ბოლო ორი თვის განმავლობაში, რაც გურჯაანის მუნიციპალიტეტს ახალი გუნდი მართავს, საზოგადოებაში აქტიურად საუბრობენ სოფლის ტერიტორიული ორგანოს რწმუნებულების შეცვლის თაობაზე. ხელისუფლება ამ ფაქტს უარყოფს, უმცირესობა კი პოლიტიკური ნიშნით დევნაზე საუბრობს. რამდენიმე თვეა, ცენტრალური თუ ადგილობრივი ხელისუფლებისა და ოპოზიციის მხრიდან (ასევე მათი მისამართით), ხშირად ვისმენთ ტერმინს `კოჰაბიტაცია~ (თანაცხოვრება). ამის მიუხედავად უმცირესობაში მყოფი `ნაციონალები~ აცხადებენ, რომ პოლიტიკური ნიშნით დევნის ფაქტები შეიმჩნევა. ამის შესახებ სოფლების ტერიტორიული ორგანოს რწმუნებულებიც საუბრობენ. რამდენიმე მათგანი `სპექტრთან~ ამ აზრს არაოფიციალურ საუბარშიც აფიქსირებს, თუმცა საგაზეთო კომენტარებისგან თავს იკავებს.

ადგილობრივ ხელისუფლებას კი კონტარგუმენტები მოჰყავს. გამგებლის მოვალეობის შემსრულებელი ჯონი ოსიაშვილი და მოადგილე ზურა დანელიშვილი კითხვას სვამენ_`რატომ აპელირებენ ოპონენტები პოლიტიკური ნიშნით დევნაზე, თუკი სოფლის რწმუნებულები, ანუ საჯარო მოხელეები პოლიტიკურ დაკვეთებს არ ასრულებდნენ?~ ჯონი ოსიაშვილი ამბობს, რომ განცხადების დაწერას არავის აიძულებს. ადამიანები, რომლებიც თავს პოლიტიკურ მოღვაწეებად მიიჩნევენ, სამსახურს თავად ტოვებენ. "ზოგი რწმუნებული თავს არა საჯარო მოხელედ, არამედ პოლიტიკურ მოღვაწედ მიიჩნევს. მე არც ერთი მათგანისთვის არ მითქვამს, რომ განცხადება დაწეროს, ეს არის მათი გადაწყვეტილება. ზოგი ასრულებდა ძველი ხელისუფლების დავალებებს, რასაც კანონი კრძალავს. ყველა რწმუნებული პირად საუბარში აღიარებს, რომ ისინი წინასაარჩევნო პერიოდში, სამუშაო საათებში, ხელისუფლების დაკვეთით მოქმედებდნენ. აღიარებენ, რომ იყვნენ აგიტატორებიც. მოიყვანეთ ნებისმიერი რწმუნებული და თავად ჰკითხეთ, წინასაარჩევნოდ დღის განმავლობაში, პოლიტიკურ დავალებებს ასრულებდნენ თუ არა. ამას ყველა დაგიდასტურებთ. არის თუ არა ეს კანონდარღვევა?! მე მათ არ ვაიძულებ თანამდებობიდან წასვლას, მაგრამ ადამიანები, რომლებიც ვიმეორებ, თვლიან, რომ არიან პოლიტიკური მოხელეები, წერენ განცხადებებს და მიდიან. რწმუნებულების უმრავლესობას სოფლის მოსახლეობა უპირისპირდება. როგორც ისინი ამბობენ, აიძულებდნენ ხმა `ნაციონალური მოძრაობისათვის~ მიეცათ. მესმის, აქ მეორე მხარეა _ ადამიანის უფლებების დაცვა, მაგრამ მაშინ არ იყო პიროვნებების უფლებების დაცვა საჭირო, როდესაც ოჯახში მიდიოდნენ და აწიოკებდნენ?!" _ ამბობს ჯონი ოსიაშვილი.

გამგებლის მოადგილე ზურა დანელიშვილი ადასტურებს, რომ სოფლის რწმუნებულთა უმრავლესობა `ნაციონალური მოძრაობის~ დაკვეთას ასრულებდა და მოვალეობები ავიწყდებოდა. ამიტომაც თვლის, ასეთი ადამიანების ადგილი საჯარო სამსახურებში არ არის. თუმცა მისივე თქმით, ამ ადამიანებს აქვთ შანსი ერთი წლის შემდეგ თვითმმართველობის არჩევნებში მოსინჯონ ძალები. "როდესაც რწმუნებულებს ვესაუბრები, აღიარებენ, რომ ახორციელებდნენ პოლიტიკურ დავალებებს. შესაბამისად, მათ ამის სამართლებრივი უფლება არ ჰქონდათ. ამიტომაც აღიქმებიან არა საჯარო მოხელეებად, არამედ პოლიტიკურ პირებად. მე მესმის, რომ მათი ნაწილი ამას იძულებითაც აკეთებდა, თუმცა თითოეულმა მათგანმა ახლა უნდა გაითვალისწინოს და იკისროს მორალური პასუხისმგებლობა. საკმაოდ ბევრს გაუღვიძა სინდისი ამ პასუხისმგებლობამ და საკუთარი ნებით წერენ განცხადებებს. მინდა ვთქვა ისიც, რომ ბევრი მათგანი ავტორიტეტული ადამიანიცაა და ჩვენში არავითარ პიროვნულ ანტიპატიას არ იწვევს, ბევრზე გულიც დამწყდა, მაგრამ ისიც ფაქტია, რომ სამსახურებრივ მოვალეობებს ამეტებდნენ. მე მათ ვურჩევ, თუ აპირებენ პოლიტიკაში დარჩენას, ერთი წლის შემდეგ ჩატარდება ადგილობრივი თვითმმართველობის არჩევნები და მონაწილეობა მიიღონ. ეს პერიოდი იქნება მათი პოლიტიკური რეაბილიტაციის დრო," _ აცხადებს ზურა დანელიშვილი. კულუარული ინფორმაციით კი, მუნიციპალიტეტის მასშტაბით ყველა სოფლის რწმუნებულზე შეცვლაზე ბრძანება უკვე დაწერილია, რომელიც ძალაში პირველი თებერვლიდან შევა. თუმცა აღნიშნულს ადგილობრივი ხელისუფლება არ ადასტურებს. ზურაბ დანელიშვილი ამბობს, რომ ცვლილებები ამ დროისათვის მხოლოდ რამდენიმე სოფელს _კაჭრეთს, მუკუზანს და კოლაგს შეეხო. მისი თქმით, ახალი რწმუნებულები პროფესიონალიზმისა და გამოცდილების მიხედვით შეირჩნენ.