კახეთის მუნიციპალიტეტების თვითმმართველობებში შექმნილი ვითარება არასამთავრობო ორგანიზაციების განხილვის საგანი გახდა. კვირის განმავლობაში "ენჯეოები" (არასამთავრობო ორგანიზაციები) გურჯაანისა და დედოფლისწყაროს მუნიციპალიტეტების გამგებლების აკაკი ოსიაშვილისა და ირაკლი შიოლაშვილის თანამდებობებზე კონკურსგარეშე დანიშვნის ფაქტს აპროტესტებდნენ. აკაკი ოსიაშვილი 2012 წლის 10 დეკემბრიდან გურჯაანის მუნიციპალიტეტის გამგებლის მოვალეობის შემსრულებელი იყო. 7 მარტს კი მუნიციპალიტეტის გამგებლად, კონკურსის გარეშე დაინიშნა. საკრებულოს სხდომაზე თავმჯდომარე ავთანდილ ზარდიაშვილმა განაცხადა: -"გურჯაანის მუნიციპალიტეტს დღემდე ჰყავდა გამგებლის მოვალეობის შემსრულებელი. მიზანშეწონილად მიმაჩნია, მას მოეხსნას მოვალეობის შემსრულებლის სტატუსი და საკრებულოსგან ვითხოვ თანხმობას იმის შესახებ, რომ აკაკი ოსიაშვილი დაინიშნოს გურჯაანის მუნიციპალიტეტის გამგებლად. სამართლებრივად მე ამის უფლება მაქვს "ადგილობრივი თვითმმართველობის შესახებ" ორგანული კანონის თანახმად. რაც შეეხება ამავე კანონის 39-ე მუხლის შესაბამისობას „საჯარო სამსახურის შესახებ“ კანონთან, მიმაჩნია, რომ აკაკი ოსიაშვილი აკმაყოფილებს აღნიშნული კანონით თანამდებობაზე დასანიშნად დადგენილ ძირითად მოთხოვნებს". დედოფლისწყაროს მუნიციპალიტეტის გამგებელად ასევე კონკურსგარეშე, საკრებულოს გადაწყვეტილებით დაინიშნა ირაკლი შიოლაშვილი. აღნიშნულ ფაქტს არასამთავრობო ორგანიზაცია „საერთაშორისო გამჭვირვალობა-საქართველო“ გამოეხმაურა. -"ნათელია, რომ სახეზე გვაქვს საკრებულოების მხრიდან კანონმდებლობის მნიშვნელოვანი დარღვევა, რის შედეგადაც ეჭვის ქვეშ დგება როგორც გამგებლების უფლებამოსილება, ასევე – მათ მიერ გამოცემული ყველა სამართლებრივი აქტის კანონიერება. აქედან გამომდინარე, მოვუწოდებთ გურჯაანისა და დედოფლისწყაროს მუნიციპალიტეტების საკრებულოებს, გააუქმონ გამგებლების დანიშვნის შესახებ გამოცემული უკანონო აქტები. ასევე, უნდა გადაიხედოს უკანონოდ დანიშნული გამგებლების მიერ გამოცემული სამართლებრივი აქტები," _ აღნიშნულია „საერთაშორისო გამჭვირვალობა – საქართველოს" განცხადებაში. "საქართველოს ახალგაზრდა იურისტთა ასოციაციის" თელავის ოფისის ხელმძღვანელი მარეხ მგალობლიშვილი "სპექტრთან" კომენტარში ამბობს: -"კანონში არის ორი სხვადასხვა მუხლი, რომლებიც გარკვეული ნაწილის მიერ შეიძლება სხვაგვარად იქნეს გაგებული. საიას აზრით, გარკვევითაა მითითებული, რომ კონკურსი უნდა ჩატარდეს, თუმცა კანონი იძლევა საშუალებას, ნაწილმა მისი სხვაგვარი განმარტება გააკეთოს. გურჯაანის გამგეობის იურისტებს ვესაუბრე. მათი თქმით, კანონში არ არის მითითებული კონკურსის ჩატარების ვალდებულება, ამიტომ ვთვლით, რომ შეიძლება გამგებელი მოვალეობის შემსრულებელიდან პირდაპირ დაინიშნოს კონკურსის წესის გარეშეო. ეს იყო მათი იურისტების მოტივაცია, რაც საკრებულომ გაიზიარა. მიგვაჩნია, რომ მოვალეობის შემსრულებლის პირდაპირ, კონკურსის გარეშე დანიშვნა არ არის კანონთან შესაბამისი," _ გვითხრა მარეხ მგალობლიშვილმა. არასამთავრობო ორგანიზაცია „სამოქალაქო აქტივობების ცენტრი“ გამგებლების დანიშვნის ბრძანებებს სასამართლოში ასაჩივრებს და საკრებულოების გადაწყვეტილებების ბათილად ცნობას ითხოვს. - "მოცემულ შემთხვევაში დედოფლისწყაროს და გურჯაანის მუნიციპალიტეტების საკრებულოებმა დაარღვიეს კანონი. რადგან არ არის ამგვარი პრეცენდენტი საქართველოში, რომლის გამოყენებაც შეიძლებოდა და ამაზე დაყრდნობით მერე მიწერა საკრებულოსთვის, ამიტომ გადავწყვიტეთ, მივმართოთ სასამართლოს. სარჩელი ჯერ არ გვაქვს შეტანილი, ამას აქვს გარკვეული ვადები და სანამ ეს ვადა ამოიწურება, ამ სარჩელს შევიტანთ. იმედია, სასამართლო დააკმაყოფილებს ჩვენს მოთხოვნას, ამაში დარწმუნებულები რომ არ ვიყოთ, არც ვიდავებდით," _ გვითხრა „სამოქალაქო აქტივობების ცენტრის“ წარმომადგენელმა კახეთის რეგიონში გელა მთივლიშვილმა. თუმცა გურჯაანის საკრებულოს თავმჯდომარე გადაწყვეტილების გაუქმებას არ აპირებს. ამის შესახებ ავთანდილ ზარდიაშვილმა "სპექტრთან" საუბარში განაცხადა. -"ორგანულ კანონში გარკვეულწილად არ არის მითითებული როგორ ინიშნება გამგებელი, ზოგადად წერია, საჯარო სამსახურის შესახებ კანონის შესაბამისად. თუმცა ამავე კანონის მე-20 მუხლში მითითებულია, რომ პირდაპირი წესითაც შეიძლება დაინიშნოს. სასურველია გამოცხადდეს კონკურსი, თუმცა არა სავალდებულო. ამ შემთხვევაში საქმე ეხება მაღალი თანამდებობის პირს და ჩვენ შეიძლება დავნიშნოთ გამგებელი," _ აღნიშნა ავთანდილ ზარდიაშვილმა. გადაწყვეტილებაში უკანონოს ვერაფერს ხედავს გურჯაანის მუნიციპალიტეტის გამგეობის ადმინისტრაციული სამსახურის მთავარი სპეციალისტი იურიდიულ საკითხებში ნანა ჭაბუკაძე. -"გურჯაანის მუნიციპალიტეტის გამგეობის საკრებულოს ჰქონდა იმის უფლება რა გადაწყვეტილებაც მიიღო. ადგილობრივი თვითმმართველობების შესახებ საქართველოს ორგანული კანონის მე-20 და 39-ე მუხლების მიხედვით დადგენილია გამგებლის დანიშვნის წესი. ანუ, აქ მითითებულია, რომ გამგებელს ნიშნავს საკრებულოს თავმჯდომარე საკრებულოს თანხმობით." ნანა ჭაბუკაძის განმარტებით, საჯარო სამსახურის შესახებ კანონის მიხედვით, კონკურსის წესის სავალდებულო მოთხოვნა გამგებელზე არ ვრცელდება. თუ საკრებულოს თავმჯდომარე მუნიციპალიტეტში არსებული სიტუაციიდან გამომდინარე ვერ აკეთებს არჩევანს, მას შეუძლია გამოაცხადოს კონკურსი და ამას კანონი არ კრძალავს, თუმცა სავალდებულო არ არის. გურჯაანის