გასულ კვირას, გურჯაანელ ამომრჩეველს "დემოკრატიული მოძრაობის" საპრეზიდენტო კანდიდატი ნინო ბურჯანაძე შეხვდა და რაიონული საარჩევნო შტაბის გახსნასაც დაესწრო. მან მოსახლეობასთან საუბრისას ყოფილი და ამჟამინდელი ხელისუფლების პოლიტიკური კურსი გააკრიტიკა. ნინო ბურჯანაძე თვლის, რომ პირველ ოქტომბერს "ქართულ ოცნებას" მოსახლეობამ მხარი სამართლიანობის აღსადგენად დაუჭირა, თუმცა ამ მხრივ მნიშვნელოვანი ცვლილება ქვეყანას არ ეტყობა. -"მიუხედავად იმისა, რომ 1 ოქტომბერს მთელი საქართველო ფეხზე დავდექით, რათა უსამართლობისთვის გვეთქვა უარი, ჯერჯერობით ადამიანებმა სამართალი ვერ იპოვეს. ეს ძალიან გულდასაწყვეტია, რადგან ამისთვის ჩვენ ყველაფერი გავაკეთეთ, ჩვენი ოჯახებიც დარტყმის ქვეშ დავაყენეთ. ყველას გვეგონა, რომ "ქართული ოცნება" შეძლებდა ქყვეყანაში სამართლიანობის აღდგენის კუთხით გარდატეხა შეეტანა," _ განაცხადა ნინო ბურჯანაძემ. მისი თქმით, არც მას და არც მის მომხრეებს კოალიციისთვის მხარი იმიტომ არ დაუჭერიათ, რომ დანაშაულებრივ რეჟიმს "ჩახუტებოდნენ." "დემოკრატიული მოძრაობა," "სახალხო კრება" გვერდში ედგა "ქართულ ოცნებას," არჩევნებში მონაწილეობაზე უარი განვაცხადეთ. ვთქვით, ოღონდ შეიცვალოს "ნაციონალური მოძრაობა" და სააკაშვილის ეს ტირანია, არ გვინდა არც საპარლამენტო ადგილები და არც სხვა არაფერი. დავუდგებით გვერდში "ქართულ ოცნებას," ოღონდ შეასრულოს პირობა, რომ "კოაბიტაცია" არ იქნება, არ მოხდება შეთანხმება დანაშაულებრივ რეჟიმთან. დღეს, ნაცვლად ამისა, ხშირ შემთხვევაში ვხედავთ, რომ "ქართული ოცნების" ცალკეული წარმომადგენლები მშვენივრად არიან ჩახუტებულები "ნაციონალებთან." ნინო ბურჯანაძემ შეხვედრაზე მინისტრების გაზრდილ ხელფასებზეც ისაუბრა. -"არ შეიძლება, პენსიონერებისთვის პენსიის ათობით ლარით მომატებაზე ვსაუბრობდეთ, მინისტრების ხელფასები კი 15, 20 000 და კიდევ დამატებით 20 000 პრემიები იყოს. კითხეთ ერთი მარგველაშვილს: შენ და შენმა მინისტრებმა რატომ მოიმატეთ ხელფასები-თქო?~ ბურჯანაძე მიიჩნევს, რომ ყურძენზე სუბსიდირების პროგრამაც წინასაარჩევნო გათვლაა და არა გლეხზე ზრუნვის მაგალითი. ამის არგუმენტად მან წელს ატმის რეალიზებაზე გააკეთა აქცენტი. -"მიხარია, რომ გამოაცხადეს კახეთში ყურძნის ფასი სტაბილურად ლარი და ლარნახევარი იქნებაო, რაც ძალიან კარგია, მაგრამ აქვე მინდა განვაცხადო, რომ ეს ნამდვილად საპრეზიდენტო არჩევნების ფასია. ვიცი, ვენახის მოვლას განსაკუთრებული შრომა სჭირდება, მაგრამ ატამი ვისაც ჰქონდა და დაულპა, იმათი შრომა, შრომა არ იყო? მაშინ ეს არავის გახსენებია, რადგან საპრეზიდენტო არჩევნები არ იყო კარს