მარინა პეტრიაშვილი

 ბოლო ორი კვირის განმავლობაში კახეთის რეგიონის ყველა მუნიციპალიტეტის თვითმმართველ ერთეულებში სიტუაცია მკვეთრად დაიძაბა. ვრცელდებოდა ინფორმაცია, რომ ზოგიერთ მათ წარმომადგენელზე პოლიტიკური ზეწოლა ხორციელდებოდა. მართალია, ისინი ამ ფაქტს არ ადასტურებდნენ, მაგრამ განცხადებები თანამდებობიდან წასვლის შესახებ თითქმის ყველა ხელმძღვანელმა დაწერა. გავრცელებული ინფორმაციით, `ნაციონალური მოძრაობის~ წევრებმა მმართველ პარტიას `დაასწრეს,~ თითქმის ყველა მუნიციპალიტეტის საკრებულოებში ათკაციანი ფრაქცია `ოცნების~ სახელით შექმნეს და თავმჯდომარეებად საკუთარი კანდიდატურები წარადგინეს (რიგ შემთხვევაში უკვე აირჩიეს). როგორც ექსპერტი დავით ლოსაბერიძე განმარტავს, ძველი მთავრობა პოზიციების შენარჩუნებას ამ გზით ცდილობს.

მიუხედავად იმისა, რომ საკრებულოს თავმჯდომარეებისა და გამგებლების გათავისუფლება კახეთის თითქმის ყველა მუნიციპალიტეტში მიმდინარეობს, ამ პროცესს გურჯაანში უფრო მეტი ხმაური ახლდა. გურჯაანის მუნიციპალიტეტის გამგეობის წინ კოალიცია "ქართული ოცნების" წევრების მიერ აქცია ორჯერ გაიმართა, ისინი ადგილობრივი თვითმმართველობის შეცვლას ღიად მოითხოვდნენ. აქციაზე ისიც გაჟღერდა, რომ საკრებულოში შექმნილი იყო ათკაციანი ფრაქცია, რომელიც საკრებულოს თავმჯდომარის, ზაქარია იაგანაშვილისა და გამგებლის დავით მესხიშვილის შეცვლას გეგმავდა. აღნიშნული ინფორმაცია არ დაადასტურა გურჯაანის მუნიციპალიტეტის საკრებულოს თავმჯდომარის მოადგილე ალექსანდრე სირბილაშვილმა და აღნიშნა, რომ თვითონაც ფრაქციის წევრია, თუმცა მათი მიზანი ვინმეს გადაყენება კი არა, მოსახლეობის დახმარებაა. "ფრაქცია 6 ნოემბერს შეიქმნა. მისი თავმჯდომარეა ალექსანდრე ინანაშვილი და საკრებულოს წევრებითაა დაკომპლექტებული, ერთ-ერთი მათგანი მეც ვარ. უახლოეს საკრებულოს სხდომაზე მოხდება მისი დარეგისტრირება. ჩვენი მოვალეობა ის კი არ არის, რომ ვინმეს იმპიჩმენტი მოვუწყოთ, არამედ _ გურჯაანელი ხალხის კეთილდღეობაზე და მომავალზე ვიზრუნოთ."

"სპექტრის" ინფორმაციით, საკრებულოს თავმჯდომარის თანამდებობაზე ალექსანდრე სირბილაშვილის დანიშვნა იგეგმებოდა. ამ საკითხთან დაკავშირებით ბატონ ალექსანდრეს ჯერ კიდევ მანამდე ვესაუბრეთ, სანამ ზაქარია იაგანაშვილი თანამდებობიდან წასვლის შესახებ განცხადებას დაწერდა. მან აღნიშნული ინფორმაცია არ დაადასტურა. თუმცა, იმავე საღამოს თანამდებობა დატოვა არა მარტო საკრებულოს თავმჯდომარემ, არამედ _ გამგებელმაც. "ყველაფერი ჩვენთვისაც მოულოდნელად მოხდა. საღამოს 5 საათისთვის განცხადება დაწერა საკრებულოს თავმჯდომარემ, ხოლო 6 საათისთვის _ გამგებელმა. ორივე მხრიდან იყო კოლეგიალური შეხვედრა, როგორც აპარატთან, ასევე ბიუროსთან. ჩვენ ეს ყველაფერი ოქმით დავადასტურეთ," _ გვითხრა ალექსანდრე სირბილაშვილმა და იქვე დასძინა: "ამჟამად გამგეობა პირველი პირის გარეშეა. ერთი მოადგილე სოსო ქიტიაშვილი პირადი განცხადებით გათავისუფლდა, გიორგი პეტრუზაშვილი შვებულებაშია, დავით ბეჟაშვილი კი _ ბიულეტენზე, თუმცა, გამოვიძახეთ და გამგებლის მოვალეობას დროებით ის შეასრულებს. მაქსიმალურად ვეცდებით, რომ თანამდებობის პირის დანიშვნა დემოკრატიულად და გამჭვირვალედ მოხდეს."

