ლანა გულოშვილი გურჯაანის მუნიციპალიტეტში მცხოვრებმა რამდენიმე მოქალაქემ საქართველოს კონტროლის პალატის პოლიტიკური პარტიების ფინანსური სამსახურის უფროსის მოადგილე, გიორგი ამირანაშვილის მიერ ხელმოწერილი ასეთი შინაარსის უწყებები მიიღო: "უწყება საქართველოს კონტროლის პალატის პოლიტიკური პარტიების ფინანსური მონიტორინგის სამსახურში, პოლიტიკური სუბიექტების მოჩვენებითი, თვალთმაქცური გარიგების გზით დაფინანსების ფაქტზე ადმინისტრაციული წარმოება მიმდინარეობს, რასთან დაკავშირებითაც დაბარებული ხართ ახსნა-განმარტების მისაცემად. ასევე დამატებით გაცნობებთ, ადმინისტრაციულ სამართალდარღვევათა კოდექსის 252-ე მუხლის საფუძველზე, გაქვთ უფლება გაეცნოთ საქმის მასალებს, მისცეთ ახსნა-განმარტება, წარადგინოთ მტკიცებულებანი, განაცხადოთ შუამდგომლობანი, საქმის განხილვისას ისარგებლოთ ადვოკატის იურიდიული დახმარებით, ისარგებლოთ თარჯიმნის მომსახურებით, გაასაჩივროთ საქმის გამო მიღებული დადგენილება. საქართველოს კონტროლის პალატისათვის მოთხოვნილი ინფორმაციის მიწოდების კანონით დადგენილი ვალდებულებების შეუსრულებლობა ისჯება კანონით. ახსნა-განმარტების მისაცემად უნდა მობრძანდეთ 2012 წლის 13 მარტს 10 საათზე მისამართზე: ნონეშვილის გამზირი #13, პირველი სართული." უწყების ადრესატები კოალიცია `ქართული ოცნების~ მხარდამჭერები არიან. ამ ფაქტთან დაკავშირებით `ქართული ოცნების~ გურჯაანის ოფისში გაერთიანების წევრებმა პრესკონფერენცია გამართეს. ჟურნალისტების კითხვებს `ქართული ოცნების~ წევრი ლაშა ჩხარტიშვილი პასუხობდა. მან პროტესტის ნიშნად მოქალაქეებისთვის გაგზავნილი უწყებები გადახია. მისი თქმით, ხელისუფლების მხრიდან ეს პოლიტიკური დაშინების, დევნის მცდელობაა. "გურჯაანში ჩვენი ორგანიზაციის წარმომადგენლებს ფსიქოლოგიური ზეწოლის მიზნით, კონტროლის პალატიდან უწყებები მიუვიდათ, რომლის თანახმადაც, მათ სრულიად გაურკვეველი საფუძვლით არამიზნობრივ დარღვევებზე ედავებიან. მსგავსი თვალთმაქცური მოქმედებებით ხელისუფლება ვერ დააშინებს, ვერ მოასუსტებს `ქართული ოცნების~ გეგმებს. ჩვენ ვართ ხალხი, რომელსაც არ ეშინია, ეს ყველაფერი აუცილებლად დასრულდება მიზანმიმართულად, სააკაშვილის, არათვალთმაქცური, არამედ რეალური გასამართლებით," _ განაცხადა `ქართული ოცნების~ წევრმა ლაშა ჩხარტიშვილმა. მანვე, უწყების ადრესატებს საქართველოს კონტროლის პალატის პოლიტიკური პარტიების ფინანსური სამსახურის უფროსის, ნათია მოგელაძის სახელზე, განცხადების ფორმის შევსებისკენ მოუწოდა. `სპექტრთან~ საუბრისას აღნიშნულ ფაქტთან დაკავშირებით საკუთარი პოზიცია დააფიქსირა მოქალაქე ზაზა ნაცვლიშვილმა."კონტროლის პალატა რაღაც ფინანსურ დარღვევებს გვედავება. ამის შესახებ გაფრთხილება გუშინ მივიღეთ. მე პარტიის წევრი არ ვარ, მაგრამ როგორც მოქალაქეს ვალდებულება მაქვს, ნებისმიერი პოლიტიკური ლიდერის აზრს მოვუსმინო _ პოზიციიდან იქნება, თუ ოპოზიციიდან, რათა არჩევნებზე უკვე ჩამოყალიბებული ვიყო, თუ ვის დავუჭირო მხარი. ადამიანს საკუთარი რწმენა რომ აქვს, ეს კანონდარღვევა არ არის. ამას ამბობს ხელისუფლებაც. როდესაც გვარწმუნბენ, რომ დემოკრატიული სახელმწიფო გვაქვს, მაშინ უნდა იცოდნენ, რომ დემოკრატიის მთვარი პრინციპი სიტყვის გამოხატვის თავისუფლებაა. ხელისუფლების მხრიდან ასეთი ქმედებებით, ვერც წინ წავალთ და ვერც ნატოს წევრი გავხდებით, ბანანის ქვეყანას კი დავემსგავსებით," _ აღნიშნა ზაზა ნაცვლიშვილმა. უწყების მიღებით უკმაყოფილებას გამოთქვამდნენ `ქართული ოცნების~ აქტივისტები და მხარდამჭერები. ისინი მიიჩნევენ, რომ ხელისუფლების მხრიდან მათ მიმართ უკანონო დევნა და პოლიტიკური ტერორი ხორციელდება.