქვენს შორის განხეთქილება იყო. თქვენ თქვენი კადრი გყავდათ და მას თავისი. -მე არ გიდასტურებთ ამ ინფორმაციას. მაშინაც და ახლაც მეგობრები ვიყავით და ვართ. საქმის კეთების თვალსაზრისით გუნდური პრინციპით ვმუშაობდით. ამის ხაზგასმა ძალიან მნიშვნელოვანია. რაც შეეხება საკადრო პოლიტიკას, მეც ვახორციელებდი და თვითონ გუბერნატორიც. თუმცა იყო შემთხვევები, როცა ჩემმა, ან მისმა დანიშნულმა კადრმა არ გაამართლა და ხდებოდა პერმანენტულად ცვლა. -მაშინ რა იყო ასეთი ჭორის გავრცელების მიზეზი? -სხედან და ამაზე მუშაობენ. ამისთვის ადამიანები, არაოფიციალურად არიან დასაქმებულები. ხანდახან მეც მითქვამს ისეთი რაღაც, თვითონვე რომ დამჯერებია. ეს ჩვეულებრივი ამბავია. -2008 წელს, როდესაც ვიცე-გუბერნატორად დაინიშნეთ, ძალიან ბევრი იწერებოდა, რომ კახეთში საკადრო პოლიტიკას თქვენ წყვეტდით. მაშინ საუბრობდნენ, "ძმები სიბაშვილების" კლანზეც. "სიბაშვილების კლანი" როგორ იმოქმედებდა? თუ საუბარია იმაზე, რომ ჩემი ძმა გურჯაანში პოლიციის უფროსის მოადგილე იყო, ხაზგასასმელია, რომ კახეთის ვიცე-გუბერნატორად 2008 წლის 7 ოქტომბერს დავინიშნე. ის კი 2008 წლის 9 თებერვლს დაინიშნა პოლიციაში თანამდებობაზე. ანუ, დაახლოებით ერთი წლით ადრე, ვიდრე კახეთში ჩამოვიდოდი. გულწრფელად გეტყვით, ძალიან ბევრჯერ იყო შანსი, რომ გოჩა სიბაშვილი პოლიციის უფროსი გამხდარიყო, მაგრამ სამწუხაროდ ვერ გახდა იმიტომ, რომ მე ვიცე-გუბერნატორი ვიყავი. საქმე საქმეზე რომ მიდგეს, ისედაც მის კისერზე გადადიოდა გურჯაანში მიმდინარე პროცესები. -მაშინ საუბრობდნენ, რომ საპასუხისმგებლო თანამდებობაზე თქვენი მეგობრები და ნაცნობები ინიშნებოდნენ. -ზოგი მეგობარი იქნებოდა, ზოგი-ნაცნობი. მთავარია, კვალიფიკაცია ჰქონოდა. ნეპოტიზმზე მეც მედავებოდნენ. ლაგოდეხის გამგებელის, გიორგი გოზალიშვილის (რომელიც ახლა დეპუტატია) შვილი ჩემი შვილის ნათლიაა, იმიტომ, რომ შევარდნაძის დროსაც გამგებლები ვიყავით. მე რომ ჩამოვედი, ის უკვე გამგებლად დამხვდა. რა უნდა მექნა, საკითხი დამეყენებინა თანამდებობიდან გათავისუფლების შესახებ, რაკი მისი შვილი, ჩემი შვილის ნათლიაა? კიდევ ბევრის შვილის ნათლია ვარ, მაგრამ არსად მუშაობენ. -თქვენი მოწინააღმდეგეებიც კი აღნიშნავენ, რომ გიორგი სიბაშვილი პროფესიონალიაო. კარგი საჯარო მოხელე და კარგი პოლიტიკოსიაო. მაინტერესებს, რა არის მთავარი განმსაზღვრელი კომპონენტი კარგი პოლიტიკოსისთვის, კარგი საჯარო მოხელისთვის? -კარგია და მომწონს თუ ხალხი ასე ფიქრობს. მე საკუთარ თავზე ვერ ვისუბრებ. არასოდეს მიღალატია ჩემი პრინციპებისთვის. კახური პრინციპები მაქვს, ხშირად მეც არ მომწონს, მაგრამ არასოდეს მიღალატია. არ მიღალატია ჩემი ქვეყნისთვის და იმ გრძნობისთვის, რასაც სახელმწიფოებრივი აზროვნება და პასუხისმგებლობა ჰქვია. -ბატონო გიორგი, ძალიან აქტიურად წერთ "ფეისბუქზე" თქვენს მოსაზრებებს, აზიარებთ ინფორმაციებს. რა ადგილი უკავია თქვენს ცხოვრებაში ამ სოციალურ ქსელს? -გარკვეულ პერიოდში, ბოლო ერთი წელი ეკავა ადგილი. ახლა უბრალოდ აღარ მცალია. როგორც გითხარით, სამოქალაქო სექტორში წავედი. "ფეისბუქს" დღის ბოლოს თუ დავუბრუნდები ხოლმე. ინფორმაციის მიღების და შესაბამისად, აზრის გამოხატვის ბრწყინვალე საშუალებაა. -მიგაჩნიათ, რომ საჯარო მოხელის, პოლიტიკოსის გამოსვლებში ცოტა სარკაზმი და ირონია უნდა იყოს, იგივე ოპონირებისას? -თვითონ პოლიტიკოსს გააჩნია, ზოგს ირონიაც არ უხდება. რაღაც უნდა უხდებოდეს ადამიანს: ან ირონია, ან ღვარძლი. ჩვენს ქვეყანაში მიმდინარე ზოგი თემა ისეთია, რომ ირონია თვითონ მოდის. მე მაგალითად იურიდიული კომპანია გავაკეთე, სადაც 5-10 კაცი მეყოლება დასაქმებული. 41-მდე ვერ ავალ. თუ ამას 100 ქარხანა ჰქვია, კი ბატონო. ამიტომ როდესაც 100 ქარხნის გახსნაზე საუბრობენ, როგორ შეიძლება ამაზე არ გაგეცინოს და ირონია არ გქონდეს? -ანუ სარკაზმი და ირონია პოლიტიკური ბრძლის ერთ-ერთი კარგი საშუალებაა? ფეისბუქზე თქვენს კომენტარებში გაქვთ ხოლმე ასეთი მიდგომები. მაგალითად, წერდით: "ეს თოვლიც, რომ ამათ ჯინაზე მოვიდა." -როცა პოსტავ, ეს არის შენი შინაგანი განწყობა. 2008 წლის საპრეზიდენტო არჩევნები რომ იყო, ის თოვლი და ყინვა მინდა გაგახსენოთ. არ გახსოვთ, ხალხი მოგვყავდა მანქანებით და თურმე ჩვენს კონკურენტებს აძლევდნენ ხმას, რა უბედურება იყო. არც ერთხელ ამ წლების განმავლობაში გზები არ ჩაკეტილა. წელს კი, ამ 15 სმ-იან თოვლს გადაგვაყოლეს. -ეს ყველაფერი ხუმრობის ხასიათზე გაყენებთ? -როგორ არ დადგები, თოვლიც მაგათ ჯინაზე რომ მოვიდა. მარტო თოვლი? ყველაფერი ამათ საწინააღმდეგოდ მოქმედებს. -იყო დრო, რომ გუბერნიაში წამყვანი თანამდებობები გურჯაანელებს ეკავათ. დღეს ეს ტენდენცია შეიცვალა და დედოფლისწყარო გახდა, ასე ვთქვათ, წამყვანი მუნიციპალიტეტი. როგორ შეაფასებთ ამ ფაქტს? -ეს დროებითია. როდესაც რეგიონულ ხელისუფლებაში გურჯაანელები არ არიან, სხვების ხელისუფლებაში ყოფნა მცირე ხნით გრძელდება ხოლმე. სულ გურჯაანელები ხომ არ იქნებიან. განსხვავება ის არის, რომ გურჯაანელები არიან ხანგრძლივად, სხვა დანარჩენები მცირე ხნით. ჩვენ გურჯაანელები ოთხი წელი ვიყავით. -დედოფლისწყარო