მარი გონაშვილი

გასულ კვირას ლაგოდეხის მუნიციპალიტეტის გამგებლის თანამდებობაზე 7 კანდიდატს უყარეს კენჭი. ესენი არიან: ალიკა ტალახაძე, კოტე კაპანაძე, თამაზ ღონღაძე, კახა (კარლო) ჯამბურია, გიორგი ღამბაშიძე, გიორგი ბიჭიაშვილი, ვალერ ალიბეგაშვილი. კანდიდატების მოსმენა აქციის ფონზე მიმდინარეონდა. საკრებულოს მიმდებარე ტერიტორიასა და შენობაში მობილიზებულები იყვნენ ძირითადად ალიკა ტალახაძისა და კოტე კაპანაძის მომხრეები.  "აქ იმისთვის მოვედი, რომ მხარი დავუჭირო ლაგოდეხის გამგებლად ღირსეული კანდიდატის წარდგენას, ამ თანამდებობისთვის კი საუკეთესო კოტე კაპანაძეა. ის არაჩვეულებრივი ადამიანია და ზუსტად იცის რა სჭირდება ჩვენს რაიონს," _ გვითხრა ზაურ ლაბაძემ.

შეკრებილი მოსახლეობის მოთხოვნა სამართლიანობა და მათთვის მისაღები კანდიდატის გამარჯვება იყო. მშვიდობიანი აქცია დაპირისპირებასა და ჩხუბში გადაიზარდა. იქ შეკრებილ საზოგადოებას ყველაზე მიუღებელ კანდიდატად კახა ჯამბურია მიაჩნდათ, რადგან ის ლაგოდეხის მკვიდრი არ არის. კანდიდატების მოსმენის შემდეგ კომისიის თავმჯდომარემ გადაწყვეტილების მიღება 21 დეკემბრისთვის გადადო. "კომისიის წევრები რვასაათიანი მუშაობის შედეგად გადაიღალნენ და გადაწყვეტილების მიღება გადავდეთ," _ განმარტა დავით ბეგაშვილმა.

21 დეკემბერს გადაწყვეტილების მიღების პროცესი აქციაზე შეკრებილი მოსახლეობის ზეწოლის შედეგად დაგვიანებით დაიწყო. საკრებულოში წესრიგის დასაცავად პოლიციის გამოძახება გახდა საჭირო. პოლიციის უფროსმა გიორგი კლიმიაშვილმა საკრებულოს ტერიტორიაზე სამართალდამცავების მობილიზება მოახდინა. ალიკა ტალახაძემ და გიორგი ბიჭიაშვილმა საკუთარი კანდიდატურა მოხსნეს, ამიტომ კომისიას ხუთი პრეტენდენტიდან მოუხდა შერჩევა, საბოლოო არჩევანი უმრავლესობით (6 წევრი) ვალერ ალიბეგაშვილზე გაკეთდა. მას შემდეგ, რაც კომისიის თავმჯდომარე დავით ბეგაშვილმა შედეგები გაასაჯაროვა, შეუძლოდ გახდა, რის გამოც სასწრაფო დახმარება გამოიძახეს. საკრებულოს მორიგი სხდომა 27 დეკემბერსაც ხმაურით დაიწყო. შეკრებილმა აქტივისტებმა კარები ჩაკეტეს და დარბაზში არც კომისიის თავმჯდომარეს დავით ბაკაშვილს და არც წევრებს უშვებდნენ. საბოლოოდ სხდომა საბიუჯეტო კომისიის კაბინეტში ჩატარდა, რომელსაც თვრამეტი წევრი ესწრებოდა (სულ 24 წევრია). გამგებლის პოსტზე ყველა მათგანმა მხარი ვალერ ალიბეგაშვილს დაუჭირა და შესაბამისი ოქმიც გაფორმდა, რის შემდეგაც სხდომის ჩაშლის მიზნით აქტივისტები კაბინეტში შეიჭრენ და ითხოვდნენ დამსწრე საზოგადოებას სამუშაო დაეტოვებინა. საკრებულოს ტერიტორიაზე ამ დროისთვის მობილიზებული იყო პოლიცია. შეკრებილმა აქტივისტება `ქართული ოცნების~ ლაგოდეხის მაჟორიტარი დეპუტატობის კანდიდატის ლუკა კურტანიძის პლაკატი იმ არგუმენტით დახიეს, რომ მან ლაგოდეხის მოსახლეობას იმედები გაუცრუა. კოალიციის აქტივისტის ნინო ამბროლაძის თქმით, ისინი უნდობლობას უცხადებენ კომისიას და არ სურთ ლაგოდეხში ძველი დრო განმეორდეს. მოსახლეობის თქმით, ვალერ ალიბეგაშვილი `ქართული ოცნების~ წევრი არ არის. უფრო მეტიც, მას ადანაშაულებდნენ წინასაარჩევნოდ `ნაციონალების~ მხარდაჭერასა და ბიძინა ივანიშვილის ლაგოდეხში ვიზიტის ხელშეშლაში, თუმცა, ვალერ ალიბეგაშვილი ამ ბრალდებას უარყოფს და აცხადებს, რომ ის `ქართული ოცნება-დემოკრატიულ საქართველოს~ მხარდამჭერია.

"ბიძინა ივანიშვილის ლაგოდეხში სტუმრობის დროს, ჩემი შვილი შეუძლოდ იყო და თბილისში ვიმყოფებოდი. ამიტომ ივანიშვილის წინააღმდეგ მოწყობილ აქციაში მონაწილეობას ვერ მივიღებდი," _ განმარტა მან. გამგებლის არჩევის გარდა სხდომაზე კიდევ რამდენიმე საკითხი იყო განსახილველი, თუმცა, აქტივისტებმა ამის შესაძლებლობა არ მისცეს და სესია მეორე დღისთვის გადაიდო.