წინასაარჩევნო კამპანია გადამწყვეტ ფაზაშია შესული. საპრეზიდენტო კანდიდატების შტაბებშიც აქტიურად მუშაობენ და ყველგან აცხადებენ, რომ მათი კანდიდატი უცილობლად გაიმარჯვებს. 2013 წლის საპრეზიდენტო არჩევნების დროს ე.წ. პრივილეგირებული ოფისი კვლავ მმართველი ძალის ხელშია. საპრეზიდენტო არჩევნების წინა პერიოდში, გურჯაანში ძირითადად სამი პოლიტიკური ძალა აქტიურობს. "ხმა მიეცი სამართლიანობის აღდგენას"-ამ სლოგანით "დემოკრატიული მოძრაობა ერთიანი საქართველოს" საპრეზიდენტო კანდიდატი ნინო ბურჯანაძე მოუწოდებს ხალხს. "ერთად ვაკონტროლოთ მთავრობა"-აცხადებს "ერთიანი ნაციონალური მოძრაობის" საპრეზიდენტო კანდიდატი დავით ბაქრაძე. "ერთად განვაგრ|ოთ წინსვლა"-მოგვმართავს კოალიცია "ქართული ოცნების" კანდიდატი გიორგი მარგველაშვილი. შთამბეჭდავი სლოგანების ფონზე პოლიტიკური ტემპერატურა კიდევ უფრო მაღლა იწევს. "სპექტრის" ობიექტივში ამჯერად საარჩევნო შტაბების ადგილ-მდებარეობა მოხვდა. 27 ოქტომბრის შედეგებამდე გიორგი მარგველაშვილის საარჩევნო შტაბმა ბინა რუსთაველის ქუჩა #15-ში დაიდო. შეგახსენებთ, რომ ეს ის კერძო საკუთრებაა, რომელსაც გასულ წლებში საარჩევნო შტაბად პარტია "ერთიანი ნაციონალური მოძრაობა" ქირაობდა. (მის პირდაპირ, რუსთაველის 18-ში კი #12 საარჩევნო ოლქია განთავსებული, ავტ.). როგორც "სპექტრთან" საუბარში "ნაციონალური მოძრაობის," გურჯაანის რაიონული საარჩევნო შტაბის ხელმძღვანელმა გოჩა სიბაშვილმა განაცხადა, მათ მისამართი საკუთარი სურვილის საფუძველზე გამოიცვალეს, რადგან ახალი ფართი პარტიის საკუთრებაა და ქირის გადახდა აღარ მოუწევთ. -"თავისუფლების ქუჩა, #24 არის "ერთიანი ნაციონალური მოძრაობის" საკუთრება. ამჟამად პარტია და შესაბამისად, შტაბი თავის საკუთრებაშია განთავსებული. ის შენობა, სადაც შტაბი გასულ წლებში იყო, კერძო პირისგან გვქონდა ნაქირავები. ეხლა კი, როცა გაგვაჩნია ფართი, ქირა რატომ უნდა გადავიხადოთ? მინდა განვაცხადო, რომ მმართველი პარტიის მხრიდან ზეწოლას ადგილი არ ჰქონია,"-გვითხრა მან. 2012 წლის საპარლამენტო არჩევნების პერიოდში გურჯაანში "ნაციონალური მოძრაობის" შტაბის უფროსი, ამჟამად საკრებულოს დეპუტატი ზაქარია იაგანაშვილი იყო. მმართველი პარტიის მხრიდან განხორციელებული ზეწოლა და ფართის ამ გზით დათმობა მანაც გამორიცხა. რაც შეეხება კითხვას, თუ რატომ არის აღნიშნული ფართი მიმზიდველი მმართველი პარტიებისთვის წინასაარჩენოდ? -ზაქარია იაგანაშვილმა განმარტა: -"გასულ წელს არჩევნებამდე, ზემდგომმა შტაბმა გვთხოვა, რომ ადგილი მონახეთო. იმის გამო, რომ მაშინ ჩვენი პარტიის ფართი პატარა იყო და შტაბს დიდი სივრცე სჭირდებოდა, მოვიძიეთ და აღმოჩნდა ცენტრში. ახლა "ნაციონალური მოძრაობა" ახალ ოფისშია გადასული, ანუ დაქირავების საჭიროება აღარ გვქონდა." აქვს თუ არა ფართის შერჩევის დროს ხიბლი იმ ფაქტს, რომ მის მოპირდაპირედ საოლქო საარჩევნო კომისაა განთავსებული, ზაქარია იაგანაშვილმა გვიპასუხა: -"მანდ ჩვენ წინა წლებშიც გვქონდა შტაბი. ჯერ კიდევ 2010 წელს, როდესაც საოლქო არ იყო მაგ მისამართზე." კოალიცია "ქართული ოცნების" რაიონული შტაბის ხელმძღვანელი იოსებ ბერიკაშვილი აცხადებს, რომ წინაარჩევნოდ ოფისი, სადაც პარტია "ქართული ოცნება დემოკრატიული საქართველო" მდებარეობდა, საერთო ბინაში იყო განთავსებული და მეზობლებს გარკვეულ დისკომფორტს უქმნიდა. ოფისის გამოცვლის მიზეზი სწორედ ეს გახდა. -"ის, რომ გასულ წლებში ამ ოფისში "ნაციონალური მოძრაობა" იყო, არაფერს ნიშნავს. ხომ არ შეიძლება ფართის მიხედვით ვიფიქროთ ადამიანების პოლიტიკურ მრწამსზე, პოლიტიკურ ორიენტაციაზე? ეს შენობა "ნაციონალებს" ნაქირავები ჰქონდათ და მათი კერძო საკუთრება არ იყო. სხვათაშორის, მგონი აქ მერე კაფე-ბარიც გაიხსნა. უბრალოდ, სხვაგან ვერ ვნახეთ ოფისი. უფლება არ გვაქვს, რომ სახელმწიფო შენობები დავიკავოთ. კარგი ადგილი იყო იუსტიციის სახლის წინ, მაგრამ `ნაციონალებმა~ დაგვასწრეს. თუმცა, მაინც ვფიქრობ, რომ ჩვენი შტაბის ადგილმდებარეობა უკეთესია, რადგან მუდმივ ურთიერთობაში ვართ საოლქოსთან და სირბილი აღარ გვჭირდება,"-გვითხრა იოსებ ბერიკაშვილმა. მმართველი პარტიის მიერ რუსთაველის #15-ის მიმართ გაჩენილი სიმპათიები გარკვეულ ასოციაციებს უჩენს "დემოკრატიული მოძრაობა ერთიანი საქართველოს" აღმასრულებელ მდივანს გია ხელაშვილს. -"კოალიციის ადგილზე არ ავირჩევდი მაგ ადგილს. ძალიან მძიმე მემკვიდრეობა აქვს. ასოციაციებს აღმიძრავს. ხელისუფლებაში მყოფი პარტიების საკმაოდ სოლიდური ნაწილი აბსოლუტურად ანალოგიურია იმ ძალის, რომელიც ვითომ წავიდა. ისე მშვენიერ უნისონში იმყოფებიან ერთმანეთთან ცალკეული გამონაკლისების გარდა. ეს თითქმის ყველგან ესეა. მიდრეკილებაც, რომ მაინცდამაინც `ნაციონალური მოძრაობის~ ოფისში გადასულიყვნენ, ალბათ, იმის მცდელობაა, რომ ყველას აჩვენონ მათ ადგილს ვიკავებეთო. ფსიქოლოგიურ მომენტს ქმნიან საზოგადოებაში, რომ აი, ისიც მათ ხელშია, ესეც მათ ხელშია და მოდი არჩევანი გავაკეთოთ მათზე, მაინც არაფერი გამოვა. რა თქმა უნდა, მტკიცებით ამის თქმა არ შემიძლია, მაგრამ ფაქტია, რომ რაღაცის უნიათო მცდელობაა."-გვითხრა გია ხელაშვილმა. თითოეულ საარჩევნო შტაბში სტუმრობისას "სპექტრთან" საუბარში აცხადებდნენ, რომ მათი საპრეზიდენტო კანდიდატი აუცილებლად გაიმარჯვებს. თუმცა ვინ ჩაიბარებს პრეზიდენტის სავარძელს მომდევნო ოთხი წლით, ვის გამოუცხადებს საზოგადოების უმრავლესობა ნდობას, ამას 27 ოქტომბრის არჩევნები გვიჩვენებს.