მარინა პეტრიაშვილი

9 ნოემბერს გურჯაანის მუნიციპალიტეტის გამგეობასთან აქცია გაიმართა, სადაც სიტყვით გამოვიდნენ კოალიცია `ქართული ოცნების~ წარმომადგენლები. ისინი მოითხოვდნენ გურჯაანის მუნიციპალიტეტის გამგეობაში დასრულდეს ორხელისუფლებიანობა და აღიძრას სისხლის სამართლის საქმე ყოფილი გუბერნატორის გიორგი ღვინიაშვილის, ასევე ძმების, გიორგი და გოჩა სიბაშვილების წინააღმდეგ. აქციაზე ბრალდებები გაისმა კოალიცია "ქართული ოცნების" წევრის, "რესპუბლიკური პარტიის" თავმჯდომარის ზვიად ყვირალაშვილის მისამართითაც, რომელსაც ბრალს `ნაციონალური მოძრაობის" წევრებთან გარიგებაში სდებდნენ. "ჩვენი მოთხოვნებია: გურჯაანის რაიონში დასრულდეს ორხელისუფლებიანობა. აგრეთვე აღიძრას სისხლის სამართლის საქმე რესპუბლიკის პროკურატურაში გამგეობისა და საკრებულოს ქმედითუუნარობაზე და მათ კრიმინალურ საქმიანობაზე. დაისაჯონ არჩევნების გამყალბებლები: ძმები გიორგი და გოჩა სიბაშვილები და ყოფილი გუბერნატორი გიორგი ღვინიაშვილი, რომლებმაც გურჯაანის რაიონში ტერორით და გაყალბებით შეძლებს არჩევნებში გამარჯვება. ეს უნდა გამოიძიოს რესპუბლიკის პროკურატურამ და დამნაშავეები სათანადოდ დასაჯოს," _ გვითხრა აქციის ერთ-ერთმა მონაწილემ კოალიცია "ქართული ოცნების" წევრმა დავით ნიკოლაშვილმა. მანვე სერიოზული ბრალდებები წაუყენა `რესპუბლიკური პარტიის~ თავმჯდომარეს ზვიად ყვირალაშვილს. "ჩვენ `რესპუბლიკურ~ პარტიას და მის ლიდერებს არ ვუპირისპირდებით, მაგრამ გვაქვს ინფორმაცია, რომ ბატონი ზვიადი რაიონის პროკურორის ახლო ნათესავია. მისი მიზანია, შეიქმნას ფრაქცია და სასურველი კანდიდატი დააყენონ გურჯაანის გამგებლად. ჩვენ ის გარიგებაში ვამხილეთ," – გვითხრა მან.

აქციაზე ასევე სიტყვით გამოვიდა კოალიცია `ქართული ოცნების~ წევრი მიხეილ ფურცელაძე. მან იგივე ბრალდება წაუყენა ზვიად ყვირალაშვილს და ისიც დასძინა, რომ ის ერთ-ერთი იმათთაგანია, რომელმაც გურჯაანის რაიონში `ქართული ოცნების~ არჩევნებში გამარჯვებას ხელი შეუშალა."ჩამოყალიბდა ფრაქცია, რომელსაც დაერქვა `რესპუბლიკელები ქართული ოცნება~. მასში 10 ადამიანია გაწევრიანებული. მათი მიზანია გურჯაანის მუნიციპალიტეტის გამგებლად მოიყვანონ ზვიად ყვირალაშვილი. ეს ადამიანი პოლიციასთან, კუდთან, სოდთან და პროკურატურასთან იყო შეკრული და `ნაციონალებში~ დიდი ავტორიტეტი მოიპოვა. უშუალოდ მისი ხელშეწყობით მოხდა გურჯაანის რაიონში, არჩევნებში გიორგი ღვინიაშვილის გამარჯვება. გამგეობაში ამბობენ, რომ სურთ `ქართულ ოცნებას~ ხელისუფლება მშვიდობიანად გადასცენ, მაგრამ რეალურად გამგებლის პოსტზე ზვიად ყვირალაშვილი ის კანდიდატურაა, რომელიც ისევ მათთვის იმუშავებს. მიდის კონსტიტუციური გარიგება, რასაც ჩვენ არ დავუშვებთ," _ გვითხრა მან და იქვე დასძინა: "მე `ქართული ოცნების~ წევრი ვარ, მაგრამ ეს აქცია არ ტარდება კოალიციის მხრიდან, ეს არის გურჯაანელი ხალხის მიერ ორგანიზებული. ისინი ამით პროტესტს გამოხატავენ `ნაციონალების~ მიმართ. ადგილობრივი მოსახლეობა ამ მძიმე რეჟიმისგან განთავისუფლებას ითხოვს."