საკრებულოს სხდომა 22 ნოემბერს 4 საათზე დაინიშნა. დღის წესრიგში სამი საკითხი იდგა: საკრებულოს თავმჯდომარის გადადგომის შესახებ განცხადების განხილვა, ახალი ფრაქციის დარეგისტრირება და გამგებლის არჩევა. თუმცა სხდომა გადაიდო, რადგან გამგებლის თანამდებობაზე პრეტენზია კიდევ ორმა კანდიდატმა განცხადა. როგორც "სპექტრთან" საუბარში საკრებულოს თავმჯდომარის მოვალეობის შემსრულებელმა ალექსანდრე სირბილაშვილმა აღნიშნა, დღესდღეობით გურჯაანის გამგებლის თანამდებობაზე უკვე ხუთი პრეტენდენტის განცხადებაა წარდგენილი. ესენი არიან: ზვიად ყვირალაშვილი, ჯონი ოსიაშვილი, ნუგზარ კვაცაშვილი, სოსო ბერიკაშვილი და ლენა მოდებაძე. მისივე თქმით, არ იყო საკმარისი დრო, რომ ყველა კანდიდატურა განხილულიყო, ამიტომ სხდომა მეორე კვირისთვის გადაიდო. "იმის გამო, რომ ერთპიროვნული გადაწყვეტილება არ მივიღოთ და ყველა კანდიდატურა განვიხილოთ, მოსაფიქრებლად რამდენიმე დღე კიდევ მოვითხოვე. ამის შესახებ ბიუროს წევრებს შევუთანხმდი. დასახელებული კანდიდატებიდან საკრებულოს წევრების მხრიდან სოლიდური მხარდაჭერა ჰქონდა ზვიად ყვირალაშვილს, მაგრამ, სხვა განცხადებების შემოსვლამ გვაფიქრებინა, რომ არ დავუშვათ კომპრომატები საზოგადოებასთან და სხვადასხვა პოლიტიკურ პარტიებთან,"_ გვითხრა ალექსანდრე სირბილაშვილმა. ბოლო ორი კვირის განმავლობაში გამართულ აქციებზე, იმ საკითხმაც გაიჟღერა, რომ "რესპუბლიკური" პარტიის გურჯაანის რაიონული ორგანიზაციის თავმჯდომარე, ზვიად ყვირალაშვილი რეალურად "ნაციონალების" კადრია და კოალიცია "ქართულ ოცნებაში" სწორედ მათ მიერაა აგენტად შეგზავნილი. "ჩამოყალიბდა ფრაქცია, რომელსაც დაერქვა "რესპუბლიკელები ქართული ოცნება". მასში 10 ადამიანია გაწევრიანებული. მათი მიზანია გურჯაანის მუნიციპალიტეტის გამგებლად მოიყვანონ ზვიად ყვირალაშვილი. ეს ადამიანი პოლიციასთან, კუდთან, სოდთან და პროკურატურასთან იყო შეკრული და "ნაციონალებში~ დიდი ავტორიტეტი მოიპოვა. უშუალოდ მისი ხელშეწყობით მოხდა გურჯაანში გიორგი ღვინიაშვილის გამარჯვება. გამგეობაში ამბობენ, რომ სურთ `ქართულ ოცნებას~ ხელისუფლება მშვიდობიანად გადასცენ, მაგრამ რეალურად გამგებლის პოსტზე ზვიად ყვირალაშვილი ის კანდიდატურაა, რომელიც ისევ მათთვის იმუშავებს. მიდის კონსტიტუციური გარიგება, რასაც ჩვენ არ დავუშვებთ," _ ამბობდა კოალიცია "ქართული ოცნების" წევრი მიხეილ ფურცელაძე.

შეგახსენებთ, რომ ბოლო დღეებში თანამდებობა დატოვეს დედოფლისწყაროს მუნიციპალიტეტის გამგებელმა _ ნიკოლოზ შანშიაშვილმა და საკრებულოს თავმჯდომარე _ ლევან ბაღაშვილმა. თელავის გამგებელმა _ ნუგზარ ხუცაიძემ. ახმეტის გამგებელმა _ კობა მაისურაძემ და საკრებულოს თავმჯდომარე _ ალექსანდრე მაილაშვილმა.Lლაგოდეხის გამგებელმა _ დიმიტრი ლოლაძემ. აქვე აღვნიშნავთ, რომ დედოფლისწყაროში საკრებულოს თავმჯდომარედ უკვე აირჩიეს სოციალურ საკითხთა კომისიის თავმჯდომარე, 30 წლის ლევან ნატროშვილი. ექსპერტი დავით ლოსაბერიძე მიიჩნევს, რომ თვითმმართველობის ხელმძღვანელების აღნიშნული ფორმით შეცვლა ბუნებრივი მოვლენაა. "ასე მოხდა ვარდების რევოლუციის შემდეგაც, როდესაც შევარდნაძის ხელისუფლება შეიცვალა და ახალი მოვიდა, ასე ხდება დღესაც. ეს არის იმპროვიზაცია ძველი ხელისუფლების მხრიდან. პოზიციების შენარჩუნებას ისინი ამ გზით ცდილობენ. მმართველ გუნდში ყოველთვის დარჩებიან ასეთი ადამიანები. რამდენჯერაც არ უნდა შეიცვალოს მთავრობა, პრობლემები იყო და ისევ იქნება, სანამ არ მოხდება რეალური დეცენტრალიზაცია, არა მარტო კანონით, არამედ პრაქტიკითაც. ეს პროცესი საქართველოში 1997 წლიდან მიმდინარეობს, თუმცა ცენტრალიზებული მმართველობის თანამიმდევრული რეფორმირება ჩვენთან მხოლოდ 2006 წლის ადგილობრივი არჩევნების შემდეგ დაიწყო," _ გვითხრა დავით ლოსაბერიძემ.

კახეთის რეგიონში პოლიტიკური მოვლენები ერთი სქემით ვითარდება. როგორ გადანაწილდება ძალაუფლება და რომელი პოლიტიკური პარტიის წარმომადგენლები მოვლენ თანამდებობებზე, ალბათ, 2012 წლის ბოლომდე გახდება ცნობილი.