მომდგარი." "დემოკრატიული მოძრაობის" საპრეზიდენტო კანდიდატმა პირობა დადო, რომ გამარჯვების შემთხვევაში ქვეყანაში სტაბილური ვითარება შეიქმნება და გლეხი მუდმივად ხელისუფლების მოწყალების შემყურე აღარ იქნება. -"პრეზიდენტმა უნდა შეძლოს ქყვეყნის მთავარი პრიორიტეტების განსაზღვრა და მოგვარება. უნდა შექმნას ისეთი ვითარება, არ შეგვეშინდეს, რომ მეზობელთან გვექნება ომი. საჭიროა, ადამიანებმა თავისუფლად გადაადგილება შეძლონ და რუსეთის ბაზარი გაიხსნას. გპირდებით, რომ მე ამას გავაკეთებ." გარდა შიდა პოლიტიკური საკითხებისა, მან საგარეო ურთიერთობებზეც ისაუბრა. -"რუსეთთან ურთიერთობის დარეგულირება არ მოხდება სხვა მეზობელი და მეგობარი ქვეყნების ურთიერთობის ხარჯზე. თუ, რა თქმა უნდა, თავს არ მოვიტყუებთ იმით, რომ მოდით რუსებს ნუ დაველაპარაკებით და ნატოში მიგვიღებენო. ხვალ არავინ არ მიგვიღებს ნატოში და თუ ასე მოხდა, შეიძლება საუბარი იყოს ტერიტორიების დათმობის ფასად მიღებაზე. არ მგონია საქართველოში იყოს ადამიანი, რომელიც იტყვის, რომ არ მინდა აფხაზეთი და ოსეთიო." კიდევ ერთი თემა, რაზეც ბურჯანაძემ ყურადღება გაამახვილა, უფასო სახელმძღვანელოების პროგრამაა. ის წიგნების ყველა მოსწავლისთვის უსასყიდლოდ გადაცემას სახელმწიფო ბიუჯეტის თანხების არამიზნობრივ ხარჯვას უწოდებს. მისი თქმით, ამის საჭიროება ყველა ოჯახს არ აქვს. მოქალაქეებმა ბურჯანაძისგან პასუხი საპენსიო ასაკის დაწევაზე, სოციალური დახმარების პროგრამასა და პატიმრების მდგომარეობასთან დაკავშირებითაც მიიღეს. ის მოქალაქეებს საპენსიო ასაკის დაწევას დაპირდა, თუმცა აღნიშნა, რომ ეს ეტაპობრივად მოხდება და ამის უმოკლეს დროში გადაჭრა შეუძლებელია. მან ასევე განაცხადა, რომ სოციალური დახმარების სქემა გადასახედია. ნინო ბურჯანაძეს დახმარება ათი თვის ბარბარე რაფალიანცის ბებიამ და ოჯახის წევრებმაც სთხოვეს.Uმას კონკრეტული დაპირება არ მიუცია, თუმცა განმარტა, რომ გამოძიებისთვის ერთი წელი საკმარისი დრო იყო. გურჯაანში, საარჩევნო შტაბის გახსნას ნინო ბურჯანაძესთან ერთად მსახიობი გია ბურჯანაძე და პარტიის ცენტრალური შტაბის ხელმძღვანელი ირაკლი ბათიაშვილიც დაესწრნენ. ირაკლი ბათიაშვილმა კოალიციის კანდიდატი გიორგი მარგველაშვილი დადებითად დაახასიათა, თუმცა აღნიშნა: ჩვენ სიძე კი არა, პრეზიდენტი უნდა ავირჩიოთ და ეს ნინო ბურჯანაძე უნდა იყოსო. მოქალაქეებთან გაკეთებული განცხადებების შემდეგ ბურჯანაძემ პარტიის ადგილობრივი ოფისი დაათვალიერა და წინასაარჩევნო კამპანია სოფელ ვეჯინსა და ველისციხეში შეხვედრებით განაგრძო. ლანა გულოშვილი http://farm8.staticflickr.com/7392/10723989214_579bf98ec2_z.jpg