ლანა გულოშვილი

 28 ივლისს კოალიცია `ქართული ოცნების~ გურჯაანის ოფისში ხალხმრავლობა იყო. გაერთიანების ადგილობრივ წარმომადგენლებს მსახიობ გივი ბერიკაშვილის შვილი და ამჯერად უკვე `ქართული ოცნების~ მაჟორიტარი დეპუტატობის კანდიდატი გურჯაანში, მანანა ბერიკაშვილი შეხვდა. შეკრება ჟურნალისტებისთვის დახურული იყო. კოალიციის წარმომადგენლებს არ უთქვამთ რაზე ისაუბარეს. `სპექტრმა~ მანანა ბერიკაშვილს რამდენიმე კითხვით მიმართა. როგორც მან განაცხადა, გურჯაანელი ხალხის იმედი აქვს და დარწმუნებულია, რომ `ქართული ოცნება~ მოახლოებულ არჩევნებში აუცილებლად გაიმარჯვებს. ამავდროულად, კახელ გლეხს პრობლემების გადაჭრას ჰპირდება. "დღეს აქ იმისთვის ვარ, რომ თითოეული გურჯაანელის გასაჭირი გულდასმით მოვისმინო და იმ პოლიტიკურ ჯგუფამდე მივიტანო, რომელიც აუცილებლად მოვა ქვეყნის სათავეში და ამ პრობლემებს გადაჭრის. ჩემი მოვალეობა და პასუხისმგებლობაა მივხედო, მოვუარო გურჯაანს. ეს მუნიციპალიტეტი უნდა გახდეს წელში გამართული. აქ, ისევე როგორც მთლიანად საქართველოში, უნდა დამთავრდეს სიღარიბე, გაჭირვება და დაშინება," _ განაცხადა მაჟორიტარი დეპუტატობის კანდიდატმა.

მანანა ბერიკაშვილის თქმით, მას კონკურენტების არსებობა არ აშინებს და მიიჩნევს, რომ აუცილებლად გაიმარჯვებს. ბოლო პერიოდში ყველაზე აქტუალურ კითხვას _ ბიძინა ივანიშვილის მიერ გადახდილი ოთხმოცი მილიონი ქველმოქმედებაა, თუ ყადაღის საფასური? _ მანანა ბერიკაშვილი შემდეგნაირად პასუხობს: "ორშაბათიდან უკვე ვიწყებთ სტიქიის შედეგად დაზარალებულ სოფლებში მონიტორინგის წარმოებას. მაქსიმალურად გავაკეთებთ ყველაფერს იმისთვის, რომ ეს პროცესი გაკონტროლდეს. მთავარია, ხელისუფლების კეთილი ნება, თორემ ბიძინა ივანიშვილმა პირველივე დღეებში გამოხატა კახელების დახმარების სურვილი და ეს კარგად გამოჩნდა კიდეც. მიუხედავად იმისა, რომ ის ყადაღის გადახდას არ აპირებდა, რადგან უკანონობად მიაჩნდა, სტიქიის შემდეგ განაცხადა, რომ ბიუჯეტში ათ მილიონს ჩარიცხავდა, თუმცა როდესაც სიტუაციას ადგილზე გაეცნო, მიხვდა, რომ ეს თანხა საკმარისი არ იქნებოდა. ამიტომ გადაიხადა ოთხმოცი მილიონიც, მაგრამ თუ ამ ხელისუფლებას არ ექნება ხალხის დახმარების სურვილი, მაშინ რაზეა ლაპარაკი?!" _ გვითხრა მანანა ბერიკაშვილმა.

`ქართული ოცნების~ გურჯაანის ოფისში იმყოფებოდა მსახიობი ზურა ბერიკაშვილიც. როგორც ის ამბობს, ბიძინა ივანიშვილი ქართული კულტურის დიდი მეგობარია და წლების განმავლობაში უანგაროდ ინახავდა თეატრებს. ამიტომ თვლის, რომ ქვეყნის სადავეები სწორედ მან უნდა აიღოს ხელში."ათი წელია მსახიობებს გვერდში გვიდგას ყოველგვარი რეკლამისა და აფიშირების გარეშე, დიდი ხნის განმავლობაში სახეზეც კი ვერ ვცნობდით. მან ოჯახები _ შიმშილს და თეატრები დანგრევას გადაარჩინა. საქართველოში უამრავია ისეთი სფერო, სადაც ბატონმა ბიძინამ უზარმაზარი წვლილი შეიტანა. იმედი მაქვს, ამ არჩევნებში `ქართული ოცნება~ გაიმარჯვებს," _ გვითხრა ზურა ბერიკაშვილმა.

გურჯაანის ოფისიდან წასვლის შემდეგ, მანანა ბერიკაშვილი კოალიციის წევრის ილია სულიაშვილის ოჯახს ესტუმრა, რომელიც პოლიციამ ხულიგნობის ბრალდებით პირველ ივლისს დააკავა და ოცდათხუთმეტდღიანი ადმინისტრაციული პატიმრობა შეუფარდა. ის ამჟამად სიღნაღის დროებითი მოთავსების იზოლატორში იმყოფება. ოცდაექვს ივლისს მას მამა, თამაზ სულიაშვილი გარდაეცვალა. დაკავებულს გათავისუფლებამდე ოთხი დღე ჰქონდა დარჩენილი. მამის დაკრძალვაზე დასწრების უფლება მას ბადრაგის თანხლებით მისცეს. ილია სულიაშვილი ამავდროულად საარჩევნო პროგრამა `კარდაკარის~ რეგისტრატორი იყო.

შეგახსენებთ, რომ კოალიცია `ქართულმა ოცნებამ~ მაჟორიტარი კანდიდატები კახეთის ყველა მუნიციპალიტეტში წარადგინა. ესენი არიან: გურჯაანში _ მანანა ბერიკაშვილი, სიღნაღში _ გელა გელაშვილი, დედოფლისწყაროში _ ალექსანდრე თამაზაშვილი, საგარეჯოში _ თინათინ ხიდაშელი, ლაგოდეხში _ ლუკა კურტანიძე, ყვარელში _ დავით ქევხიშვილი, თელავში _ გელა სამხარაული და ახმეტაში _ ზურაბ ზვიადაური.