საკრებულოს თავმჯდომარე ავთანდილ ზარდიაშვილი არასამთავროების რეკომენდაციების გათვალისწინებას არ აპირებს და სასამართლოში გასაჩივრების შემთხვევაში, მზად არის საკუთარი პოზიცია დაიცვას. გადაწყვეტილების გაუქმებას არც დედოფლისწყაროს საკრებულოს თავმჯდომარე ლევან ნატროშვილი აპირებს. როგორც მან "სპექტრთან" საუბარში აღნიშნა, ნებისმიერს აქვს უფლება დადგენილება გაასაჩივროს. -"კანონი კონკურსს არ ითვალისწინებს. ვინ გითხრათ, სად წაიკითხეთ? მე ვერავის ვერაფერს ავუკრძალავ, ვისაც სად უნდა იქ გაასაჩივროს." დღეისათვის გამგებლის პოსტი ვაკანტურია ყვარლის მუნიციპალიტეტში. საზოგადოებასთან ურთიერთობის სამსახურის ხელმძღვანელმა ნინო ხუციშვილმა "სპექტრთან" საუბრისასა აღნიშნა, რომ გამგებლის თანამდებობაზე კონკურსი 15 მარტს გამოცხადდა და 24 მარტს დასრულდება. პრეტენდენტთა სიამ კი ასს გადააჭარბა (23 მარტის მონაცემებით). მოთხოვნების თანახმად, კანდიდატი უნდა ერკვეოდეს შემდეგ სამართლებრივ აქტებში: -საქართველოს კონსტიტუცია, ევროპული ქარტია ადგილობრივი თვითმმართველობის შესახებ, "ადგილობრივი თვითმმართველობის შესახებ" საქართველოს ორგანული კანონი, ყვარლის მუნიციპალიტეტის საკრებულოს დებულება, ყვარლის მუნიციპალიტეტის გამგეობის დებულება, "საჯარო სამსახურის შესახებ~ საქართველოს კანონი, "ნორმატიული აქტების შესახებ" საქართველოს კანონი, საქართველოს ზოგადი ადმინისტრაციული კოდექსი, საქართველოს კანონი "სახელმწიფო შესყიდვების შესახებ", საქართველოს კანონი "საქართველოს საბიუჯეტო კოდექსი", საქართველოს სამოქალაქო კოდექსი, საქართველოს შრომის კოდექსი. ნინო ხუციშვილის განმარტებით, აღნიშნულ კონკურსში გამგებლის მოვალეობის შემსრულებელი დავით ქევხიშვილიც მონაწილეობს, რომელიც აღნიშნულ თანამდებობაზე ოფიციალურად 12 დეკემბერს წარადგინეს. თელავის, ახმეტისა და სიღნაღის მუნიციპალიტეტებს გამგელის მოვალეობის შემსრულებლები ხელმძღვანელობენ. მარეხ მგალობლიშვილის განმარტებით, კანონი ამის უფლებას იძლევა. -"დღეს მოქმედი კანონის თანახმად, არ არის განსაზღვრული ვადა, თუ რა დრომდე შეიძლება იყოს პირი გამგებლის მოვალეობის შემსრულებელი. თუმცა ეს კანონის ხარვეზია და საჯარო სამსახურებში ხშირად იყენებენ. პირი შეიძლება წლების განმავლობაში იყოს მოვალეობის შემსრულებელი." მისივე თქმით, კანონი ვადების განსაზღვრის შესახებ პირველი ივლისიდან ამოქმედდება. საგარეჯოს მუნიციპალიტეტის გამგებლის, გიორგი ლოლაძის კანდიდატურას კი ამ პოსტზე დასამტკიცებლად მხარი საგარეჯოს საკრებულოს 30-მა წევრმა 2012 წლის 2 ნოემბერს დაუჭირა. რაც შეეხება ლაგოდეხის მუნიციპალიტეტს, აქ გამგებლად ვალერ ალიბეგაშვილი კონკურსის შედეგად 2013 წლის 3 იანვარს დაამტკიცეს. ლანა გულოშვილი