უახლოეს დროში კახეთში უკანონოდ გასხვისებული მიწების საკითხის გადახედვა და სამართლიანობის აღდგენა იგეგმება. ამის შესახებ საქართველოს პრემიერ-მინისტრმა ბიძინა ივანიშვილმა ჟურნალისტებთან 24 დეკემბერს გამართულ რიგით მეორე პრესკონფერენციაზე განაცხადა. შეხვერდას 50-მდე ჟურნალისტი ესწრებოდა. `სპექტრს~ საშუალება ჰქონდა ბიძინა ივანიშვილისთვის რამდენიმე კითხვა დაესვა, თუმცა კახელებისთვის ყველაზე მნიშვნელოვანი მაინც მიწების გასხვისების საკითხი იყო:

_ წინა ხელისუფლების დროს კახეთში საუკეთესო ქართული მიწების მნიშვნელოვანი ნაწილი შეისყიდეს ინდუსებმა, არაბებმა პაკისტანელებმა და სხვა უცხოელებმა. როგორც გამოიკვეთა, ეკონომიკის სამინისტრომ იჯარით გაცემული მიწები ისე გაასხვისა, რომ მეიჯარეები საქმის კურსში არ ჩააყენა, თუ არ ჩავთვლით “მაცნეში” გამოცხადებულ აუქციონს, რომელიც არც ერთ მათგანს თვალით არ უნახავს. ეს პროცესი დღესაც დაჩქარებული ტემპით მიმდინარეობს. ახლადარჩეული ხელმძღვანელობა რა კონკრეტული ნაბიჯების გადადგმას აპირებს ამ პროცესის შესაჩერებლად და რა ბედი ეწევა უკვე გასხვისებულ მიწებს?

_ეს კითხვა ძალიან რთულია და ამავე დროს საინტერესოც. მართლაც, ასეთი პრეცედენტი ხშირია რეგიონებში და მსგავსი უსამართლობები შეგიძლიათ ნახოთ არა მარტო კახეთში. ძალიან რთულია გიპასუხოთ როგორ უნდა აღვადგინოთ და გავხადოთ კანონიერი აღნიშნული ფაქტები, ან თითოეული შემთხვევა. საერთოდ, მისასალმებელია, რომ უცხოური ინვესტიციები შემოვიდეს ქვეყანაში და სოფლის მეურნეობაშიც, მაგრამ წინა ხელისუფლების შემთხვევაში ეს პროცესი მიმდინარეობდა ადგილობრივი მოსახლეობის ხარჯზე და მათ საწინააღმდეგოდ. მიწების გაცემა ხდებოდა უკანონოდ და ზოგჯერ დათესილი ნაკვეთებიც კი გადახნეს. ფაქტობრივად, მიწების აღწერა დავასრულეთ რამდენიმე დღის წინ, ვერ ვახერხებდით საგაზაფხულო პროექტის შედგენას, რის გამოც კირვალიძესთან (დავით კირვალიძე, საქართველოს სოფლის მეურნეობის მინისტრი ავტ.) რამდენჯერმე მქონდა მკაცრი საუბარი, თუმცა ამას არ იმსახურებდა. დღე და ღამე მუშაობენ, რომ ეს მოახერხონ. დიდი დრო წაიღო, იმან, რომ გაგვეკეთებინა რეგისტრაცია, რა ხდებოდა არ ვიცოდით, არსად რეესტრში ეს აღწერილი არ იყო. რამდენიმე დღეა, რაც ეს პროცესი დასრულდა და ჩვენ დავიწყებთ ცალკეული კონკრეტული შემთხვევების განხილვას. ეს ერთ დღეში ვერ მოხდება, ამას დრო დასჭირდება, თანაც სიჩქართ შეიძლება ერთი უსამართლობა მეორეთი ჩავანაცვლოთ. რა თქმა უნდა, რთული გასარჩეევი პროცესი იქნება, მაგრამ გპირდებით, რომ აუცილებლად მოხდება რეაქცია ყველა უსამართლობაზე, მაქსიმალურად შევეცდებით აღვადგინოთ სამართლიანობა.