ვერ შეძლებს ოთხი წელი იყოს გუბერნიაში ამას გულისხმობთ? -ღმერთმა ქნას, მე გამიხარდება. მე ვიქნები პირველი, ვინც გამოვა, ხმამაღლა იტყვის და ტაშს დაუკრავს, თუUდავინახე, რომ კახეთში დაწყებული საქმეების გაგრძელების ნიშნები იქნება. -ირაკლი შიოლაშვილი როგორ შთაბეჭდილებას გიტოვებთ? -არ ვიცნობ. არანაირი შეხება არ მქონია. სავარაუდოდ, იმედი მაქვს, რომ თვითონაც არ მიცნობს. სიამოვნებით გავიცნობდი. ცხოვრება ისეთი რამეა, ალბათ, სადღაც შევხვდებით. წარმატებები მინდა ვუსურვო. -"ნაციონალური მოძრაობის" ცხრაწლიან მმართველობას როგორ შეაფასებდით, ბატონო გიორგი. რა იყო წარმატება და რა-შეცდომა? -ზოგადად, უშეცდომო არავინაა. ვინც საქმეს აკეთებს, ის შეცდომებს ყოველთვის უშვებს. ჩვეულებრივი აპრიორია. იყო თემები, რომელზედაც შეიძლება ვთქვა, რომ შესაძლებელია უკეთესადაც მოგვარებულიყო. მხედველობაში მაქვს საკადრო პოლიტიკა, სახელმწიფოებრივი აზროვნება და ზოგ შემთხვევაში უფლებების გადამეტება. თუმცა მე მინდა, რომ ასეთი აღმშენებლობის წლები კიდევ განმეორდეს,Mმაგრამ ეჭვი მეპარება. მსოფლიო აღაფრთოვანა იუსტიციის სახლმა. მეტყვით, რომ რას გვაყვედრით დენს, გაზს, Mმაგრამ შევარდნაძის პერიოდიც 21-ე საუკუნე იყო, მაგრამ დენის პრობლემა გვქონდა. ახლა დენი რომ ითიშება, ძალიან მწარედ განვიცდით ამას. -თუმცა ცოტა ხნის წინ იუსტიცისს სახლს ქარმა სახურავი რომ გადახადა, თქვენი მოწინააღმდეგეები აქტიურად საუბრობდნენ ამაზე. -პროექტი ფაქტიურად დაპატენტებული თემაა. შიგნიდან სახურავზე გიფსოკარდონის პრობლემა რომ შეიქმნა, ეს არაფერია, ასე შეიძლება საკუთარ სახლში, ჩემს მიერ გაკეთებული რაღაცეები დამიზიანდეს. ხელისუფლება უნდა შეიცვალოს, არავის აქვს ილუზია, რომ სულ ერთი და იგივე იყოს, მაგრამ რაც კარგია, ის გააგრძელე, რაც ცუდია-დაგმე. -რა უნდა გაეგრძელებინა და რა დაეგმო ახალ მთავრობას? -ყოველ შემთხვევაში, "ნაციონალური მოძრაობის" დაწყებული ყველა პროექტი გაჩერებულია. გააგრძელე რა, შე ოჯახაშენებულო და სიბაშვილი რომ ცუდი იყო და კახეთს ანგრევდა-იმ ცუდზე, იჩხუბე, იდავე, დაგმე. თუნდაც იგივე "ქოჩების ტბის" პროექტი. ვერ გააკეთებდნენო "ქოჩების ტბას." როგორ გავაკეთეთ ილიას ტბა? ილიას ტბაც ხომ ჩვენი გაკეთებულია. თუ არ ჩავთვლით იქ რესტორანსა და ახალ სასტუმროს-"ვილა ბატონი" ჰქვია მგონი. -თუმცაღა, ბატონო გიორგი, თქვენი ოპონენტები ამბობენ, რომ ბიზნესრეკეტი იყოო. ბიზნესმენებს ადებინებდნენ თანხას, რომ იგივე ყვარელი მოწყობილიყო და ა.