თამარ კაპანაძე

13 ნოემბერს გურჯაანის მუნიციპალიტეტის გამგეობასთან `ქართული ოცნების~ მორიგი აქცია გაიმართა, სადაც ახალი მოთხოვნები გაჟღერდა."ხალხში შიში კიდევ არსებობს. ალეკო კახიძე რამდენიმე წელია გუბერნატორის მოადგილეა და ხალხი ტერორში ჰყავს. ისიც და გოგიტა სიბაშვილიც პოსტს ჯერ კიდევ ინარჩუნებენ. გიორგი ღვინიაშვილმაც უნდა დატოვოს საქართველოს პარლამენტი. მათ უამრავი დანაშაული აქვთ ჩადენილი, რაც პროკურატურამ უნდა გამოიძიოს," _ აღნიშნა `ქართული ოცნების~ წარმომადგენელმა მიხეილ ფურცელაძემ.

მან ასევე გურჯაანის მუნიციპალიტეტის საკრებულოს პასუხისმგებლობაზეც ისაუბრა. "გურჯაანის მუნიციპალიტეტის საკრებულოს წევრების მიმართ უნდა აღიძრას სისხლის სამართლის საქმე, რომლებმაც თვითმფრინავის ნაწილები შეიძინეს. უფრო ზუსტად, კი არ იყიდეს, უბრალოდ ფული გაფლანგეს. მთლიანი თანხა მილიონ 900 000 ლარს შეადგენს. ეს გადაწყვეტილება 26 ოქტომბერს მიიღეს, სინამდვილეში ოქმი 24 აგვისტოთი გააფორმეს."

აღნიშნულ ბრალდებას აბსურდულს უწოდებს გურჯაანის მუნიციპალიტეტის საკრებულოს თავმჯდომარე ზაქარია იაგანაშვილი. "თავის დროზე როდესაც ბიუჯეტი შედგა, საფინანსო სამსახურმა განმარტება გააკეთა. ეს არის შესყიდვების ცოდნის ამბავი. შესყიდვების ფორმა დამტკიცებულია. ყველა პუნქტს აქვს თავისი კოდი და მუხლი, ამ მუხლში ზის თანხა და არა ის, თუ რა შევიძინე. ეტყობა ვინმემ არასწორი ინფორმაცია მიაწოდათ, არანაირი თვითმფრინავის ნაწილები არ შეგვიძენია. ეს არის კოდი, სადაც თვითმფრინავის ნაწილებთან ერთად აღნიშნულია რკინიგზის, გარე განათების ქსელებისა და საცურაო მომსახურება. თუ იმ მუხლში რაიმე თანხაა უნდა მოხმარებოდა გარე განათების ქსელებს. რაც შეხება თარიღს, ესეც არასწორია. დადგენილებას რომ მივიღებთ, თუ ბიუჯეტი მეორე დღესვე არ გაიგზავნა მაცნეში, უკვე კანონდარღვევაა და ის ძალაში ვერ შევა. გეგმა შემუშავებულია ოქოტმბერში გამართულ საკრებულოს სხდომაზე და გადაწყვეტილებაც მაშინ არის მიღებული," _ განმარტა ზაქარია იაგანაშვილმა.

აქციაზე ბრალდებები კოალიცია `ქართული ოცნების~ გურჯაანის რაიონული შტაბის წევრის `რესპუბლიკური პარტიის~ თავმჯდომარის ზვიად ყვირალაშვილის მიმართაც გაჟღერდა. მიხეილ ფურცელაძე კვლავაც ამტკიცებდა, რომ ზვიად ყვირალაშვილი `ნაციონალური მოძრაობის~ წევრებთან არის გარიგებული. შეკრებილი საზოგადოების განცხადებით, მსგავსი აქციები მომავალშიც გაიმართება. "ხელისუფლების სათავეში ახალი მმართველი გუნდი მოვიდა და რაიონებში ძალაუფლების მშვიდობიანი გადაბარება უნდა მოხდეს. თუ ჩვენი მოთხოვნა არ დაკმაყოფილდა, აქციებს პერმანენტულად გავმართავთ," _ გვითხრა მოქალაქემ, რომელმაც ვინაობა არ გაგვიმხილა.