`სპექტრი~ კოალიცია `ქართული ოცნების~ გურჯაანის რაიონული შტაბის წევრს, `რესპუბლიკური~ პარტიის თავმჯდომარეს ზვიად ყვირალაშვილს დაუკავშირდა და გამგეობის წინ გამართულ აქციას თაობაზე კომენტარი სთხოვა. როგორც მან გვითხრა, ორგანიზატორებმა მოსახლეობა აქციაზე მოტყუებით მიიყვანეს. მის მიმართ გამოთქმული ბრალდებები კი სრული აბსურდია. "ხალხი მოტყუებით მიიყვანეს. უთხრეს, რომ `ქართული ოცნების~ მხარდამჭერი აქცია უნდა გამართულიყო, სადაც ქალბატონი მანანა ბერიკაშვილიც იქნებოდა. ის ბრალდებები, რაც დავით ნიკოლაშვილმა და მიხეილ ფურცელაძემ აქციის დროს გააჟღერეს, აბსურდულია. გურჯაანს ჰყავს მოქმედი გამგებელი, რომელსაც არც განცხადება დაუწერია და თანამდებობიდანაც არ წასულა, შესაბამისად, ამ ეტაპზე აღნიშნული საკითხის განხილვა შეუძლებელია. თვითონ ბატონი მიხეილი ხელმოცარული პიროვნებაა. მას ჯერ `ქართული ოცნების~ პარტიის თავმჯდომარეობა, შემდეგ საპარლამენტო არჩევნებში მაჟორიტარი კანდიდატობა და ბოლოს გამგებლობაც სურდა," _ გვითხრა ზვიად ყვირალაშვილმა.

მისივე თქმით, გურჯაანის საკრებულოში მართლაც არის ფრაქცია `ქართული ოცნება რესპუბლიკელები~, რომელიც საკრებულოს დეპუტატების მოთხოვნით შეიქმნა და 10 ადამიანი გაწევრიანდა. "ეს არის ადამიანების ჯგუფი, რომელთაც აქვთ სურვილი უკეთესობისკენ წაიყვანონ ჩვენი მოქალაქეების ყოფა და მათთვის ბევრი კარგი საქმე გააკეთონ. ამაში ცუდს ვერაფერს ვხედავ, მით უფრო, რომ ყველაფერი ჩემს ხელმძღვანელობასთან შეთანხმებით მოხდა. ხოლო ისეთ ადამიანებს, როგორებიც არიან დავით ნიკოლაშვილი და მიხეილ ფურცელაძე, ჩვენს გვერდით ვერ დავიყენებთ. გურჯაანში კარგად იციან ვინ არის ზვიად ყვირალაშვილი და ვინ არის დავით ნიკოლაშვილი," _ გვითხრა მან. "სპექტრმა" კომენტარი იქ მყოფ მოქალაქეებსაც სთხოვა და აღმოჩნდა, რომ უმრავლესობა მართლაც შეცდომაში შეიყვანეს და აქციაზე შემთხვევით მოხვდნენ.