შ -მე ბიზნესმენებიდან შემოწირული ფული ყვარლის რეაბილიტაციაში არ მახსოვს. შეიძლება რეგიონული განვითარების პროექტებში იყო რაღაც თანხა ჩარიცხული. თუმცა კიდევ ვიმეორებ, სახლში მიჰქონდა ვინმეს ის ფული? იძულების წესით გადახდილი ფული, ყოველ შემთხვევაში კახეთის რეგიონში, არ შემხვედრია. შეიძლება სადმე იყო. ბევრი ბიზნესმენი ვიცი, რომელიც სიამოვნებით აკეთებდა ქველმოქმედებას.Yყველაზე მთავარი და მნიშვნელოვანია, რომ დღეს ბიუჯეტში 600-700 მილიონი ლარი დეფიციტია. ესაა ყველაზე დიდი პრობლემა. როგორ, ბიუჯეტი არ ივსებოდა? იყო ასეთი შემთხვევა? ჩემი ოთხ წელიწადში რეგიონული განვითარების სააგენტოდან აღებული 13 000 ლარი პრემია გახდა სალაპარაკო. ჩაიხედეთ არასამთავრობოების კვლევაში. 18 000 000 ლარი გაიწერა შარშან დეკემბერში პრემიებზე. -ბატონო გიორგი, როგორ ფიქრობთ რა შეიცვალა ერთი წლის განმავლობაში. არის საუბრები, რომ მეტი დემოკრატიაა, თავისუფლების ხარისხი გაიზარდა. ამაზე გუშინ გამოქვეყნებულ NDI-ს კვლევაშიც იყო საუბარი. თქვენ თუ ხედვათ ამ ცვლილებებს? -მე საფუძვლიანი ეჭვი მაქვს, რომ კვლავ მისმენენ. ძალიან ბევრ ჩემს მეგობარს აქვს ასეთი საფუძვლიანი ეჭვი. კაი, ვთქვათ, რომ მე ბრალდებული ვარ, მაგრამ ხომ არიან ადამიანები, რომლებიც არ არიან ბრალდებულები, ხო? მოდი, ვთქვათ. თუ აღმოჩნდა, რომ ვანო მერაბიშვილის განცხადება მართალია, რომელ დემოკრატიის ხარისხზეა ლაპარაკი? არჩევნების მეორე დღეს, (2012 წლის საპარლამეტო არჩევნები ავტ.) რაც არ უნდა უცნაურად მოგეჩვენოთ, მეც გავიფიქრე და მეგობრებსაც ვუთხარი, საინტერესო რამ ხდება ამ ქვეყანაში-მეთქი. ანუ, ხელისუფლებაში მოდის სხვა ძალა, თვითმმართველობაში არის სხვა ძალა,Mმაგრამ ვინ დაგაცადა დემოკრატიის განვითარება?! თვითმმართველობებში ისეთი რაღაცეები მოხდა, ლამის ჯოხით გამოეკიდნენ ერთმანეთს. ეს ხომ ჩვენც დავინახეთ. -დემოკრატიიდან მონარქიაში რომ გადავინაცვლოთ. თქვენ "ფეისბუქის" გვერდზე სამეფო ოჯახთან დაკავშირებითაც გქონდათ კომენტარები. -სისულელეა. ვთვლი, რომ ვარ ერთი ჩვეულებრივი განათლებული ადამიანი და მიმაჩნია, ეს არის თანამედროვე საზოგადოების დაცინვა. ქართული საზოგადოება მენტალურად ნუ შევედრებით ინგლისის დედოფალს და მონარქიას. როგორ შეიძლება ორი ადამიანის, უკაცრავად და, ჯერ ერთად წოლას და ბავშვის ჩასახვას ველოდეთ ამდენი წელი, ეხლა თავზე დაექცათ ეს გვირგვინი.