ლანა გულოშვილი

 ორშაბათს, 10 დეკემბერს დაგეგმილი საკრებულოს სხდომა წინა დღეების დაძაბულობისა და დაპირისპირების მიუხედავად მშვიდ გარემოში ჩატარდა. დეპუტატებმა მუნიციპალიტეტის ახალი ხელმძღვანელობა დაამტკიცეს და საქმიანობას ჩვეულ რიტმში შეუდგნენ.

10 დეკემბერს დანიშნული საკრებულოს სხდომა ბოლო კვირებისგან განსხვავებით მშვიდ რეჟიმში წარიმართა და არც სესიის გადადება გახდა საჭირო. სხდომაზე, რომელსაც 22 დეპუტატი ესწრებოდა, საკრებულოს თავმჯდომარედ ოცი ხმით 2-ს წინააღმდეგ ავთანდილ ზარდიაშვილი დაამტკიცეს. გურჯაანის მუნიციპალიტეტის გამგებლის მოვალეობის შემსრულებლად კი 17 ხმით 5-ის წინააღმდეგ აკაკი (ჯონი) ოსიაშვილი აირჩიეს. მედიასთან გაკეთებულ განცხადებებში ჯონი ოსიაშვილმა და ავთანდილ ზარდიაშვილმა პირობა დადეს, რომ რაიონის კეთილდღეობისთვის მაქსიმუმს გააკეთებენ. "გურჯაანში უამრავი პრობლემაა. მოგეხსენებათ, რომ მუნიციპალიტეტს, ზაფხულში თავს დაატყდა სტიქია. ამ კუთხით მთავრობა მნიშვნელოვანი პროცესების განხორციელებას აპირებს, თუმცა, `ქართული ოცნება~ აქამდეც აქტიურად მუშაობდა. მთავარი დღეისათვის ის არის, რომ მოსახლეობას დავეხმაროთ სოფლის მეურნეობის მიმართულებით. ათ სოფელში ნათესები 50-დან-100%-მდე განადგურდა, აქედან გამომდინარე ვიწყებთ სერიოზულ მუშაობას და ვითარებას ადგილზე შევისწავლით," _ აღნიშნა გამგებლის მოვალეობის შემსრულებელმა და აქვე `ერთიან ნაციონალურ მოძრაობასთან~ გარიგებაც უარყო."დროსა და სივრცეში არ არსებობს რაიმე ფაქტი, რომელიც ჩემს სახელს `ნაციონალურ მოძრაობასთან~ დააკავშირებს. ასეთი რამე წარმოუდგენელია," _ ამბობს ჯონი ოსიაშვილი.

`ნაციონალურ მოძრაობასთან~ კავშირს არც საკრებულოს თავმჯდომარე ავთანდილ ზარდიაშვილი ადასტურებს. "აზრის გამოხატვის საშუალება ყველას აქვს. უბრალოდ, როდესაც ადამიანს ადანაშაულებ, ბრალდებას უნდა ამყარებდეს არგუმენტები და ფაქტობრივი გარემოებები. მე ვარ ახალი ფრაქციის `ქართული ოცნება -რესპუბლიკელების~ ერთ-ერთი დამფუძნებელი და აქტიური წევრი. `ნაციონალებთან~ საერთო არაფერი მაქვს," _ ამბობს ავთანდილ ზარდიაშვილი.

შეგახსენებთ, რომ გასულ კვირებში გამგებლობის კანდიდატი მიხეილ ფურცელაძე და `ქართული ოცნების~ საინიციატივო ჯგუფის წევრი დავით ნიკოლაშვილი საპროტესტო აქციებს მართავდნენ. როგორც ისინი აცხადებდნენ, ავთანდილ ზარდიაშვილი და ჯონი ოსიაშვილი ხელისუფლებაში `ნაციონალური მოძრაობის~ ინტერესების დასაცავად მოდიან.Aმიხეილ ფურცელაძე და დავით ნიკოლაშვილი სხდომათა დარბაზში იმყოფებოდნენ, გადაწყვეტილებით უკმაყოფილოები იყვნენ, თუმცა პროტესტი ხმაურიანი ფორმით აღარ გამოუხატავთ, აღნიშნულ თემაზე მხოლოდ ჟურნალისტებთან ისაუბრეს. "არაფრის თქმას აზრი არ აქვს. თქვენც კარგად ხედავთ, რომ ბინძური გარიგებების მოწმენი გავხდით. ჩვენ აუცილებლად გავაგრძელებთ ბრძოლას, რა ფორმით მოხდება ეს, ამაზე ჩამოვყალიბდებით," _ განმარტა დავით ნიკოლაშვილმა.

საკრებულოს სხდომამ მშვიდ ვითარებაში ჩაიარა და დეპუტატებმა უკვე ახალი თავმჯდომარის ხელმძღვანელობით დამატებითი საკითხიც განიხილეს. სხდომის მიმდინარეობის პარალულურად გამგეობის შენობის წინ ახლა უკვე ჯონი ოსიშვილის მომხრეები იდგნენ ტრანსფარანტებით ხელში. ისინი მიხეილ ფურცელაძეს და დავით ნიკოლაშვილს ამჟამინდელ გუბრნატორ, ზურაბ ჭიაბერაშვილის პროექტად მოიხსენიებდნენ. სესიის დასრულების შემდეგ ჯონი ოსიაშვილი თანაგუნდელებთან ერთად `ქართული ოცნების~ ადგილობრივი ოფისისკენ გაემართა და მილოცვებს უკვე იქ იღებდა. მომდევნო დღეებში კი ახალმა ხელმძღვანელობამ მუშაობა რწმუნებულებთან შეხვედრით და სტიქიის შედეგად დაზარალებულებისთვის კომპენსაციის მისაღებად კომისიების შექმნით დაიწყო. აქვე განვმარტავთ, რომ ავთანდილ ზარდიაშვილი ვიდრე საკრებულოს თავმჯდომარის პოსტს დაიკავებდა, სურსათის უვენაბლობის სააგენტოს გურჯაანის სამმართველოს უფროსად მუშაობდა. აღნიშნული თანამდებობა ამ დრომდე ვაკანტურია. რაც შეეხება გამგებლის მოვალეობის შემსრულებელ, აკაკი (ჯონი) ოსიაშვილს, მისი ცვ შეგიძლიათ გაზეთ `სპექტრის~ #37(366)-ში იხილოთ.