აქციაზე იმყოფებოდა სოფელ ჩალაუბნის საჯარო სკოლის ყოფილი პედაგოგი, რომელიც მისივე თქმით, პოლიტიკური ნიშნით გაათავისუფლეს და სოფელ მელაანის საჯარო სკოლის გახსნაზე ფიზიკურადაც გაუსწორდნენ. "მოვითხოვ, ჩემს ადგილზე დაბრუნებას, რადგანაც პოლიტიკური ნიშნით ვარ გათავისუფლებული. ჩალაუბნის საჯარო სკოლაში დაწყებითი კლასების მასწავლებელი ვიყავი, ასევე ვმუშაობდი სასწავლო ნაწილის გამგედ. ალეკო კახიძემ თავისი ნათესავი ვიღაც არაპროფესიონალი, ინჟინერი ლალი კუდაშვილი გამოძებნა და დირექტორად დანიშნა. მან კანონის უხეში დარღვევით უმიზეზოდ გამათავისუფლა. ეს წინასწარ იყო დაგეგმილი. ჩემი საათები კახიძის ნათესავებს გაუნაწილეს. ძალიან განვრისხდი. შევიტყვე, რომ მელაანის საჯარო სკოლა პრეზიდენტს უნდა გაეხსნა. ვიფიქრე, პირადად შევხვედროდი, ჩემი პრობლემის შესახებ გავესაუბრებოდი და ამისთვის მელაანში წავედი. პოლიციის უფროსი ლევან ბიწკინაშვილი მოვიდა და მითხრა ტერიტორია დატოვე, თორემ გაგათრევთო. ამ სიტყვების შემდეგ ორმა პიროვნებამ ხელი მომკიდა და მანქანაში ჩამაგდო. თავში ისე მირტყეს, რომ გონი დავკარგე და აღარ მახსოვს კაჭრეთის საავადმყოფოში როგორ აღმოვჩნდი. ოქტომბრის ბოლო რიცხვებში საქართველოს განათლებისა და მეცნიერების მინისტრმა გამოაცხადა, რომ პოლიტიკური ნიშნით გათავისუფლებული ყველა პედაგოგი სკოლაში უნდა დაბრუნდეს, რისთვისაც სამი კვირის ვადა მისცათ. სულ რამდენიმე დღეა დარჩენილი, მაგრამ ლალი კუდაშვილი ისევ თვითნებობს და აცხადებს: "ჩემს სკოლაში მინისტრი მე ვარო." _ აღნიშნა ლამზირა ყორჩიშვილმა.

კოალიცია `ქართული ოცნების~ წევრებმა `რესპუბლიკური პარტიიდან~ აქციის ორგანიზატორებს პროვოკატორები უწოდეს და პროტესტი პლაკატების ჩამოხევით გამოხატეს. "ესენი არიან პროვოკატორები და არა `ქართული ოცნების~ წევრები," _ განაცხადა გელა მიმინოშვილმა. "ესენი არ არიან ქართული ოცნების წევრები. ვინ არის ფურცელაძე და ნიკოლაშვილი მთელ რაიონს მოეხსენაბა. რასაც ლაპარაკობენ, ყველაფერი ტყუილია,"_ აღნიშნა გიორგი დვალმა. შელაპარაკება მოხდა ტელეკომპანია "ტვ-9"-ის ოპერატორსა და "ქართული ოცნების" "რესპუბლიკური პარტიის" წევრებს შორის. ოპერატორი მათ მიუთითებდათ, რომ პლაკატების ჩამოხევა არ შეიძლება, რასაც კოალიციის წევრების აღშფოთება მოჰყვა.