ეხლა კიდე ველოდოთ როდის გამოჩნდება ახალი ვინმე. არ შეიძლება რა. ესენი არ არიან მზად. მარტო გვარი არ გაძლევს საშუალებას, რომ მონარქიაზე ისაუბრო. რა უბედურებაა. მართლა, კარგი საღადაო თემაა. ახლა კიდევ ორდენების და რაინდობის დარიგება. "ჩემი ცოლის დაქალები" არის მაგარი კარგი პასუხი. ერთადერთი სერიალია, რომელსაც ვუყურებ და ძალიან ვხალისობ. -ისევ "ფეისბუქს" მოვიშველიებ, ფოტოები გედოთ და კომენტარი გქონდათ, რომ ამაყობთ ყოფილი პრეზიდენტის, ბატონ მიხეილ სააკაშვილის მიერ გადმოცემული ბრწყინვალების ორდენით. -არ მგონია, ვინმეს კითხვა დაესვა, ნეტავ მაგას რიღასთვის მისცესო. ვთვლი, რომ ალბათ ვიმსახურებდი და იმიტომ. წეღანაც გითხარით, რომ ვამაყობ იმით, რასაც ვაკეთებდი. როცა ქვეყნის პირველი პირი და მით უფრო მიხეილ სააკაშვილი, ძალიან მოულოდნელად რაღაც შეხვედრაზე გეძახის და გაძლევს ორდენს და მერე ხედავ, რომ თურმე ეს ბრწყინვალების ორდენია, რა თქმა უნდა, საამაყოა. თუმცა მე ეს არ გამიხმაურებია ინაუგურაციამდე. შემდეგ ეს ფოტო ჩავსვი ჩარჩოში. როდესაც დასაბეჭდად მივედი ერთ-ერთმა ქალბატონმა მკითხა-ეს ჩარჩოში უნდა ეხლა ჩასვაო? დიახ, ზუსტად ეხლა უნდა ჩავსვა-მეთქი.არაპოპულარულია ძალიან ბევრისთვის, მაგრამ ჩემთვის პოპულარულია. იმიტომ, რომ ის იყო ჩემი ქვეყნის პრეზიდენტი, რომელმაც ჩემი შრომაც დააფასა და ბევრი რამ გააკეთა ჩვენი ქვეყნისთვის. ძალიან ბედნიერი ვარ, რომ მასთან ერთად მივლია თელავის კორპუსების სახურავებზე. -თეორიულად რომ დავუშვათ, ბიძინა ივანიშვილმა, ან ირაკლი ღარიბაშვილმა, გიორგი მარგველაშვილმა გადმოგცეთ ორდენი, ასეთივე საამაყო იქნება? -მე ზოგიერთივით "ატარვეტა" არ ვარ. ვიღაც ორდენს რომ უკან აბრუნებს თუ რაღაც. მაგათ რატომ უნდა გადმომცენ, არაფერი გამიკეთებია ამ პერიოდისთვის. თუUეგენიც ჩათვლიან, რომ ძველი გაკეთებულისთვის ვიმსახურებ, რატომაც არა, მადლობას გადავუხდი. სულელი ხომ არ ვარ ვესროლო, ან უკან დავუბრუნო. მადლიერების გრძნობა ძალიან მნიშვნელოვანია ადამიანისთვის. ამას ვერ შეიძენ, ეს შინაგანი მდგომარეობაა და გენეტიკურია. -ინტერვიუს დასასრულს, რას ეტყვით "სპექტრის" მკითხველს? -მინდა დამდეგი ახალი წელი მივულოცო ყველას. მინდა, რომ ჩემი ქვეყანა წინ წავიდეს. წინსვლა გავაგრძელოთ და არა ის, რომ ერთმანეთს თვალი ამოვთხაროთ. -ბოლოს ტრადიციული კითხვა-"სპექტრი" როგორი გაზეთია ბატონო გიორგი? -ბოლოს "სპექტრში" ზაქარია იაგანაშვილის ბლიც-ინტერვიუ წავიკითხე. არ ვიცი როგორი გაზეთია. ვერ ვკითხულობ. ისეთი აქტივობით არ ხართ ინტერნეტსივრცეში, როგორც სხვები. "სპექტრზე" უკმაყოფილო ვიყავი იმით, რომ ჩემი ძალიან ძველი ფოტოები დაბეჭდეთ. გაზეთს არ ვყიდულობ, იმიტომ, რომ ინტერნეტში ვეცნობი ინფორმაციას. ინტერვიუ ჩაწერილია 19 დეკემბერს. ლანა გულოშვილი